The Taj Mahal គឺជាអច្ឆរិយៈវត្ថុមួយ ស្ថិតនៅក្នុងប្រទេសឥណ្ឌានៃរដ្ឋអាក្រាដែល មាន​ភាពល្បីល្បាញបំផុតនៅលើពិភពលោក។ The Taj Mahal គឺជារចនាសម្ព័ន្ធនៃមហាចេតិយដ៏ ធំមួយត្រូវបានសាងសង់ឡើងដោយអធិរាជ Shah Jahan សម្រាប់ជាអនុស្សាវរីយ៍ចំពោះ​ព្រះមហេសីទីបី របស់ព្រះអង្គព្រះ​នាម​ Mumta Mahal។ The Taj Mahal ក៏​ប្រៀប​ដូច​ជា​វិមាន​​ដ៏​ធំ​មួយ និង​ស្រស់ស្អាតបំផុត​នៅ​ក្នុង​ពិភព​លោក​ដែលបង្ហាញពីរូបសញ្ញា​នៃ​សេចក្តីស្រលាញ់​ស្មោះ និងរួមបញ្ចូលគ្នារវាង​រចនា​បថ ភឺសៀន អ៊ិស្លាម និងរចនាបថរបស់​ឥណ្ឌា។

នៅក្នុងឆ្នាំ​១៩៨៣ The Taj Mahal បាន​ក្លាយជាអច្ឆរិយៈវត្ថុពិភពលោកតាមរយៈអង្គ​ការយូណេស្កូ។ ​ឆ្នាំ១៦៣១ អំឡុង​រជ្ជកាលអធិ​រាជ Mughal ព្រះមហេសីរបស់អធិរាជ Shah Jahan  បានសោយទិវង្គតនៅក្នុងពេលសម្រាល​បុត្រ​ទី១៤ ព្រះនាម Gauhara Begum ។ ការ​ចាប់​​ផ្តើមសាងសង់នូវវិមាន The Taj Mahal គឺ​បានចាប់ផ្តើ​នៅ​អំឡុងឆ្នាំ​១៦៣២ ហើយបានរួច​រាល់​នៅក្នុងអំឡុងឆ្នាំ​​​១៦៥៣ ។ ការសាងសង់​នេះ គឺដើម្បីរំលឹកពីក្តី​ស្រលាញ់របស់ព្រះអង្គ​ចំពោះ​ព្រះមហេសី និងតំណាងឱ្យក្តីស្រលាញ់ជា​រៀង​រហូត ដូច្នេះហើយ​បានជាព្រះ​អង្គសាង​សង់​នូវ Taj Mahal ដែលតំណាងឱ្យផ្នូររបស់ព្រះ​នាង។ Taj Mahal មានលក្ខណៈ​ពិសេស​​ដែល​វិមាន​នេះមាន ការប្រែពណ៌ជា​ប្រចាំ​​ទៅតាម​ពន្លឺ​ថ្ងៃ។ នៅ​ពេល​ព្រលឹម Taj Mahal មាន​ពណ៌​មាស ពេលថ្ងៃត្រង់ មានពណ៌សក្បុស និងពេល​រសៀល​គឺ​មាន​ពណ៌​លឿងទុំ ។ ភាព​អស្ចារ្យ​នេះ គ​ឺគេ​ប្រើ​ប្រាស់នូវពន្លឺពីធម្មជាតិ ដើម្បី​រំលេចនូវ​សម្រស់​ និងរចនាបថដ៏ពិសេសនៃវិមាន ។
The Taj Mahal គឺជាវិមានមួយ​ដែល​មាន​ភាពអស្ចារ្យ និងល្បីល្បាញនៅលើពិភពលោក ហើយក៏ជាអច្ឆរិយៈវត្ថុនៅលើពិភពលោកតែ​មួយ​គត់ដែលបង្ហាញពីក្តីស្រលាញ់របស់មនុស្ស៕