លោកនាយករដ្ឋមន្ត្រីជប៉ុន នូដា យ៉ូស៊ីហ៊ីកុ នឹងធ្វើដំណើរទស្សនកិច្ចជាផ្លូវការនៅសហរដ្ឋអាមេរិក នៅចុងខែមេសា និងគ្រោងជួបពិភាក្សាជាមួយលោកប្រធានាធិបតីអូបាម៉ា។ រដ្ឋាភិបាលជប៉ុននិងសហរដ្ឋអាមេរិក ពេលនេះកំពុងស្ថិតនៅក្នុងដំណាក់កាលចុងក្រោយនៃផែនការ។ ដំណើរទស្សនកិច្ចនោះធ្វើឡើងបន្ទាប់ពីមានកិច្ចព្រមព្រៀងទ្វេភាគីនាពេលថ្មីៗ លើការរៀបចំកងទ័ពអាមេរិកក្នុងប្រទេសជប៉ុន។ លោកនូដា ត្រូវបានគេរំពឹងថា នឹងធ្វើដំណើរទស្សនកិច្ចក្នុងរដ្ឋធានីវ៉ាស៊ីនតោន ក្នុងអំឡុងពេលវិស្សមកាលដែលចាប់ផ្តើមនៅចុងខែមេសា។
នាយករដ្ឋមន្ត្រីជប៉ុននិងប្រធានាធិបតីអាមេរិក សង្ឃឹមពីការពង្រឹងប្រព័ន្ធសន្តិសុខក្នុងតំបន់អាស៊ីប៉ាស៊ីហ្វិក។ លោកប្រធានាធិបតីអាមេរិកសន្យាដាក់តំបន់នេះជាអាទិភាពក្នុងយុទ្ធសាស្ត្រការពារជាតិថ្មី ។ មេដឹកនាំទាំងពីរនឹងធ្វើសេចក្តីថ្លែងការណ៍រួមគ្នាមួយក្នុងអំឡុងពេលនៃកិច្ចប្រជុំនោះ។ នាយករដ្ឋមន្ត្រីជប៉ុនប្រហែលជានឹងពិភាក្សាពីការចូលរួមជាមួយលោកអូបាម៉ា លើការប្រឹក្សាក្នុងកិច្ចព្រមព្រៀងពាណិជ្ជកម្មសេរីក្នុងតំបន់ប៉ាស៊ីហ្វិក ក៏ដូចជាស្ថានភាពប្រទេសអ៊ីរ៉ង់៕
ចែករំលែកព័តមាននេះ