រាជធានីភ្នំពេញ ៖ ក្នុងគោលបំណងលើកកម្ពស់គុណភាពវិស័យកីឡាវាយកូនឃ្លីលើតុនៅក្នុងប្រទេសកម្ពុជា ឱ្យមានការរីកចម្រើន ក៏ដូចជារួមចំណែកក្នុងការលើកកម្ពស់ផ្នែកសុខុមាលភាពរបស់ប្រជាពលរដ្ឋខ្មែរទៀតផងនោះ ក្លឹបវាយប៉េងប៉ុងទួលស្វាយព្រៃថ្មី ដែលមានទីតាំងស្ថិតនៅដីឡូត៍លេខ៥ ផ្លូវលេខ៥៦៦ សង្កាត់បឹងកក់១ ខណ្ឌទួលគោក បានសហការជាមួយសហព័ន្ធកីឡាវាយកូនបាល់កម្ពុជា រៀបចំឱ្យមានព្រឹត្តិការណ៍ប្រកួតកីឡាវាយកូនឃ្លីលើតុដណ្តើមពានរង្វាន់ក្លឹបទួលស្វាយព្រៃថ្មី ជាលើកទី១ ប្រចាំឆ្នាំ២០១២ ។
លោកស្រេង វ៉ាន់ថាន ប្រធានក្លឹបទួលស្វាយព្រៃថ្មី បានមានប្រសាសន៍ឱ្យដឹងថា ដោយលោកមានបំណងចង់ឱ្យកម្មវិធីនេះប្រព្រឹត្តទៅបានរលូន ហើយក៏ចង់ឱ្យមានអ្នកមកចូលរួមបានច្រើនទៀតផងនោះ ទើបគណៈកម្មការរៀបចំការប្រកួតជាលើកទី១ របស់ក្លឹបមិនកំណត់លក្ខខណ្ឌអ្វីស្មុគស្មាញដល់អ្នកមកចុះឈ្មោះចូលរួមឡើយ ពោលគឺក្មេងក៏បានចាស់ក៏បានដែរ មិនមានការបែងចែកអាយុឡើយ ។ ឯការប្រកួតចែកចេញជា២វិញ្ញាសា គឺប្រកួតជាក្រុម និងឯកត្តជន ។ លោកបានរៀបចំរង្វាន់សម្រាប់ផ្តល់ជូនផងដែរ គឺប្រកួតជាក្រុម លេខ១ ទទួលបាន១លានរៀល លេខ២ ៦០ម៉ឺនរៀល និងលេខ ៤០ម៉ឺនរៀល ។
ឯប្រកួតជាឯកត្តជនវិញលេខ១ទទួលបាន៦០ម៉ឺនរៀល លេខ២ ៤០ម៉ឺនរៀល និងលេខ៣ ២០ម៉ឺនរៀល ។ ក្លឹបក៏មានកម្មវិធីពិសេសមួយទៀត គឺអ្នកដែលជាប់លេខ១ ទាំង២វិញ្ញាសានេះអាចមកលេងមិនគិតថ្លៃរយៈពេល៣ខែ លេខ២ បាន២ខែ និង៣បាន១ខែ ។ លោកស្រេង វ៉ាន់ថាន មានគម្រោងរៀបចំឱ្យមានព្រឹត្តិការណ៍បែបនេះ ក្នុង១ឆ្នាំ៤ដង ប៉ុន្តែលើកក្រោយ គឺមានការបែងចែកអាយុឱ្យបានច្បាស់លាស់ជាងនេះ ។
លោកស៊ុន សុទ្ធារិទ្ធ អគ្គលេខាធិការនៃសហព័ន្ធកីឡាវាយកូនឃ្លីលើតុកម្ពុជា បានថ្លែងនូវការកោតសរសើរយ៉ាងខ្លាំងចំពោះក្លឹបប៉េងប៉ុងទួលស្វាយព្រៃថ្មី ដែលមានគំនិតផ្តួចផ្តើមបែបនេះឡើង ។ លោកបានបញ្ជាក់ឱ្យដឹងផងដែរថា បច្ចុប្បន្នសហព័ន្ធកំពុងតែខិតខំជំរុញយ៉ាងខ្លាំងធ្វើយ៉ាងណាផ្តល់ឱកាសឱ្យបានច្រើនសម្រាប់ក្មេងៗស្រករក្រោយដែលជាទំពាំងស្នងឫស្សី ហើយលោកបានសំណូមពរឱ្យក្លឹបបង្កើតឱ្យមានការប្រកួតសម្រាប់ក្មេងៗផងដែរ ជាពិសេសសម្រាប់សិស្សសាលាតែម្តង ៕
ចែករំលែកព័តមាននេះ