ខេត្តតាកែវ ៖ ស្ត្រីម្នាក់បានសន្លប់បាត់ស្មារតី ក្នុងអំពើហិង្សាមួយបង្កដោយប្តីប្រមឹកខួបបានរករឿងជេរបញ្ចោរ និងច្របាច់.ករួចដាល់កញ្ចឹង.ក និងមុខ រហូតសន្លប់រួចរត់គេចខ្លួនបាត់ស្រមោល ។ ហេតុការណ៍ប្តីប្រមឹកវាយប្រពន្ធដោយចេតនារហូតសន្លប់បាត់ស្មារតីនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី៨ មេសា ២០១២ ស្ថិតនៅភូមិខ្វាវ ឃុំខ្វាវ ស្រុកទ្រាំង ។
នៅក្នុងមន្ទីរពេទ្យបង្អែកខេត្តតាកែវ ស្ត្រីរងគ្រោះឈ្មោះកប ស្រីល័ក្ខ អាយុ១៩ឆ្នាំ បានឱ្យដឹងថា ប្តីរបស់ខ្លួនឈ្មោះយាន ឡុង អាយុ២៧ឆ្នាំ រៀបការជាប្តីប្រពន្ធនឹងគ្នា ទើបតែជិត១ឆ្នាំមិនទាន់មានកូននៅឡើយទេ ។ ស្ត្រីរងគ្រោះបន្តថា ពេលចាប់ដៃគ្នាជាប្តីប្រពន្ធដំបូងប្តីរបស់នាងមានចរិតសុភាពរាបសារមិនចេះផឹកស៊ីអ្វីឡើយ លុះមិនយូរប៉ុន្មានលោកប្តីក៏ចេះផឹកស៊ីស្រវឹងរាល់ថ្ងៃ មិនដែលខានឡើយ ហើយពេលត្រឡប់ចូលដល់ផ្ទះវិញចាប់ផ្តើមរករឿងឈ្លោះប្រកែកមិនដឹងមូលហេតុ ។
ស្ត្រីរងគ្រោះបានបន្តទៀតថា នៅថ្ងៃកើតនៅពេលប្តីប្រមឹកត្រឡប់ចូលផ្ទះបានជេរបញ្ចោរប្រពន្ធរួចបានស្ទុះមកច្របាច់.ក ប្រវាយប្រតប់គ្នាតែម្តង ។ ប្តីប្រមឹកមិនប្រណីបានដាល់នាងរហូតសន្លប់ហើយត្រូវក្រុមគ្រួសារបញ្ជូនមកសង្គ្រោះនៅមន្ទីរពេទ្យ ពេលនេះលោកប្តីរត់គេចខ្លួនបាត់ហើយ ៕
ចែករំលែកព័តមាននេះ