ផឹកស្រវឹងអន់ចិត្តនឹងស្ត្រីបំរើបាញ់២គ្រាប់មុខបៀរហ្គាដិនម្លប់ឫស្សី
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៧:៥១
ជលធា
បៀរហ្គាដិនម្លប់ឫស្សី
រាជធានីភ្នំពេញ ៖ ស្នូរកាំភ្លើងចំនួន២គ្រាប់បានផ្ទុះឡើងកាលពីវេលាម៉ោង១១ និង១៥នាទីយប់ ថ្ងៃទី៧ ខែកញ្ញា បង្កឱ្យមានការភ្ញាក់ផ្អើលនិងភ័យខ្លាចនៅចំណុចមុខហាងបៀរហ្គាដិនម្លប់ឫស្សីស្ថិតនៅតាមផ្លូវលេខ១៩៨៦ សង្កាត់ភ្នំពេញថ្មី ខណ្ឌសែនសុខ ។ ការផ្ទុះអាវុធនេះបង្កឡើងដោយក្រុមជនប្រដាប់អាវុធផឹកស្រវឹង ហើយអន់ចិត្តនឹងស្ត្រីបំរើទើបបាញ់សំដែងឫទ្ធិ ។ ទោះបីជាយ៉ាងណាការផ្ទុះអាវុធនេះសមត្ថកិច្ចខណ្ឌសែនសុខពុំបានបង្ក្រាបឡើយ ។
តាមប្រភពព័ត៌មានឱ្យដឹងថា នៅយប់កើតហេតុគេឃើញជនប្រដាប់អាវុធចំនួន៤នាក់ជិះម៉ូតូគុបជ្រុងពណ៌ទឹកប៊ិចចំនួន២គ្រឿងទៅចូលផឹកស៊ីក្នុងហាងបៀរហ្គាដិនម្លប់ឫស្សី ។
នៅពេលផឹកស្រវឹង ហើយគេឃើញជនទាំង៤នាក់គិតប្រាក់ លុះចេញទៅដល់មុខភោជនីយដ្ឋានបានហៅស្ត្រីបំរើម្នាក់ទៅជួប តែពុំដឹងថា ជួបនិយាយរឿងអ្វីឡើយ ។ បន្តិចមកស្រាប់តែជនម្នាក់ខឹងស្ត្រីរូបនោះ ហើយដកកាំភ្លើងម៉ាកឡុក បាញ់ចំនួន២គ្រាប់ឡើងលើមុនពេលជិះម៉ូតូគេចខ្លួនបាត់ទៅ ។ ភ្លាមនោះសមត្ថកិច្ចដេញតាម ហើយឃើញជននោះជិះចូលផ្ទះឧត្តមសេនីយ៍យោធាម្នាក់ក្នុងខណ្ឌទួលគោក ។ អ្នកបង្កការផ្ទុះអាវុធនោះជាកងរាជអាវុធហត្ថ ។
ហាងបៀរហ្គាដិនម្លប់ឫស្សីមានការផ្ទុះអាវុធចំនួន២លើកហើយ ដោយកាលពីជាង១ខែមុនភ្ញៀវផឹកស្រវឹងបាញ់១គ្រាប់ធ្លាយដំបូល ៕
