រាជធានីភ្នំពេញ ៖ ដើម្បីទាមទារការបញ្ជាក់ចិត្តស្មោះពីសង្សារដែលតែងតែធ្វើឱ្យនាងខកចិត្ត និងប្រេះឆាបេះដូងម្តងហើយម្តងទៀត នារីម្នាក់បានលេបថ្នាំយ៉ាស៊ីប៉ាមអស់៧០គ្រាប់ ដើម្បីធ្វើអត្តឃាត តែត្រូវបុរសជាសង្សារជួយ សង្គ្រោះទាន់ពេល ហើយយកចិញ្ចៀនទៅបំពាក់ឱ្យនាងនៅក្នុងមន្ទីរពេទ្យទៀតផង ដើម្បីរំលត់ការមន្ទិលសង្ស័យរបស់នាង ។ ហេតុការណ៍នេះ បានកើតឡើងកាលពីវេលាម៉ោង១១ព្រឹក ថ្ងៃទី២៨ មីនា នៅផ្ទះជួលមួយក្នុងសង្កាត់ទួលទំពូង ខណ្ឌចំការមន។
នារីដែលព្យាយាមធ្វើអត្តឃាត ដើម្បីទាមទារភក្តីភាពពីប្រុសកំពូលស្នេហ៍នេះឈ្មោះ ជិន សុខដាវី អាយុ២៧ឆ្នាំ កំពុងរៀនកាត់ដេរខោអាវម៉ូដ ស្នាក់នៅក្នុងផ្ទះជួលខាងលើ និងមានស្រុកកំណើតនៅខេត្តកំពង់ចាម ។ នាងបានបង្ហើបទាំងលាក់លៀមថា នាងជានិស្សិតពេទ្យឆ្នាំទី២ រៀននៅខេត្តកំពង់ចាម តែបានឈប់រៀនហើយ មកធ្វើការរោងចក្រនៅភ្នំពេញ លុះបច្ចុប្បន្ននាងបានឈប់ធ្វើការតាមរោងចក្រ មករៀនកាត់ដេរខោអាវម៉ូដវិញម្តង ។
ទាក់ទិននឹងមូលហេតុនៃការលេបថ្នាំនេះ នាងបានបង្ហើបថា នាងមានសង្សារជាអ្នករត់តាក់ស៊ីភ្នំពេញ-កំពង់ស្ពឺ និងមានស្រុកកំណើតនៅខេត្តកំពង់ស្ពឺ ដោយស្គាល់គ្នារយៈពេលជាង១ឆ្នាំហើយ ប៉ុន្តែសង្សាររបស់នាងចេះតែមានស្រីថ្មីជាញឹកញាប់ ។ លើសពីនេះទៀត ឪពុកម្តាយសង្សាររបស់នាងក៏មិនពេញចិត្តនឹងនាង ហើយព្យាយាមបំបែកពួកនាងរហូត ទើបធ្វើឱ្យនាងពិបាកចិត្តខ្លាំងពេកក៏ដាច់ចិត្តយកថ្នាំយ៉ាស៊ីប៉ាម មួយកំប៉ុងចំនួន៧០គ្រាប់លេបក្នុងបំណងធ្វើអត្តឃាត ។ ក្រោយពីលេបបានមួយសន្ទុះ សង្សារនាងមករក ទើបនាងប្រាប់ថាលេបថ្នាំ ។ ក្រោយពេលសង្សារដឹងថានាងលេបថ្នាំ ក៏ដឹកនាងយកទៅសង្គ្រោះនៅមន្ទីរពេទ្យព្រះកុសុមៈទាំងសន្លប់ស្តូកស្ទឹង ។ ពេលទៅដល់មន្ទីរពេទ្យគ្រូពេទ្យបានលាងក្រពះដើម្បីបន្សាបជាតិថ្នាំនៅក្នុងខ្លួន ធ្វើឱ្យនាងបានធូរស្រាលឡើងវិញ ។ បន្ទាប់ពីបានធូរស្រាលហើយនាងបានឱ្យដឹងថា គ្រួសាររបស់នាងមានជីវភាពសមរម្យ មិនមានការខ្វះខាតអ្វីទេ ប៉ុន្តែនាងចេះតែពិបាកចិត្ត ហើយកន្លងមកនាងបានព្យាយាមសម្លាប់ខ្លួនជាច្រើនលើកច្រើនសាមកហើយ ប៉ុន្តែមិនស្លាប់ មិនតែប៉ុណ្ណោះ កាលពីនាងនៅតូចឧស្សាហ៍ធ្លាក់ពីលើកាំជណ្តើរជាញឹកញាប់ដែរ ។ នៅក្នុងបន្ទប់សង្គ្រោះបន្ទាន់នៃមន្ទីរពេទ្យ បន្ទាប់ពីនាងត្រូវបានសង្គ្រោះធូរស្រាលបន្តិច បុរសជាសង្សារនោះបានយកចិញ្ចៀនបញ្ចាំចិត្តទៅបំពាក់ឱ្យនាង ដើម្បីបញ្ជាក់ចិត្តស្មោះដែលរូបគេមានចំពោះនាង ។ មុននឹងបំពាក់ចិញ្ចៀនបុរសនេះបាននិយាយខ្សឹបៗថា «បងមានចិត្តស្មោះចំពោះអូនតែម្នាក់» ប៉ុន្តែពេលដែលឃើញមានអ្នកសារព័ត៌មានចាំផ្តិតយករូបភាពនោះ ធ្វើឱ្យបុរសជា សង្សារអៀនក៏ដកចិញ្ចៀនពីចង្អុលដៃរបស់នាងយកទៅទុកក្នុងហោប៉ៅវិញ រង់ចាំឱកាសល្អទើបបំពាក់ឱ្យនាងបានស្ងប់ចិត្ត ។
គួរកត់សម្គាល់ផងដែរថា គ្រូពេទ្យបានធ្វើការណែនាំដល់នារីដែលលេបថ្នាំប៉ងធ្វើអត្តឃាតនេះ ឱ្យឈប់ប្រព្រឹត្តបែបនេះតទៅទៀត ព្រោះធ្វើឱ្យប៉ះពាល់ដល់ប្រព័ន្ធប្រសាទ និងប៉ះពាល់ដល់សុខភាពទៅថ្ងៃអនាគត ។ ដូច្នេះគួរតែចៀសវាងវិធីលេបថ្នាំប៉ុនប៉ងធ្វើអត្តឃាតបែបនេះជាដាច់ខាត ៕
ចែករំលែកព័តមាននេះ