ខេត្តព្រះសីហនុ ៖ ជនបរទេសម្នាក់បានត្រូវប៉ូលិសសហការជាមួយកម្លាំងកងរាជអាវុធហត្ថស្រុកព្រៃនប់ និង ស្រុកស្ទឹងហាវ ឃាត់ខ្លួនបញ្ជូនទៅកាន់ស្នងការដ្ឋានខេត្ត បន្ទាប់ពីជនបរទេសរូបនេះលួចយករថយន្តពីជនជាតិខ្មែរម្នាក់ក្នុងខណៈពេលដែលម្ចាស់ទុករថយន្តរបស់ខ្លួននៅក្នុងចម្ការ មានចម្ងាយប្រមាណជាមួយគីឡូម៉ែត្រពី
ខេត្តព្រះសីហនុ ៖ ជនបរទេសម្នាក់បានត្រូវប៉ូលិសសហការជាមួយកម្លាំងកងរាជអាវុធហត្ថស្រុកព្រៃនប់ និង ស្រុកស្ទឹងហាវ ឃាត់ខ្លួនបញ្ជូនទៅកាន់ស្នងការដ្ឋានខេត្ត បន្ទាប់ពីជនបរទេសរូបនេះលួចយករថយន្តពីជនជាតិខ្មែរម្នាក់ក្នុងខណៈពេលដែលម្ចាស់ទុករថយន្តរបស់ខ្លួននៅក្នុងចម្ការ មានចម្ងាយប្រមាណជាមួយគីឡូម៉ែត្រពីផ្លូវជាតិលេខ៤ ។ ការឃាត់ខ្លួននេះ បានធ្វើឡើងកាលពីវេលាម៉ោង៣និង៣០នាទីរសៀលថ្ងៃទី១៤ មេសា នៅទល់មុខសាលាឃុំទំនប់រលក ស្រុកស្ទឹងហាវ ។
តាមប្រភពព័ត៌មានបានឱ្យដឹងថា ទម្រាំនឹងចាប់ខ្លួនជនបរទេសដែលជាជនសង្ស័យនេះបាន សមត្ថកិច្ចបានប្រើគ្រប់មធ្យោបាយដាក់រថយន្តបាំងផ្លូវដេញប្រកិតពីស្រុកព្រៃនប់ទៅដល់ស្រុកស្ទឹងហាវ រហូតសមត្ថកិច្ចបានផ្ទុះអាវុធជាច្រើនគ្រាប់បាញ់បំបែកកង់រថយន្តថែមទៀត ។ សមត្ថកិច្ចឱ្យដឹងថា ជនបរទេសម្នាក់នេះឈ្មោះ BUGIA SJOSEPHCELAI BORNE ភេទប្រុស អាយុ៤១ឆ្នាំ ជាជនជាតិអាមេរិកស្នាក់នៅបណ្តោះអាសន្នក្នុងសង្កាត់លេខ៤ ក្រុងព្រះសីហនុ បានលួចរថយន្តមួយគ្រឿងម៉ាកវីហ្គោ ពណ៌ខ្មៅ ជារបស់លោក ប្រាក់ សុផល មានទីលំនៅក្នុងខេត្តព្រះសីហនុ ។ លោក ប្រាក់ សុផល បានចតរថយន្តទុកចោលនៅក្នុងចម្ការរបស់ខ្លួនស្ថិតក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ហើយការធ្វើសកម្មភាពលួច គឺនៅវេលាម៉ោង១រសៀល មុនឃាត់ខ្លួនបានប្រមាណជាង២ម៉ោង ។
សមត្ថកិច្ចឱ្យដឹងថា មុនពេលកើតហេតុម្ចាស់រថយន្តបានបើករថយន្តរបស់ខ្លួនមកលេងចម្ការដែលមានចម្ងាយប្រមាណ១គីឡូម៉ែត្រពីផ្លូវជាតិលេខ៤ ។ ពេលចូលមកដល់ ម្ចាស់រថយន្តបានទុករថយន្តនៅក្នុងចម្ការហើយក៏ដើរមើលចម្ការតាមទម្លាប់ធម្មតា លុះបានមួយសន្ទុះជនល្មើសដែលជាជនសង្ស័យខាងលើ បានជិះម៉ូតូមួយគ្រឿងម៉ាកហុងដាត្រៃ មកឈប់ក្បែររថយន្តរួចចូលក្នុងរថយន្តបើកចេញយ៉ាងព្រងើយសំដៅមកភ្នំពេញ តែពេលនោះម្ចាស់រថយន្តបានដឹងក៏រាយការណ៍ទៅសមត្ថកិច្ចស្រុកព្រៃនប់ភ្លាមៗ ។ ជាមួយនឹងព័ត៌មានជាបន្ទាន់ដូចនេះ សមត្ថកិច្ចស្រុកក៏ចាប់ផ្តើមរាយកម្លាំងជាបន្ទាន់ផងដែរ ហើយមិនបានប៉ុន្មានម៉ោងផង ជនល្មើសក៏បើករថយន្តដែលខ្លួនលួចបាននោះមកចំគោលដៅដែលកម្លាំងសមត្ថកិច្ចកំពុងរង់ចាំដោយមានដាក់រថយន្តស៊ីរ៉ែនប៉ូលិសមួយគ្រឿងផងដែរ ។ ឯជនសង្ស័យពេលឃើញដូច្នេះ មិនបានបន្ថយល្បឿនទេ គឺបានបន្ថែមល្បឿនបុកគូទរថយន្តប៉ូលិសដែលដាក់បាំងផ្លូវរួចបើកសំដៅទៅតាមផ្លូវសម្តេចសង្ឃឆ្ពោះទៅស្រុកស្ទឹងហាវ ។
ពេលនោះសមត្ថកិច្ចក៏ដេញតាមយ៉ាងប្រកៀករហូតដល់ទីប្រជុំជនស្រុកស្ទឹងហាវ បានបើកគេចគ្រប់ច្រក ហើយដោយនៅមានភាពរឹងទទឹងមិនព្រមឈប់ សមត្ថកិច្ចក៏សម្រេចចិត្តផ្ទុះអាវុធបាញ់បំបែកកង់រថយន្ត ទើបចាប់ឃាត់ខ្លួនបាន ។តាមប្រភពព័ត៌មានថា ជនបរទេសរូបនេះជាមនុស្សញៀនថ្នាំផងដែរ តែមិនដឹងថាការលួចរថយន្តនេះបម្រុងយកទៅណាទេ ៕
ចែករំលែកព័តមាននេះ