ខេត្តកំពង់ចាម ៖ យុវជនល្មោភកាមម្នាក់ឈ្មោះយេន យាង អាយុ១៧ឆ្នាំ រស់នៅភូមិបង្ហើរខ្លែង ឃុំត្រពាំងព្រីង ស្រុកតំបែរ សូម្បីតែក្មេងស្រីអាយុទើបតែ៧ឆ្នាំ រស់នៅឃុំស្រុកជាមួយគ្នាក៏មិនប្រណីដែរ បានចាប់រំលោភសេពសន្ថវៈជាបន្តបន្ទាប់ដល់ទៅ២លើក ហើយត្រូវម្តាយក្មេងស្រីប្តឹងសមត្ថកិច្ចមូលដ្ឋានឱ្យចាប់ខ្លួនបញ្ជូនទៅកាន់ស្នងការដ្ឋាននគរបាលខេត្ត និងបំពេញបែបបទបញ្ជូនទៅសាលាដំបូងខេត្ត ។
តាមលោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្តប្រាប់ឱ្យដឹងថា ស្ត្រីជាម្តាយក្មេងស្រីរងគ្រោះបានមកប្តឹងប៉ុស្តិ៍រដ្ឋបាលត្រពាំងព្រីងកាលពីព្រឹកថ្ងៃទី៣ មេសា ២០១២ ដើម្បីឱ្យជួយអន្តរាគមន៍តាមចាប់ជនសង្ស័យឈ្មោះយាង ដែលបានធ្វើសកម្មភាពលួចចាប់កូនស្រីរបស់គាត់ឈ្មោះ «ឃ.ស.ណ» អាយុ៧ឆ្នាំ រំលោភសេពសន្ថវៈបានដល់ទៅ២លើក ខណៈដែលរូបគាត់មិននៅផ្ទះចេញទៅចម្ការបាត់ ។
ស្ត្រីបន្តឱ្យដឹងថា នៅវេលាម៉ោង៣និង៥០នាទីរសៀលថ្ងៃទី២ មេសា កូនស្រីរបស់គាត់ប្រាប់ថា ឈ្មោះយាង បានចាប់នាងរំលោភសេពសន្ថវៈដល់ទៅ ២លើក ក្នុងនោះគ្រាន់តែចាំបានលើកចុងក្រោយនៅថ្ងៃទី១ មេសា ២០១២ វេលាម៉ោង៧និង៣០នាទីព្រឹកនៅលើផ្ទះរបស់គាត់ ខណៈដែលរូបគាត់ និងប្តីចេញទៅចម្ការបាត់ក៏ប្តឹងប៉ូលិសឱ្យឃាត់ខ្លួនតែម្តង ៕
ចែករំលែកព័តមាននេះ