ខេត្តមណ្ឌលគិរី ៖ ជារៀងរាល់យប់ជំនួញដឹកឈើប្រណីតឆ្លងដែនទៅលក់នៅប្រទេសវៀតណាមកំពុងមានសកម្មភាពគគ្រឹកគគ្រេងដោយពុំមានការបង្ក្រាបពីមន្ត្រីជំនាញឬសមត្ថកិច្ចណាម្នាក់ឡើយ ហើយរាល់ការដឹកជញ្ជូនយកទៅលក់ឲ្យថៅកែវៀតណាមនោះ គឺក្រុមឈ្មួញបាននាំគ្នាដឹកចេញតាមច្រករបៀងជាច្រើនចំណុច តែច្រកដែលមានការមមាញឹកនិងត្រូវប៉ាន់ជាងគេគឺច្រកង៉ាំដី ស្ថិតក្នុងភូមិឆ្នែង ឃុំស្រែខ្ទុម ស្រុកកែវសីមា ។ យ៉ាងហោចណាស់ក៏មានរថយន្តដឹកឈើពី៥ទៅ១០គ្រឿងជាប្រភេទឡង់គ្រីស័្សរមួយបាំងកន្លះបានដឹកចេញនៅពេលយប់ស្ងាត់ ហើយក៏មានខ្លះដឹកតាមម៉ូតូដែលគេបានកែច្នៃរាប់សិបគ្រឿងផងដែរក្នុងមួយយប់ៗ។
ប្រភពច្បាស់ការណ៍មួយបានឲ្យដឹងថា ចាប់ពីពាក់កណ្តាលអធ្រាត្ររហូតដល់វេលាទៀបភ្លឺ ផ្លូវច្រករបៀងង៉ាំដីគឺមានភាពមមាញឹកជាងពេលថ្ងៃ ព្រោះមានទាំងរថយន្តនិងម៉ូតូបានលួចដឹកឈើប្រណីតបន្តកន្ទុយគ្នារាប់សិបគ្រឿងដើម្បីយកទៅលក់ឲ្យថៅកែវៀតណាម។
ទាក់ទិនទៅនឹងបញ្ហាខាងលើ កោះសន្តិភាពមិនអាចទំនាក់ទំនងទៅលោកអែម សំអឿន ប្រធានច្រកបានទេនាថ្ងៃទី២៤ កុម្ភៈ ២០១២ ព្រោះទូរស័ព្ទមិនចូល ៕
ចែករំលែកព័តមាននេះ