រាជធានីភ្នំពេញ ៖ ដោយសារតែភាពអនាខធិបតេយ្យនៃការចតរថយន្តនៅលើចិញ្ចើមផ្លូវ ហើយរត់ចាប់ម៉ូយប្រសេកប្រសាចឥតសណ្តាប់ធ្នាប់ផងនោះ ជាហេតុធ្វើឱ្យមានគ្រោះថ្នាក់ចរាចរណ៍បានកើតឡើងជាយថាហេតុ។ ជាក់ស្តែងកាលពីវេលាម៉ោង៩និង១៥នាទីព្រឹកថ្ងៃទី៣០ មេសា កន្លងមកមានគ្រោះថ្នាក់ចរាចរណ៍មួយកើតឡើងនៅតាមបណ្តោយមហាវិថីសហព័ន្ធរុស្ស៊ី ខាងលិចគល់ស្ពានអាកាស៧មករា ក្នុងសង្កាត់ទឹកថ្លា ខណ្ឌសែនសុខ គឺម៉ូតូហុងដាឌ្រីមសេ១២៥ បើកបុកបុរសអ្នកហៅម៉ូយម្នាក់យ៉ាងពេញទំហឹង បណ្តាលឱ្យបុរសនេះដួលបោកសន្លប់ស្តូកមួយសន្ទុះ ព្រោះតែម៉ូតូជ្រាន់ហ្វ្រាំងមិនទាន់ស្របពេលបុរសរងគ្រោះរត់ឆ្លេឆ្លាហៅម៉ូយដាក់រថយន្ត ។ នេះមិនមែនជាករណីទី១ទេ ដោយសារតែការរត់ចាប់ម៉ូយរញ៉េរញ៉ៃបែបអនាធិបតេយ្យនៅតាមដងផ្លូវ ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុម៉ូតូហុងដាឌ្រីមសេ១២៥ ពណ៌ខ្មៅមួយគ្រឿង បានឌុបស្ត្រីម្នាក់ធ្វើដំណើរតាមបណ្តោយមហាវិថីសហព័ន្ធរុស្ស៊ី ពីលិចទៅកើត បានបុកបុរសម្នាក់ជាអ្នកហៅម៉ូយដាក់រថយន្តតាក់ស៊ី ដែលកំពុងចតហៅម៉ូយនៅខាងលិចគល់ស្ពានអាកាស៧មករា យ៉ាងពេញទំហឹងបណ្តាលឱ្យបុរសរងគ្រោះដួលបោកទៅនឹងចិញ្ចើមផ្លូវក្បែររថយន្តសន្លប់បាត់ស្មារតីមួយសន្ទុះទើបដឹងខ្លួន ។
ប្រភពដដែលបានបន្តថា ចំណែកឯអ្នកបើកម៉ូតូបានរងរបួសហូរឈាមមុខមាត់ ។ គ្រោះថ្នាក់នេះបណ្តាលមកពីអ្នកបើកម៉ូតូបញ្ច្រាសទិសហើយលឿន ស្របពេលបុរសហៅម៉ូយនៅក្រោយគូទរថយន្តតាក់ស៊ីរត់ចេញមកវាក់នឹងម៉ូតូជាន់ហ្វ្រាំងមិនទាន់ ក៏បុកតែម្តងដែល ។
ក្រោយពេលកើតហេតុប៉ូលិសប្រចាំការនៅគោលដៅនេះបានបញ្ជូនម៉ូតូនិងជនរងគ្រោះទៅធ្វើការសម្របសម្រួលនៅអធិការដ្ឋានខណ្ឌសែនសុខ ៕
ចែករំលែកព័តមាននេះ