ខេត្តពោធិ៍សាត់ ៖ កាលពីរាត្រីថ្ងៃទី២៧ មេសា សាខាកាកបាទក្រហមកម្ពុជាខេត្ត បាន ប្រារព្ធទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ខួបលើកទី១៤៩ ក្រោមប្រធានបទ«យុវជនកំពុងនាំគ្នាធ្វើសកម្មភាព» ។ ពិធីនេះប្រព្រឹត្តទៅដោយមានការអញ្ជើញចូលរួមពីលោកបណ្ឌិតឧកញ៉ាជា រតនា ទីប្រឹក្សារាជរដ្ឋាភិបាល និងលោកជំទាវលី ហៀក រតនា, លោកថៃ នរសត្យា រដ្ឋលេខាធិការក្រសួងវប្បធម៌និងវិចិត្រសិល្បៈ លោកសួន រិនឌី អភិបាលខេត្តស្តីទី និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងសប្បុរសជនគ្រប់លំដាប់ថ្នាក់ ។
លោកសួន រិនឌី មានប្រសាសន៍ថា ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ជាការរំលឹកខួបក្រោមគំនិតផ្តួចផ្តើមរបស់ស្ថាបនិកមួយរូបជាពាណិជ្ជ ករជនជាតិស្វ៊ីស ហើយចលនានេះបានចាប់បដិសន្ធិតាំងពីឆ្នាំ១៨៦៣មកម៉្លេះ មានអាយុកាល១៤៩ឆ្នាំហើយ ។ ឆ្នាំនេះក្រោមការចង្អុលពីកាកបាទក្រហមកម្ពុជា យើងបានប្រារព្ធធ្វើក្រោមប្រធានបទ«យុវជនកំពុងនាំគ្នាធ្វើសកម្មភាព» ក្នុងគោលបំណងបន្តលើកកម្ពស់ស្មារតីជំរុញ និងលើកទឹកចិត្តយុវជនអ្នកស្ម័គ្រចិត្តវ័យក្មេងរបស់យើងដែលបាននិងកំពុងតែសកម្មបំពេញភារកិច្ចរបស់ខ្លួននៅតាមកន្លែងនានាប្រកបដោយការទទួលខុសត្រូវខ្ពស់ ហើយក៏បញ្ជាក់ពីការទទួលស្គាល់តួនាទីដ៏មានសារសំខាន់របស់យុវជនដែលជាភ្នាក់ងារនាំឱ្យមានការផ្លាស់ប្តូរឥរិយាបថនៅក្នុងគ្រប់ស្រទាប់សង្គមទាំងក្នុងមជ្ឈដ្ឋានថ្នាក់ដឹកនាំ ទាំងនៅតាមសហគមន៍ ។
ប្រការទាំងនេះគឺជាការប្តេជ្ញាថា ត្រូវតែនាំគ្នាខិតខំធ្វើសកម្មភាពឱ្យបានកាន់តែ ច្រើន ល្អ ស៊ីជម្រៅ និងឆ្ងាយជាងមុន នោះទើបចលនាកាកបាទក្រហម អឌ្ឍចន្ទក្រហមអាចពុះពារជម្នះបានលើផលវិបាក និងបញ្ហាប្រឈមជាសាកលទាំងឡាយដែលបង្កឡើងដោយភាពក្រីក្រ ទំនាស់ វិបត្តិ ហានិភ័យ អំពើហិង្សា ចំណាកស្រុក ជំងឺឆ្លងរាតត្បាតនានា ការរើសអើង និងបម្រែបម្រួលអាកាសធាតុ ។
លោកបណ្ឌិតឧកញ៉ា ជា រតនា បានអានសេចក្តីថ្លែងការណ៍របស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា ដោយបញ្ជាក់ថា ឆ្នាំ២០១២នេះក៏ដូចបណ្តាឆ្នាំមុនៗដែរ កាកបាទក្រហមរួមជា មួយសមាគមជាតិនៅលើពិភពលោក បានប្រារព្ធទិវាពិភពលោកកាកបាទក្រហម អឌ្ឍចន្ទក្រហម៨ឧសភា ដើម្បីរំលឹកដល់ការបង្កើតឱ្យមានស្ថាប័នមនុស្សធម៌ធំជាងគេបំផុតលើពិភពលោក ដែលធ្វើប្រតិបត្តិការជួយអ្នករង គ្រោះទាំងឡាយក្នុងគ្រប់កាលៈទេសៈដោយពុំមានការរើសអើង បែងចែកវណ្ណៈ ពូជសាសន៍ និងនិន្នាការនយោបាយអ្វីឡើយ ។
ក្នុងពិធីរាត្រីសមោសរនេះ គណៈកម្មាធិការសាខាកាកបាទក្រហមកម្ពុជាខេត្តពោធិ៍សាត់ ប្រមូលបានថវិកាសរុប៩៤.៤១០ដុល្លារ ក្នុង នោះលោកឧកញ៉ាជា រតនា ២០.៥០០ ដុល្លារ នេះមិនទាន់គិតអគារអនុសាខាកាកបាទក្រហមកម្ពុជាស្រុកក្រគរ ដែលទើបធ្វើពិធីសម្ពោធនៅព្រឹកថ្ងៃទី២៧ មេសា នោះដែរជាអំណោយរបស់លោកឧកញ៉ាផ្ទាល់ចំនួន៣២.៧០០ ដុល្លារនៅឡើយទេ ៕
ចែករំលែកព័តមាននេះ