រាជធានីភ្នំពេញ ៖ តុលាការយោធានៅព្រឹកថ្ងៃទី២៤ កុម្ភៈ ឆ្នាំ២០១២នេះ បានបើកសវនាការកាត់ក្ដីលើសំណុំរឿងព្រហ្មទណ្ឌលោកឈឿន ចាន់ថនអតីតមេអង្គរក្សសម្តេចប្រធានព្រឹទ្ធសភា ដែលមានលោកប៉ោក ប៉ន ប្រធានក្រុមប្រឹក្សាជំនុំជម្រះ លោកស សារ៉េត លោកផូរ ភិរម្យ ជាសមាជិកក្រុមប្រឹក្សាជំនុំជម្រះ លោកម៉ក់ សីហា តំណាងអយ្យការ និងលោកសេង ស៊ាន ក្រឡាបញ្ជីកត់ត្រា ។
អង្គសវនាការបានប្រកាសសាលក្រមផ្ដន្ទាទោសដាក់ពន្ធនាគារចំនួន២៦ឆ្នាំនិងបង្គាប់ឱ្យសងប្រាក់ចំនួន២លានដុល្លារអាមេរិកដល់លោកឧត្ដមសេនីយ៍យឹម លាង ជាដើមបណ្ដឹង និងសងប្រាក់៧៤៩.០៣៦ដុល្លារ ដល់ដើមបណ្ដឹងរដ្ឋប្បវេណី និងបង្កាប់ឱ្យសងប្រាក់៨៩៧.៧៥០ដុល្លារអាមេរិកទៅឱ្យលោកង៉ែត សារិន ជាដើមបណ្ដឹងរដ្ឋប្បវេណីតំណាងក្រសួងការពារជាតិ និងបង់ប្រាក់ពិន័យ១០លានរៀលចូលជាថវិការដ្ឋ ។
សាលក្រមបានបញ្ជាក់ច្បាស់ថា ក្នុងករណីគ្មានប្រាក់សងទេនៅពេលសាលក្រមចូលជាស្ថាពរហើយ តុលាការសម្រេចដកហូតដីចំនួន២កន្លែងពីលោកឈឿន ចាន់ថន ប្រគល់ឱ្យក្រសួងការពារជាតិវិញគឺដីអតីតឃាំ្លប្រេងនៅកន្ទក់ ក្នុងស្រុកអង្គស្នួល ខេត្ដកណ្ដាល និងដីអតីតទីលានបាញ់ស៊ីបនៅកំបូល ។ បន្ថែមលើនេះតុលាការបានសម្រេចរឹបអូសដីបន្ទាយអង្គរក្សនៅក្រោយវត្ដបទុមវតីខណ្ឌដូនពេញ ប្រគល់ទៅឱ្យអង្គភាពអង្គរក្សសម្ដេចជា ស៊ីម គ្រប់គ្រងជាទ្រព្យសម្បត្ដិរដ្ឋវិញ ។
ការផ្ដន្ទាទោសនេះ គឺផ្អែកទៅលើសំណុំរឿងព្រហ្មទណ្ឌចោទប្រកាន់លោកឈឿន ចាន់ថន ចំនួន៥ កាលពីដែលតុលាការយោធាលើកយកមកបើកសវនាការនៅព្រឹកថ្ងៃទី២៤ កុម្ភៈ គឺ១-បទរំលោភសេចគ្តីទំនុកចិត្ដ ២-បំផ្លិចបំផ្លាញសម្ភារបម្រើការប្រយុទ្ធ ៣-ចែកចាយអាវុធខុសច្បាប់ ៤-ខ្វះស្មារតីទទួលខុសត្រូវគ្រប់គ្រងអាវុធក្នុងអង្គភាព និង៥-បំផ្លិតបំផ្លាញដោយចេតនានិង គៃបំបាត់ដោយទុច្ចរិត ។
កាប្រកាសសាលក្រមនេះ គេពុំឃើញមេធាវីដើមបណ្ដឹងចូលរួមនោះទេ ដោយឃើញតែមេធាវីចុងចោទចូលរួមស្ដាប់ ហើយក្រោយពីប្រកាសសាលក្រមផ្ដន្ទាទោសកូនក្ដីហើយនោះ លោកមេធាវីចុងចោទបាននិយាយប្រាប់អ្នកកាសែតថា ការផ្ដន្ទាទោសលោកឈឿន ចាន់ថននេះ គឺអយុត្ដិធម៌ណាស់ ។ ចំណែកឯលោកឈឿន ចាន់ថន វិញបានឆ្លើយប្រាប់អ្នកកាសែតថាលោកនឹងប្ដឹងទៅសាលាឧទ្ធរណ៍បន្ដទៀត ។
គួរបញ្ជាក់ថា សាលាដំបូងរាជធានីភ្នំពេញកាលពីថ្ងៃទី១៦ កុម្ភៈ ឆ្នាំ២០១២ បានផ្ដន្ទាទោសលោកឈឿន ចាន់ថន ដាក់ពន្ធនាគារចំនួន១៦ឆ្នាំនិងបង់ប្រាក់ចំនួន៥លាន់រៀល ៕
ចែករំលែកព័តមាននេះ