រាជធានីភ្នំពេញ ៖ បច្ចុប្បន្នគេសង្កេតឃើញថា មានសិល្បករ សិល្បការិនីសម័យ-បុរាណជាច្រើនដែលដុះចេញពីខេត្តតាកែវភាគច្រើនបានបន្តវេនពីវង្សត្រកូលតាំងពីជីតារហូតដល់ចៅ ចៅទួត។ ជាពិសេសនោះអ្នកល្ខោនយីកេតែម្តង ជាក់ស្តែងដូចជាអ្នកស្រី ឃី សាខន ក្នុងវ័យ៤៣ឆ្នាំ មានស្រុកកំណើតនៅភូមិសំរោង ឃុំបឹងក្រាំង ស្រុកសំរោង ខេត្តតាកែវ ដែលមានឪពុកឈ្មោះ យុង សារឿន ម្តាយឈ្មោះ ឃី មុំ ត្រូវជាចៅស្រីលោកតាឃី អ្នកបង្កើតក្រុមល្ខោនយីកេតាឃីពីសម័យមុន ។
អ្នកស្រី ឃី សាខន មានបងប្អូន៩នាក់តែស្លាប់អស់៥នាក់ (ប្រុស៣ សី្រ២ )នៅសល់៤នាក់ប្រុស៣ស្រីម្នាក់ គឺរូបអ្នកស្រីជាកូនទី៨ ។ បងៗដែលស្លាប់នោះសុទ្ធតែស្លាប់ក្នុងសម័យប៉ុលពត។ អ្នកស្រី ឃី សាខន បានរៀបរាប់ពីជីវិតសិល្បៈចម្រុះ សម័យ-បុរាណ ឱ្យអ្នកព័ត៌មានកោះសន្តិភាពបានដឹងថា ដោយសារតែអ្នកស្រីមានឈាមជ័រសិល្បៈតាំងពីជីតារហូតដល់ម្តាយមក អ្នកស្រីដឹងក្តីកាលណាក៏មាននិស្ស័យស្រឡាញ់ ហើយផ្ចង់អារម្មណ៍ផ្តោតទៅលើសិល្បៈពេលនោះ អ្នកស្រីតែងតែដើរតាមម្តាយជាអ្នកល្ខោនយីកេ ពេលចេញសម្តែង ហើយអ្នកស្រីក៏បានហ្វឹកហាត់រៀនសូត្រពីម្តាយ(លោកយាយឃី មុំ)។
នៅឆ្នាំ១៩៨៤ អ្នកស្រីបានចូលរៀនសិល្បៈនៅសាកលវិទ្យាល័យភូមិន្ទវិចិត្រសិល្បៈរហូតបានប្រឡងជាប់មធ្យមសិក្សាក៏ចូលធ្វើការនៅនាយកដ្ឋានសិល្បៈទស្សនីយភាពនឹងចេញសម្តែងល្ខោនបាសាក់ល្ខោនយីកេជាមួយក្រុមសាលា។ ក្រោយមកនៅឆ្នាំ១៩៨៨ អ្នកស្រីក៏បានចូលប្រឡងចម្រៀងសម័យក្នុងកម្មវិធីរបស់ស្ថានីយទូរទស្សន៍ជាតិកម្ពុជាជាមួយលោកព្រម្មា សីុវុទ្ធី ដោយកាលនោះអ្នកស្រីប្រឡងជាប់ចំណាត់ថ្នាក់លេខ១ ផ្នែកចម្រៀងសម័យ។ ក្រោយពីប្រឡងជាប់អ្នកស្រីឃី សាខន ក៏ចាប់អាជីពជាអ្នកចម្រៀងសម័យមួួយមុខទៀតពីលើអាជីពជាអ្នកល្ខោនបាសាក់-យីកេ ។ អ្នកស្រី ឃី សាខន បន្តថា កាលនោះអ្នកស្រីច្រៀងថតសំឡេងឱ្យផលិតកម្ម អង្គរធំ ឥន្ទធនូ ហេងហេង និងផលិតកម្មឆ្លងដែនជាច្រើនទៀត ។
ជាការពិតណាស់គេនៅចាំបានថា អ្នកស្រីឃី សាខន មានកេរ្តិ៍ឈ្មោះល្បីតាមរយៈបទ «ស្រអែមមាសបង» ដែលមានលោកឃួន ថន និងលោកសាស្ត្រាចារ្យ ឯល ប៊ុនណា ជាអ្នកនិពន្ធ ទំនុកច្រៀង និងបទភ្លេង ។ អ្នកស្រី ឃី សាខន មានជំនាញជាច្រើនដូចជា ល្ខោនបាសាក់ ល្ខោនយីកេ កំណាព្យ ចម្រៀង និងចម្រៀងសម័យចម្រុះ ដូច្នេះកន្លងមក ក្រោយច្រៀងក្នុងកម្មវិធីផ្សេងៗ អ្នកស្រីបានច្រៀងថតសំឡេងចូលសីុឌី និងម្តងម្តាលគេតែងឃើញអ្នកស្រីឡើងច្រៀងជាកិត្តិយសនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាទៀតផង ។
ទាក់ទងជីវិតផ្ទាល់ខ្លួនអ្នកស្រីបានរៀប ការនាឆ្នាំ១៩៩១ ជាមួយតន្ត្រីករម្នាក់ឈ្មោះ សេង ឌី (កាន់ឧបករណ៍ផ្លុំសាក់សូ) តែគាត់បានស្លាប់ច្រើនឆ្នាំហើយ ។ អ្នកស្រី ឃី សាខនមានកូនស្រីម្នាក់ឈ្មោះ សេង ណាលីន ជាអ្នកសិល្បៈសម្តែងល្ខោនយីកេ និងច្រៀងសម័យដូចអ្នកស្រីដែរ។ សព្វថ្ងៃអ្នកស្រីរស់នៅក្នុងសង្កាត់ទន្លេបាសាក់់ ខណ្ឌចំការមន។ ក្រៅពីអាជីពជាអ្នកសិល្បៈចម្រុះ អ្នកស្រីក៏ជាមន្ត្រីរាជការក្នុងនាយកដ្ឋានសិល្បៈទស្សនីយភាពនៃក្រសួងវប្បធម៌ និងវិចិត្រសិល្បៈផង ៕
ចែករំលែកព័តមាននេះ