រាជធានីភ្នំពេញ ៖ ផាន់ សារុន មកពីក្លឹបគជសារកីឡា ណាត់វៀត ប៊ុនឌឿន មកពីក្លឹបកីឡាប្រដាល់ក្រសួងការពារជាតិ ប្រកួតសាកកម្លាំងគ្នានៅលើសង្វៀន CTN ថ្ងៃអាទិត្យ ទី២៦ កុម្ភៈ ខណៈភិរម្យ ភក្តី មកពីក្លឹបរកាខ្នុរគុនខ្មែរ ជួប សារឹម ង៉ា មកពីក្លឹបកីឡាប្រដាល់ក្រសួងការពារជាតិ ។ សារុន និងប៊ុនឌឿន មានប្រវត្តិឡើងសង្វៀនមិនបានច្រើនប៉ុន្មានទេ ម្យ៉ាងទៀតពួកគេទាំង២នាក់មិនធ្លាប់បានប៉ះគ្នាទៀតផង ។
សារុន ពូកែស្នៀតជើង និងស្នៀតដៃ តែកម្លាំងខ្សោយបន្តិច។ ចលនាវាយលុករបស់គេមានភាពរហ័សរហួនគ្រាន់បើ តែសម្រាប់ការមកប៉ះប៊ុនឌឿន លើកនេះអត់ទាន់ដឹងថា យ៉ាងម៉េចនោះទេ ។ ប៊ុនឌឿន ភាគច្រើនអាងកម្លាំង តែស្នៀតកែង និងជង្គង់របស់គេល្អ ចិត្តក៏សឿងទៀត ពោលគឺហ៊ានស៊ីហ៊ានសង ។ ចាំមើលអ្នកណាខ្លាំងជាងអ្នកណា។ ភិរម្យ ភក្តី ល្បីពូកែខាងប្រើស្នៀតកែង និងជង្គង់ ប៉ុន្តែមានពេលខ្លះការវាយចេញហាក់រអាក់រអួលនៅពេលប៉ះចំគូប្រកួតខ្លាំងជាង ។
លើកនេះប៉ះសារឹម ង៉ា ដែលមានល្បិចប្រយុទ្ធនៅលើសង្វៀនក្រាស់មិនអាចធ្វេសប្រហែសបានឡើយ។ ចេង រិទ្ធី មកពីក្លឹបសាលវ័ន្តកីឡា ជួបលាភ សំណាង មកពីក្លឹបកងពលតូចលេខ៧០ និងឈិន ធារ៉ា មកពីក្លឹបស្រុកអន្លង់វែង ជួបគង់ រ៉ែន មកពីក្លឹបគជសារកីឡា ៕
ចែករំលែកព័តមាននេះ