រាជធានីភ្នំពេញ ៖ ម៉ូតូឌ្រីមសេ១២៥ ពណ៌ខ្មៅ ២គ្រឿងបុកគ្នាដួលខ្ទាតចេញពីគ្នា ដោយសារមានរថយន្ដមួយគ្រឿងបើកទៅប៉ះជើងធ្វើឱ្យដួលម៉ូតូអូសទៅប៉ះម៉ូតូមួយគ្រឿងទៀត បណ្ដាលឱ្យដួលរងរបួសធ្ងន់ម្នាក់ និងស្រាល៤នាក់ ស្រីម្នាក់ ប្រុស៣នាក់ ចំណែករថយន្ដបើករត់គេចបាត់។ ហេតុការណ៍នេះកើតឡើងកាលពីវេលាម៉ោង៦និង៣០នាទីល្ងាចថ្ងៃទី៨ មេសា នៅលើកំណាត់ផ្លូវជាតិលេខ៣ ស្ថិតក្នុងភូមិវត្ដស្លែង សង្កាត់ពងទឹក ខណ្ឌដង្កោ ។
បើតាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុមានម៉ូតូ២គ្រឿងជិះស្របទិសគ្នាពីកើតទៅលិច ក្នុងនោះម៉ូតូឌ្រីមសេ១២៥ ស៊េរី២០០៧ ពណ៌ខ្មៅ ជិះគ្នា៣នាក់ ជាមនុស្សប្រុស និងម៉ូតូឌ្រីមសេ១២៥ ស៊េរី២០០៥ ពណ៌ខ្មៅ ជិះ២នាក់ប្ដីប្រពន្ធ។ ខណៈមកដល់ចំណុចកើតហេតុ ស្រាប់តែមានរថយន្ដមួយគ្រឿងមិនចាំម៉ាកបើកក្នុងទិសដៅបញ្ច្រាសគ្នា ហើយបើកវ៉ាគ្នាជាមួយរថយន្ដមួយគ្រឿងទៀត ក៏ជ្រុលទៅកៀរជើងឆ្វេងបុរសម្នាក់ដែលកំពុងជិះម៉ូតូ គ្នា៣នាក់ បណ្ដាលឱ្យដួលម៉ូតូអូសទៅបុកម៉ូតូមួយគ្រឿងទៀតជិះគ្នា២នាក់ប្ដីប្រពន្ធដួលរងរបួសតែម្តង ។
ប្រភពដដែលបន្ដទៀតថា ក្រោយពេលកើតហេតុរថយន្ដបង្កបានបើករត់គេចបាត់ស្រមោល នៅសល់តែជនរងគ្រោះ៥នាក់ ក្នុងនោះរបួសធ្ងន់បាក់ភ្លៅឆ្វេងម្នាក់ និងរបួសស្រាល៤នាក់ ប្រុស៣នាក់ ស្រីម្នាក់ ចំណែកម៉ូតូខូចខាតតិចតួច។ ជនរងគ្រោះរបួសធ្ងន់ត្រូវរថយន្ដសង្គ្រោះគ្លីនិកឯកជនដឹកយកទៅព្យាបាល ហើយម៉ូតូទាំង២គ្រឿងត្រូវសមត្ថកិច្ចយកទៅរក្សាទុកដើម្បីធ្វើការដោះស្រាយ៕
ចែករំលែកព័តមាននេះ