ខេត្តព្រះសីហនុ ៖ ការកាត់បន្ថយអត្រាស្លាប់របស់មនុស្សដរាបណាប្រជាពលរដ្ឋទាំងអស់បានយល់ច្បាស់អំពីច្បាប់ចរាចរណ៍ ព្រោះបច្ចុប្បន្ននេះគ្រោះថ្នាក់ចរាចរណ៍បានធ្វើឱ្យមនុស្សបាត់បង់អាយុជីវិតយ៉ាងច្រើន បន្ទាប់ពីជំងឺអេដស៍។ ដូចនេះដើម្បីចូលរួមចែករំលែក និងកាត់បន្ថយនូវវិបត្តិសង្គមដ៏គួរឱ្យព្រួយបារម្ភនេះ អង្គការម្លប់តាប៉ាងបានរៀបចំកម្មវិធីជាច្រើនពាក់ព័ន្ធទៅនឹងការអប់រំស្តីអំពីច្បាប់ចរាចរណ៍ដល់បងប្អូនប្រជាពលរដ្ឋក្នុងក្រុងព្រះសីហនុ ដែលមានរយៈពេល៤ថ្ងៃ ដោយគិតចាប់ថ្ងៃទី២២ ដល់ថ្ងៃទី២៥ កុម្ភៈ ឆ្នាំ២០១២។
យុវសិស្ស មាស សុខលី ដែលជាអ្នកចូលរួម ក្នុងក្បួនដង្ហែអំពីផលប៉ះពាល់ដោយគ្រោះថ្នាក់ចរាចរណ៍បានសំដែងនូវសេចក្តីសោមនស្សរីករាយជាពន្លឹកក្នុងការដង្ហែក្បួននេះ ព្រោះវាផ្តល់ផលប្រយោជន៍ឱ្យប្រជាពលរដ្ឋគ្រប់រូបបានយល់ច្បាស់អំពីហានិភ័យដោយសារគ្រោះថ្នាក់ចរាចរណ៍។ ក្នុងនោះដែរប្អូនក៏បានសំណូមពរដល់អ្នកបើកបរទាំងអស់ សូមកុំពិសាស្រានៅពេលបើកបរ ព្រោះជាតិស្រវឹងអាចធ្វើឱ្យបាត់បង់អ្វីៗទាំងអស់ ទាំងអាយុជីវិតខ្លួនឯង និងអាយុជីវិតអ្នកដទៃ ។
លោកព្រំ ថេត អ្នកគ្រប់គ្រងទូទៅនៃកម្មវិធីនេះ បានបង្ហាញអំពីគោលបំណងនៃការរៀបចំ និងពិធីដង្ហែក្បួននេះថា គឺធ្វើឡើងដើម្បីលើកកម្ពស់ការយល់ដឹងអំពីច្បាប់ចរាចរណ៍ ការគោរពច្បាប់ចរាចរណ៍ និង គ្រោះថ្នាក់ចរាចរណ៍ដើម្បីគ្នាឱ្យប្រជាពលរដ្ឋនៅក្នុងក្រុងព្រះសីហនុ យល់ដឹង និងគោរពច្បាប់ចរាចរណ៍ទាំងអស់គ្នាជៀសវាងពីគ្រោះថ្នាក់ដែលបង្កឡើង បណ្តាលឱ្យប្រជាពលរដ្ឋមួយចំនួនរងគ្រោះ ដោយសារតែមិនគោរពច្បាប់ចរាចរណ៍ ៕
ចែករំលែកព័តមាននេះ