ខេត្តកំពង់ឆ្នាំង ៖ សត្វខ្លាត្រីចំនួន៣ក្បាលដែលគេសម្លាប់រួចវះពោះ និងកោសរោមយ៉ាងស្អាត ត្រូវបានគេយកមកដាក់តាំងលក់យ៉ាងសង្ហាតាមបណ្តោយផ្លូវជាតិលេខ ៥ ត្រង់ចំណុចភូមិអូរសណ្តាន់ ឃុំទឹកហូត ស្រុករលាប្អៀរ កាលពីព្រឹកថ្ងៃទី២៧ មេសា ដោយគ្មានក្រែងរអែងឈឺក្បាលវិលមុខនឹងសមត្ថកិច្ចជំនាញណាឡើយ ។
ដោយ មើលទៅហាក់ដូចជាទីផ្សារមួយគ្មានច្បាប់ទម្លាប់ក្នុងការការពារ សត្វព្រៃដែលជិតផុតពូជនេះ កោះសន្តិភាពបានសម្រេចថតរូបមួយប៉ុស្តិ៍ពីរគ្រាន់ចែកអ្នកទស្សនា កម្សាន្ត។ នៅពេលលើកម៉ាស៊ីនថត អ្នកលក់ដឹងខ្លួនក៏នាំគ្នាគេចចេញ និងមិនព្រមផ្តល់ការសម្ភាសន៍នោះឡើយ ។
ប្រជាពលរដ្ឋដែលរស់នៅ ក្បែរនោះនិយាយថា នៅទីនេះស្ទើរជារៀងរាល់ថ្ងៃគាត់តែងឃើញគេដាក់តាំងលក់សត្វ ព្រៃដូចជា សត្វទន្សាយ សត្វពស់ សត្វស្លាបជាច្រើនប្រភេទ សាច់សត្វជ្រូកព្រៃ និងសត្វខ្លាត្រីនេះជាដើម ហើយត្រឹមម៉ោង៨ទៅ៩ព្រឹកគឺអស់ហើយ ។ ដូចថ្ងៃនេះសត្វស្លាបដែលគេចងលក់ទាំងចង្កោមបានលក់អស់តាំងពី ព្រលឹមម៉្លេះ ។ ការដាក់លក់នេះ គឺមិនដែលឃើញមានមន្ត្រីជំនាញណាចុះមកចាប់ ឬហាមឃាត់ឡើយ ។
នៅ ថ្ងៃនោះគេឃើញមានសត្វខ្លាត្រីចំនួន៣ក្បាលដែល២ក្បាលចងព្យួរ លក់ជាប់ផ្លូវជាតិ និង១ក្បាលទៀតគេដាក់ក្នុងរោង ។ សត្វខ្លាត្រី១ក្បាលគេលក់ត្រឹមតម្លៃ៥ម៉ឺនរៀលប៉ុណ្ណោះ ។ គួររំលឹកថា កន្លែងសម្បូរសាច់សត្វព្រៃលក់ច្រើនជាងគេ គឺនៅព្រំប្រទល់រវាងខេត្តកំពង់ឆ្នាំង និងខេត្តពោសាធិ៍សាត់ ៕
ចែករំលែកព័តមាននេះ