រាជធានីភ្នំពេញ ៖ ក្រុមហ៊ុនស៊ីនទ្រីបានសម្តែងនូវការសោកស្តាយចំពោះបញ្ហាកំណើន គំនរសំរាមនៅគ្រប់កន្លែងក្នុងរាជធានីភ្នំពេញដែលធ្វើឲ្យប៉ះពាល់សោភ័ណភាពទីក្រុង និងជា ពិសេសមានការថ្នាំងថ្នាក់ពីប្រជាពលរដ្ឋថែមទៀតក្រោយពីចូលឆ្នាំថ្មីប្រពៃណីខ្មែរបីថ្ងៃរួចមក ។ ប៉ុន្តែក្រុមហ៊ុនបានអះអាងថា នឹងប្រមូលសំរាមដែលគរជិតក្បាលមនុស្សនោះឲ្យមានភាព ប្រក្រតីឡើងវិញនាពេលឆាប់ៗនេះ ។
លោកឧកញ៉ា សេង សាវី ប្រធានក្រុមហ៊ុនស៊ីនទ្រី បានប្រាប់កោះសន្តិភាពថា ក្នុងពិធីចូលឆ្នាំថ្មីប្រពៃណីជាតិគឺការឈប់របស់បុគ្គលិករាប់ ពាន់នាក់ដែលធ្វើឲ្យសេវាកម្មប្រមូលសំរាម២៤ ម៉ោងរបស់ក្រុមហ៊ុនមានការអាក់ខាន ។ ទោះបីជាមានការឧបត្ថម្ភប្រាក់បន្ថែមទៅតាមច្បាប់ យ៉ាងណាក៏ដោយក៏មិនអាចទប់ទៅនឹងទឹកចិត្ត សប្បាយរីករាយចូលឆ្នាំខ្មែររបស់បុគ្គលិកក្រុមហ៊ុនបានឡើយ ។ ក្នុងឆ្នាំនេះបុគ្គលិកបានឈប់ទៅចូលឆ្នំាថ្មីប្រមាណ៧០ភាគរយក្នុងចំណោម បុគ្គលិកប្រមូលសំរាម១.៣០០០នាក់ ។ ការអនុញ្ញាតឲ្យបុគ្គលិកឈប់សម្រាកគឺចាប់តាំងពីថ្ងៃទី ១២ ខែមេសាដល់ថ្ងៃទី១៥ ខែមេសា ហើយទើប ថ្ងៃទី១៦ ខែមេសានេះបុគ្គលិកចាប់មកធ្វើការងារជាបណ្តើរៗ ប៉ុន្តែមកដល់ថ្ងៃនេះនៅតែមិនទាន់មកអស់គ្នាផង ។
លោកឧកញ៉ា សេង សាវី បានបន្តទៀតថា « ក្រុមហ៊ុននឹងរៀបចំគម្រោងប្រមូលសំរាមឲ្យ ហើយនៅថ្ងៃនេះ ដើម្បីឲ្យសម្រេចតាមផែនការនិងដើម្បីឲ្យសោភ័ណភាពទីក្រុងមានភាពប្រក្រតី ឡើងវិញ ។ លោកក៏បានសម្តែងនូវការសោកស្តាយណាស់ដែលតែងតែជោគជ័យរាល់ពេល បុណ្យទានម្តងៗ ទោះបីជាបុណ្យអុំទូក ឬបុណ្យពិសេសម្តងៗ ។ លោកបន្តថា «ក្នុងនាមខ្ញុំជាប្រធានក្រុមហ៊ុនស៊ីនទ្រីសុំការអភ័យទោសសុំការអាស្រ័យទៅលើប្រជាពលរដ្ឋដែលមានការអាក់ អន់ចិត្ត ឬខឹងសម្បាយ៉ាងណាក្តីនោះ។ »
លោកឧកញ៉ាប្រធានក្រុមហ៊ុនស៊ីនទ្រី បានគូសបញ្ជាក់ថា លោកនឹងសហការជាមួយសាលា ក្រុងបន្តទៀតដើម្បីរកវិធានការឬ ធ្វើយ៉ាងណាកុំឲ្យមានការប៉ះពាល់ដល់ប្រជាពលរដ្ឋនាឆ្នាំ ក្រោយដូចឆ្នាំនេះនោះទេ ។ ក្រុមហ៊ុនស៊ីនទ្រីក៏មានគម្រោងក្នុងការបន្ថយបុគ្គលិកឲ្យទៅជាលក្ខណៈបច្ចេកទេសមួយដូចជាប្រើប្រាស់គ្រឿងចក្រឬ គ្រឿងម៉ាស៊ីនមកជំនួស ។ លោកក៏អំពាវនាវឲ្យប្រជាពលរដ្ឋដែលមានរថយន្តចតតាមដងផ្លូវសងខាងមេត្តាអាធ្យាស្រ័យដល់រថយន្តដឹកសំរាមរបស់លោក ដោយធ្វើយ៉ាងណា ជួយសម្រួលឲ្យរថយន្តដឹកសំរាមមានភាពងាយ ស្រួលក្នុងការប្រមូលសំរាមផង ៕
ចែករំលែកព័តមាននេះ