រាជធានីភ្នំពេញ ៖ រថយន្ដឡិចស៊ីស៤៧០ ពណ៌ខ្មៅ មួយគ្រឿងរវល់និយាយទូរស័ព្ទបើកទៅបុករបាំងចែកផ្លូវបាក់អស់១៣កង់ពោបពីលើជាប់ កាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃទី៣ មេសា តាមបណ្ដោយវិថីម៉ៅសេទុង ខាងត្បូងស្ដុប ទេពផនប្រមាណ៣០ម៉ែត្រ ក្នុងសង្កាត់ទឹកល្អក់ទី៣ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា រថយន្ដឡិចស៊ីស៤៧០ ពណ៌ខ្មៅ បើកបរដោយបុរសម្នាក់ តាមវិថីម៉ៅសេទុង ពីជើងទៅត្បូង ខណៈកំពុងតែបើកនិយាយទូរស័ព្ទបណ្ដើរ ស្រាប់តែជ្រុលទៅបុករបាំងចែកផ្លូវ បណ្ដាលឱ្យបាក់អស់១៣កង់ ។
ក្រោយពេលកើតហេតុម្ចាស់រថយន្ដបានទូរស័ព្ទ ហៅមិត្ដភក្ដិមកដល់យកជើងឆ័ត្រកល់កង់រថយន្ដបម្រុងនាំគ្នាសែងរថយន្ដចេញពីទ្រូងថ្នល់តែត្រូវសមត្ថកិច្ចឃាត់មិនឱ្យយកចេញទេ រង់ចាំសមត្ថកិច្ចជំនាញស្ទូចយកទៅរក្សាទុកនៅសាលារាជធានីភ្នំពេញ ដើម្បីធ្វើការដោះស្រាយ។ ចំណែកអ្នកបើកបរបានឡើងជិះរថយន្ដមិត្ដភក្ដិចេញទៅបាត់ ៕
ចែករំលែកព័តមាននេះ