ខេត្តបាត់ដំបង ៖ ជនម្នាក់ត្រូវសមត្ថកិច្ចមូលដ្ឋានចាប់ខ្លួនតាមដីកាកាល២សៀលថ្ងៃទី១០ មេសា នៅចំណុចភូមិកកោះ ឃុំកកោះ ស្រុកមោងប្ញស្សីបន្ទាប់ពីរត់ចោលស្រុកជាង២ឆ្នាំ ដោយសារជាប់ពាក់ព័ន្ធនឹងសំណុំរឿងល្បួង នាងក្រមុំម្នាក់យកទៅរំលោភសេពសន្ថវៈនៅក្បែរផ្ទះ ។មន្រ្តីនគរបាលព្រហ្មទណ្ឌផ្នែកអនុវត្តដីកាបានឲ្យដឹងថា ជនត្រូវចោទឈ្មោះញ៉ក់ ស៊ីរ៉ា ហៅហឿម អាយុ២២ឆ្នាំ មានទីលំនៅភូមិទូលព្រំ១ ឃុំកកោះ ស្រុកមោងប្ញស្សី ។ ជននេះបានរត់គេចខ្លួនជាង២ឆ្នាំ ក្រោយពីប្រព្រឹត្តបទល្មើស។
មន្រ្តីដដែលបានប្រាប់ថា ជននេះត្រូវបានចោទប្រកាន់ពីបទ«រំលោភសេពសន្ថវៈ» ដែលប្រព្រឹត្ត កាលពីថ្ងៃទី១៥ មិថុនា ឆ្នាំ២០០៩ នៅភូមិទូលព្រំ១ ឃុំកកោះ ស្រុកមោងប្ញស្សី ហើយត្រូវបានចៅក្រមស៊ើបសួរលោកគឹម រ៉ាវី ចេញដីកាបញ្ជាឲ្យចាប់ខ្លួនលេខ៤៥៩ ចុះថ្ងៃទី៣ មិថុនា ឆ្នាំ២០១០ ក្រោយពេលជននេះមិនព្រមចូលមកបង្ហាញខ្លួនតាមដីកាកោះរបស់តុលាការ ហើយព្យាយាមរត់គេច ។
តាមចម្លើយបំភ្លឺរបស់ជនត្រូវចោទឈ្មោះញ៉ក់ ស៊ីរ៉ា ហៅហឿម បាននិយាយថា នារីដែលប្ដឹងចោទប្រកាន់មកលើខ្លួននោះឈ្មោះហ.ឆ.វ អាយុ១៧ឆ្នាំ រស់នៅក្នុងភូមិជាមួយគ្នា ។ យុវជននេះបានរំលឹកថា កាលណោះពួកខ្លួនមានការព្រមព្រៀងគ្នា ព្រោះខ្លួននិងនាងបានស្រឡាញ់គ្នាដោយចិត្តនិងចិត្តគ្មានអ្នកណាបង្ខំអ្នកណាទេ ។ ញ៉ក់ ស៊ីរ៉ា បានបញ្ជាក់ថា នៅវេលាម៉ោងប្រហែល៨នាយប់នោះខ្លួននិងនាងបានណាត់ជួបគ្នាខាងក្រោយផ្ទះ ហើយបានឱបថើបគ្នាដោយក្ដីស្រឡាញ់ ប៉ុន្តែចង្រៃអីពេលកំពុងតែឱបថើបគ្នាឡើងរមូលសួតនោះ ស្រាប់តែមានគេដើរមកឃើញ ក៏ពួកខ្លួនងើបដើរបែកគ្នា ទៅផ្ទះរៀងៗខ្លួនទៅ ។ ប៉ុន្តែស៊ីរ៉ា បានបញ្ជាក់ត្រង់ចំណុចនេះថា ពួកគេមិនទាន់ឈានដល់ការរួមមេត្រីទេ គ្រាន់តែត្រឹមដំណាក់កាលឱបថើបគ្នាតែប៉ុណ្ណោះ ។ ចំពោះការរត់គេចខ្លួន គឺដោយសារតែក្រុមគ្រួសារនាងប្ដឹង ទើបខ្លួនដាក់មេប្រូចទៅលាក់ខ្លួននៅតំបន់ព្រំដែនខ្មែរសៀមតែម្ដងទៅ លុះត្រឡប់មកផ្ទះវិញចូលគុកល្មម ។
មិនអាចស្វែងរកការបំភ្លឺបន្ថែមពីភាគីខាងដើមបណ្ដឹងបានទេកាលពីព្រឹកថ្ងៃទី១១ មេសា ។ប៉ុន្តែសមត្ថកិច្ចនិយាយថា តាមបណ្ដឹងរបស់នារីរងគ្រោះ គឺជននេះបានល្បួងនាងយកទៅរំលោភរហូតបានសម្រេចតាមការបង្ខំ ហើយនេះគ្រាន់តែជាការឆ្លើយដោះបន្ទុករបស់ជនត្រូវចោទតែប៉ុណ្ណោះ ។ លោកជេត វណ្ណនី ស្នងការរងខេត្ត បានមានប្រសាសន៍ថា ក្រោយពេលប្រព្រឹត្តបទល្មើសជនសង្ស័យបានព្យាយាមរត់គេចខ្លួនទំនងជាស្មានថា អាចរួចផុតពីសំណាញ់ច្បាប់ ប៉ុន្តែការពិតផ្លូវច្បាប់នៅតែរង់ចាំអ្នកប្រព្រឹត្តខុសជានិច្ច ដូចសុភាសិតមួយឃ្លាថា «ជង់មិនភ្លេចទេកុក តែកុកទេដែលចេះតែភ្លេចជង់»ដូច្នេះសំណុំរឿងនេះមិនខុសពីសុភាសិតមួយឃ្លានេះឡើយ៕
ចែករំលែកព័តមាននេះ