រាជធានីភ្នំពេញ ៖ រថយន្តកាម៉ាស្សជ្រុលទៅបុកម៉ូតូហ្វ៊ីណូ ពីក្រោយពេលជិះគ្នា៣នាក់ គឺប្តីឌុបប្រពន្ធ និងកូនៗទៅផ្សារដីហុយរកទិញកាបូប បណ្តាលឱ្យកូនប្រុសអាយុ២ឆ្នាំស្លាប់ ចំណែកប្តី-ប្រពន្ធ និងកូនស្រីអាយុ៨ឆ្នាំរងរបួសធ្ងន់ត្រូវគេបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍នេះកើតឡើងកាលពីវេលាម៉ោង៦និង១៥នាទីយប់ថ្ងៃទី៦ មេសា នៅតាមបណ្តោយផ្លូវភ្នំពេញ-ហាណូយ ក្នុងសង្កាត់ភ្នំពេញថ្មី ខណ្ឌសែនសុខ ។ យោងតាមជនរងគ្រោះឈ្មោះចាន់ ម៉ារីន អាយុ៤៥ឆ្នាំ ជាអ្នកបកប្រែខ្សែភាពយន្ត ស្នាក់នៅផ្ទះលេខ១៧៩ ផ្លូវ១៥៦ សង្កាត់ទឹកល្អក់២ ខណ្ឌទួលគោក ឱ្យដឹងថា លោកឌុបប្រពន្ធ និងកូនតូចៗ២នាក់ទៅទិញកាបូបឱ្យកូនស្រីអាយុ៨ឆ្នាំសម្រាប់ដាក់សៀវភៅទៅរៀន តែជាអកុសលមិនទាន់ទៅដល់ផ្សារផងក៏ត្រូវរថយន្តកាម៉ាស្សបើកបុកពីក្រោយពេញទំហឹង បណ្តាលឱ្យកូនប្រុសឈ្មោះចាន់ ជីមី អាយុ២ឆា្នាំស្លាប់ភ្លាមនៅកន្លែងកើតហេតុ ឯលោកនិងប្រពន្ធ ព្រមទាំងកូនស្រីអាយុ៨ឆ្នាំរងរបួសធ្ងន់ ។
រថយន្តបង្កនិងម៉ូតូរបស់ជនរងគ្រោះ ត្រូវប៉ូលិសចរាចររាជធានីភ្នំពេញយកទៅរក្សាទុកដើម្បីដោះស្រាយ ៕
ចែករំលែកព័តមាននេះ