រាជធានីភ្នំពេញ ៖ ចៅក្រមលោកប៉ោក ប៉ន ប្រធានក្រុមជំនុំជម្រះលើរឿងក្តីលោកឈឿន ចាន់ថន បានប្រកាសសាលក្រមកាលពីវេលាម៉ោង៨និង៣០នាទីព្រឹកថ្ងៃទី២៤ កុម្ភៈ ២០១២ នៅសាលសវនាការនៃតុលាការយោធាថា អតីតឧត្តមសេនីយ៍ឯក ឈឿន ចាន់ថន មេបញ្ជាការកងអង្គរក្សសម្តេចប្រធានព្រឹទ្ធសភា ជា ស៊ីម ត្រូវបានផ្តន្ទាទោសឱ្យជាប់ពន្ធនាគារ២៦ឆ្នាំ សងប្រាក់ទៅលោកឧត្តមសេនីយ៍ យឹម លាង ដើមបណ្តឹងតំណាងសម្តេចជា ស៊ីម ២លានដុល្លារ និងសងប្រាក់ទៅលោកមាស គឹមហេង ៧៤ម៉ឺនដុល្លារ ។
គួររំលឹកថា តុលាការយោធាដែលមានទីតាំងភូមិដំណាក់ សង្កាត់ភ្នំពេញថ្មី ខណ្ឌសែនសុខ នៅព្រឹកថ្ងៃទី១៥ កុម្ភៈ ២០១២ បានបើកសវនាការជម្រះក្តីលោកឈឿន ចាន់ថន អតីតមេបញ្ជាការកងអង្គរក្សសម្តេចជា ស៊ីម ប្រធានព្រឹទ្ធសភាដែលមានលោកប៉ោក ប៉ន ប្រធានក្រុមប្រឹក្សាជំនុំជំរះ លោក ស សារ៉េត លោកផូរ ភិរម្យ ជាសមាជិកក្រុមប្រឹក្សាជំនុំជម្រះ, លោកម៉ក់ សីហា តំណាងអយ្យការ និងក្រឡាបញ្ជីកត់ត្រា គឺលោកសេង ស៊ាន ។
សវនាការជំនុំជម្រះអតីតឧត្តមសេនីយ៍ឯក ឈឿន ចាន់ថន បានចាប់ផ្តើមតាំងពីព្រឹករហូតកដល់រសៀលប្រកបដោយភាពក្តៅគគុកសក្នុងការសួរដេញដោលទៅវិញទៅមក រវាងមេធាវីដើមចោទ និងចុងចោទ និងតំណាងអយ្យការ រួមទាំងប្រធានក្រុមប្រឹក្សាជំនុំជម្រះផង ហើយបានបញ្ចប់ទៅនៅវេលាម៉ោង៤និង១៥នាទីរសៀលថ្ងៃដដែល ប៉ុន្តែមិនទាន់ដឹងលទ្ធផលយ៉ាងណានៅឡើយទេ ព្រោះលោកប៉ោក ប៉ន ប្រធានក្រុមជំនុំជម្រះបានលើកពេលប្រកាសសាលក្រមនេះទៅប្រកាសនៅថ្ងៃទី២៤ កុម្ភៈ ២០១២ វេលាម៉ោង៨និង៣០នាទីព្រឹកវិញ ឥឡូវដល់ពេលប្រកាសតាមកំណត់ហើយ ។
សំណុំរឿងរបស់អតីតផ្កាយ៣ ឈឿន ចាន់ថន ត្រូវតុលាការយោធាលើកយកមកបើកសវនាការជម្រះនាពេលនេះ គឺពាក់ព័ន្ធលក់ទ្រព្យសម្បត្តិរដ្ឋ ដូចជាលក់រថយន្តដំរីទឹកចំនួន៤គ្រឿង រថយន្ត T100 មួយគ្រឿង ស៊ីដាច់លុយជាង៧០មឺុនដុល្លាររបស់រដ្ឋ មិនយកទៅសាងសង់បន្ទាយអង្គរក្សនៅសង្កាត់ព្រែកឯង និងដីសារមន្ទីរប្រវត្តិសាស្ត្រនៅខេត្តព្រៃវែង រួមទាំងករណីចែកចាយអាវុធខុសច្បាប់ ។ សរុបសេចក្តីមកតុលាការយោធាបានធ្វើការចោទប្រកាន់លោកឈឿន ចាន់ថន ចំនួន៥ករណី គឺ១-រំលោភទំនុកចិត្ត ២-បំផ្លិចបំផ្លាញសម្ភារបម្រើការប្រយុទ្ធ ៣-ចែកចាយអាវុធខុសច្បាប់ ៤-ខ្វះស្មារតីទទួលខុសត្រូវលើអាវុធគ្រប់គ្រងក្នុងអង្គភាព និង៥-បំផ្លិចបំផ្លាញដោយចេតនាគៃបំបាត់ដោយទុច្ចរិត ។
សូមបញ្ជាក់ផងដែរថា អតីតឧត្តមសេនីយ៍ឯក ឈឿន ចាន់ថន មេបញ្ជាការកងអង្គរក្សសម្តេចជា ស៊ីម ប្រធានព្រឹទ្ធសភាដែលអាប់យសត្រូវបានសាលាដំបូងរាជធានីភ្នំពេញ ប្រកាសសាលក្រមនៅព្រឹកថ្ងៃទី១៦ កុម្ភៈ ២០១២ កន្លងទៅនេះ បន្ទាប់ពីមជ្ឈដ្ឋានទូទៅរង់ចាំស្តាប់ការសម្រេចទោសកំហុសរបស់គាត់ប្រហែល៦ខែមកហើយ គឺកំណត់ឱ្យជាប់ពន្ធនាគារ១០ឆ្នាំ និងតម្រូវឱ្យបង់ប្រាក់៥លានរៀល បូកនឹងការផ្តន្ទាទោសរបស់តុលាការយោធា គឺលោកឈឿន ចាន់ថន ត្រូវជាប់ពន្ធនាគារ៣៦ឆ្នាំ ៕
ចែករំលែកព័តមាននេះ