រាជធានីភ្នំពេញ ៖ ម៉ូតូស៊េរីទំនើប១គ្រឿងដែលម្ចាស់ជិះទៅចតទុកនៅមុខហាងមួយកន្លែង រួចហើយដើរចូលទៅហូបបាយនៅខាងក្នុងភ្លេចខ្លួន ត្រូវចោរលួចកាច់សោ.កជិះយកទៅបាត់ លុះពេលម្ចាស់ហូបបាយរួចចេញមកវិញបាត់មិនឃើញម៉ូតូទើបមានការភ្ញាក់ផ្អើលឆោឡោប្តឹងឱ្យប៉ូលិសជួយអន្តរាគមន៍ ។ ហេតុការណ៍នេះ បានកើតឡើងកាលពីវេលាម៉ោង១១ព្រឹកថ្ងៃទី២៦ មេសា នៅមុខហាងបាយមួយស្ថិតក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
ម៉ូតូដែលចោរលួចយកទៅបាត់នោះម៉ាកហុងដាឌ្រីមសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ១BH-៨៣១៧ ជាកម្មសិទ្ធិរបស់យុវជនឈ្មោះ វ៉ាន់ រឿន អាយុ២៥ឆ្នាំ ជាកម្មកររោងចក្រ មានទីលំនៅភូមិស្វាយឧត្តម ឃុំសំរោងលើ ស្រុកអង្គស្នួល ខេត្តកណ្តាល ។ តាមម្ចាស់ម៉ូតូឱ្យដឹងថា រូបគេបានជិះម៉ូតូមួយគ្រឿងនោះចេញពីធ្វើការនៅរោងចក្រទៅហូបបាយនៅហាងបាយខាងលើ ។ ពេលទៅដល់រូបគេបានចតម៉ូតូទុកនៅមុខហាងបាយនោះដោយចាក់សោ.កត្រឹមត្រូវ ប៉ុន្តែអត់បានបិទសន្ទះសោទេ បន្ទាប់មកក៏ដើរចូលទៅអង្គុយហូបបាយនៅខាងក្នុង ដោយមិននឹកស្មានថា ម៉ូតូត្រូវចោរលួចឡើយ ។
ប្រភពដដែលបន្តថា លុះពេលហូបបាយរួចដើរចេញមកក្រៅវិញ ស្រាប់តែបាត់មិនឃើញម៉ូតូ ទើបមានការភ្ញាក់ផ្អើលនិងធ្វើដំណើរទៅកាន់ប៉ុស្តិ៍ប៉ូលិសចោមចៅ ដើម្បីប្តឹងឱ្យជួយអន្តរាគមន៍ ៕
ចែករំលែកព័តមាននេះ