រាជធានីភ្នំពេញ ៖ លំនៅឋានមន្ត្រីយោធា និងជាកងអង្គរក្សម្នាក់ត្រូវក្រុមចោរគាស់ផ្ទះលួចឆ្កឹះសោសូឡិចចូលរើកកាយក្នុងទូរយកប្រាក់និងគ្រឿងអលង្ការដាំពេជ្រសរុបជាទឹកប្រាក់ប្រមាណ២ម៉ឺនដុល្លារ នៅពេលដែលម្ចាស់ចាក់សោផ្ទះទុកចោល ហើយចេញដំណើរទៅធ្វើបុណ្យឆេងម៉េង នៅភូមិកំពង់ស្ពឺ ឃុំកំពង់រាប ស្រុកកោះសូទិន ខេត្តកំពង់ចាម បានធ្វើឱ្យមានការភ្ញាក់ផ្អើល កាលពីវេលាម៉ោង៥ទៀបភ្លឺថ្ងៃទី៣ មេសា នៅពេលដែលអ្នកជិតខាងបានក្រោកឆុងកាហ្វេ ហើយឃើញទ្វារផ្ទះបើកចំហរ ទើបមានការឆោឡោ ។
លំនៅឋានដែលចោរគាស់ទ្វារនេះ ស្ថិតនៅ ក្រុមទី៣ ភូមិខ១ សង្កាត់ច្រាំងចំរេះទី២ ខណ្ឌប្ញស្សីកែវ ដែលមានម្ចាស់ផ្ទះឈ្មោះ ឡេង ឡៃជាក់ ភេទប្រុស អាយុ២៩ឆ្នាំ ជាមន្ត្រីយោធា និងជាកងអង្គរក្ស និងប្រពន្ធឈ្មោះ ហាក់ ស៊ូម៉េង អាយុ១៩ឆ្នាំ ។ គេពុំដឹងថា ចោរមានគ្នាប៉ុន្មាននាក់និងធ្វើសកម្មភាពតាំងពីពេលណានោះទេ ។
តាមការត្រួតពិនិត្យ សោសូឡិចចាក់ទ្វាររបងនិងទ្វារផ្ទះត្រូវចោរឆ្កឹះគូទផ្តាច់ បើកទ្វារចូលក្នុងផ្ទះ ហើយបន្ទប់ចំនួន៣ និងទូរចំនួន៤ត្រូវចោរគាស់សោរើកកាយជជុះខោអាវតាមចិត្តរកគ្រឿងអលង្ការនិងប្រាក់មានតម្លៃ។ ទោះបីជាយ៉ាងណាម៉ូតូធំម៉ាកហ្សេតអ៊ែរ របស់អង្គរក្សមួយគ្រឿងពុំត្រូវចោរយកឡើយ ។
តាមព័ត៌មានឱ្យដឹងថា កាលពីវេលារសៀលថ្ងៃទី១ មេសា ឆ្នាំ២០១២ ម្ចាស់ផ្ទះរូបនោះព្រមទាំងភរិយាបានជិះរថយន្តធ្វើដំណើរទៅសែនផ្នូរ(ឆេងម៉េង) នៅស្រុកកោះសូទិន ខេត្តកំពង់ចាម ដោយចាក់សោផ្ទះទុកចោល ព្រោះអាងសោម៉ាកសូឡិចរឹងមាំ ។
ក្រោមការត្រួតពិនិត្យរបស់សមត្ថកិច្ច សោសូឡិចចំនួន២ដែលចោរឆ្កឹះរបើកហើយទុកចោល ត្រូវបានសមត្ថកិច្ចដកហូត ។
តាមសម្តីម្ចាស់ផ្ទះលោក ឡេង ឡៃជាក់ ដែលទើបតែត្រឡប់ដល់ផ្ទះបានឱ្យដឹងថា គ្រឿងអលង្ការដែលចោរប្រមូលយករួមមាន ខ្សែកមាសចំនួន២ខ្សែ មានទម្ងន់៤តម្លឺង ខ្សែកប្លាកទីនចំនួន៤ខ្សែមានទម្ងន់ប្រមាណ២តម្លឺងមានដាំត្បួងពេជ្រ កងដៃប្លាកទីនដាំពេជ្រមួួយគូ ចិញ្ចៀនពេជ្រ ២វង់និងប្រាក់ជាង១.០០០ដុល្លារ សរុបជាទឹកប្រាក់ប្រមាណ២ម៉ឺនដុល្លារ ។ ម្ចាស់ផ្ទះរូបនោះបានបន្តទៀតថា មុនដំបូងខ្លួនប្រុងទៅស្រុកតែមួយយប់ទេ តែចង់សម្រាកឱ្យបាត់ហត់ ក៏ស្នាក់នៅរហូត២យប់ ទើបត្រឡប់មកវិញ ស្រាប់តែម្តាយទូរស័ព្ទប្រាប់ថា ចោរគាស់ផ្ទះយកអស់ហើយ ៕
ចែករំលែកព័តមាននេះ