រាជធានីភ្នំពេញ ៖ ជនសង្ស័យចោរប្លន់ម្នាក់ក្នុងចំណោមបក្សពួក២នាក់ ត្រូវបាននគរបាលប៉ុស្តិ៍ផ្សារដើមថ្កូវចាប់ខ្លួនបាន កាលពីវេលាម៉ោង១២និង១៥នាទី រំលងអធ្រាត្រ ឈានចូលថ្ងៃទី២៣ មេសា នៅចំណុចផ្លូវលេខ៥១៤ សង្កាត់ផ្សារដើមថ្កូវ ខណ្ឌចំការមន បន្ទាប់ពីរូបគេ និងបក្សពួកបានធ្វើសកម្មភាពភ្ជង់ប្លន់យកម៉ូតូម៉ាកហ្វីណូ ពណ៌សលាយខ្មៅ មួយគ្រឿង ពីនារីម្នាក់មិនបានសម្រេច ហើយត្រូវបក្សពួកគេបាញ់នារីនោះ ចៃដន្យគ្រាប់ប្លាតទៅត្រូវជើងរបស់គេបណ្តាលឱ្យរងរបួសធ្ងន់ ទើបរត់មិនរួចក៏ត្រូវប៉ូលិសចាប់ខ្លួនបានតែម្តង ។
ជនសង្ស័យដែលត្រូវសមត្ថកិច្ចចាប់ខ្លួនបានដោយរបួសធ្ងន់នោះ ឈ្មោះ ម៉ុន សុហាក់ អាយុ២៩ឆ្នាំ ស្នាក់នៅផ្ទះជួល ក្នុងសង្កាត់ទួលសង្កែ ខណ្ឌឫស្សីកែវ ។ មុនពេលត្រូវចាប់ឃាត់ខ្លួន ជនសង្ស័យម្នាក់នេះ បានជិះម៉ូតូម៉ាកស្មាស់ ពណ៌ខ្មៅ មួយគ្រឿងដើរប្លន់ជាមួយបក្សពួកម្នាក់ទៀត ដែលបានរត់គេចខ្លួនបាត់នោះ ។ លុះជិះមកដល់ផ្លូវលេខ៥១៤ សង្កាត់ផ្សារដើមថ្កូវ ខណ្ឌចំការមន បានកៀរម៉ូតូម៉ាកហ្វីណូ ដែលជិះដោយនារីមា្នក់ឈ្មោះ ជឹម សុជាតា អាយុ២១ឆា្នំ ខណៈដែលនារីនោះធ្វើដំណើរត្រឡប់មកពីធ្វើការពេលយប់ឆ្ពោះទៅផ្ទះ ។ ពេលនោះដោយដឹងថា ចោរកំពុងតាមប្លន់ម៉ូតូខ្លួន នារីម្ចាស់ម៉ូតូបានព្យាយាមបង្កើនល្បឿនគេចពីពួកចោរនេះ ទើបចោរបាញ់មួយគ្រាប់សំដៅទៅនាង តែសំណាងល្អមិនត្រូវ ហើយគ្រាប់នោះបានប្លាតទៅត្រូវចំជើងស្តាំរបស់ឈ្មោះ ម៉ុន សុហាក់ របួសធ្ងន់រត់ទៅណាមិនរួច ។ ខណៈនោះដែរ ប៉ូលិសមូលដ្ឋានដែលកំពុងល្បាតពេលឮស្នូរគ្រាប់កាំភ្លើងក៏បានមកដល់ភ្លាមៗក្របួចបានឈ្មោះ ម៉ុន សុហាក់ និងដកហូតបានម៉ូតូមួយគ្រឿងដែលគេជិះធ្វើសកម្មភាព ។ រីឯបក្សពួកម្នាក់ទៀតបានរត់គេចខ្លួនបាត់មុនពេលប៉ូលិសមកដល់ ។
នៅចំពោះមុខសមត្ថកិច្ចឈ្មោះ ម៉ុន សុហាក់ បានសារភាពថា ខ្លួនពិតជាបានធ្វើសកម្មភាពប្លន់ម៉ូតូនារីឈ្មោះ ជឹម សុជាតា ប្រាកដមែនជាមួយបក្សពួកដែលបានរត់គេចខ្លួនជាមួយកាំភ្លើងខ្លីមួយដើម ។បច្ចុប្បន្នជនសង្ស័យខាងលើ ត្រូវបានសមត្ថកិច្ចនគរបាលប៉ុស្តិ៍ផ្សារដើមថ្កូវកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ