រាជធានីភ្នំពេញ ៖ យុវជនម្នាក់បានជិះម៉ូតូជ្រុលទៅបុកបង្គោលភ្លើងនៅចិញ្ចើមផ្លូវ បណ្ដាលឱ្យដួលបោកក្បាលរងរបួសធ្ងន់ និងម៉ូតូខូចខ្ទេចផ្នែកខាងមុខ កាលពីវេលាម៉ោង១២និង៥នាទីរំលងអធ្រាត្រឈានចូលថ្ងៃទី២៤ កុម្ភៈ ២០១២ នៅលើកំណាត់ផ្លូវលេខ៣៦៩ ហួសស្ពានព្រះពន្លាប្រមាណ១គីឡូម៉ែត្រ ក្នុងក្រុមទី២ ភូមិជ្រោយបាសាក់១ សង្កាត់ព្រែកប្រា ខណ្ឌមានជ័យ ។
ជនរងគ្រោះជិះម៉ូតូបុកបង្គោលភ្លើងមានឈ្មោះឧត្ដម ភេទប្រុស អាយុ២២ឆ្នាំ ស្នាក់នៅភូមិតាងូវ សង្កាត់និរោធ ខណ្ឌមានជ័យ ត្រូវមិត្ដភក្ដិដែលជិះពីក្រោយបានឱ្យដឹងថា មុនពេលកើតហេតុជនរងគ្រោះចេញពីជួបជុំមិត្ដភក្ដិនៅភោជនីយដ្ឋានមួយកន្លែង ហើយបានជិះម៉ូតូម៉ាកឌ្រីមសេ១២៥ ស៊េរី២០១២ ពណ៌ខ្មៅ ត្រឡប់ទៅផ្ទះវិញ ដោយបើកតាមផ្លូវលេខ៣៦៩ ពីជើងទៅត្បូង ។ ខណៈមកដល់ចំណុចកើតហេតុឃើញមានម៉ូតូមួយគ្រឿងបើកពីខាងមុខ ហើយមិនដឹងជាយ៉ាងម៉េច ស្រាប់តែម៉ូតូជនរងគ្រោះជ្រុលចង្កូតទៅបុកបង្គោលភ្លើងនៅចិញ្ចើមផ្លូវបណ្ដាលឱ្យដួលបោកក្បាលរងរបួសធ្ងន់តែម្តង ។ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកមានជ័យ ។
ក្រោយពេលកើតហេតុម៉ូតូជនរងគ្រោះត្រូវបងប្អូនយកទៅរក្សាទុកដោយខ្លួនឯង ។ ទោះបីជាបែបណា ការបុកនោះមិនបានធ្វើឱ្យខូចខាតបង្គោលភ្លើងទេ ៕
ចែករំលែកព័តមាននេះ