រាជធានីភ្នំពេញ ៖ ជនដៃដល់បាញ់ប្រហារទៅលើយុវជនម្នាក់ បណ្តាលឱ្យដេកដួលនៅខាងត្បូងក្បែរផ្សារ៧មករា ប្រហែល២ម៉ោងមុននេះ និងបក្សពួក២នាក់ទៀត ត្រូវបានប៉ូលិសចាប់ខ្លួន បន្ទាប់ពីកើតជម្លោះបង្ហូរឈាមបើកម៉ូតូដេញកាប់ចាក់ និងបាញ់គ្នាផ្អើលម្តុំផ្សារ៧មករា ដែលមើលទៅគួរឱ្យរន្ធត់នោះ ។
មុនដំបូងប៉ូលិសរកឃើញសាក្សី២នាក់ ជាក្រុមយុវជនផ្សេងទៀត មិនស្ថិតនៅក្នុងក្រុមជនដៃដល់នោះទេ ប៉ុន្តែពួកគេស្គាល់ក្រុមជនដៃដល់ត្រូវបាននាំយកមកសាកសួរនៅអធិការដ្ឋានខណ្ឌទួលគោក ហើយបន្ទាប់ពីសាកសួរបានបន្តិច ប៉ូលិសបាននាំចេញទៅក្រៅវិញ ដើម្បីឱ្យទៅបង្ហាញមុខ និងទីកន្លែងជនដៃដល់ពិតប្រាកដ ។ ទីបំផុតសាក្សី២នាក់នេះ បំភ្លឺរឿងរ៉ាវក្រុមជនដៃដល់បានច្បាស់លាស់ និងនាំប៉ូលិសទៅដល់កន្លែងដែលជនដៃដល់លាក់ខ្លួន រួចហើយចាប់បានជនដៃដល់ពិតប្រាកដម្នាក់កាលពីវេលាម៉ោង៥ល្ងាចថ្ងៃដដែលនៅភូមិទួលគោក សង្កាត់ទួលសង្កែ ខណ្ឌឫស្សីកែវ ហើយប៉ុន្មាននាទីក្រោយមកទៀត សមត្ថកិច្ចឈានទៅចាប់បានបក្សពួក២នាក់ទៀត ពោលគឺជនដៃដល់ម្នាក់ និងបក្សពួក២នាក់ សរុបទាំងាអស់៣នាក់ និងនៅសល់បក្សពួកជាច្រើននាក់ទៀតប៉ូលិសកំពុងតាមប្រមាញ់ ។
ជនដៃដល់ឈ្មោះប្រាក់ សុភាវិនិត អាយុប្រមាណ២០ឆ្នាំ ជាកូនប្រុសរបស់លោកមេភូមិទួលគោក ត្រូវចាប់ខ្លួនក្នុងផ្ទះតែម្តង ចំណែក២នាក់ទៀតមិនស្គាល់ឈ្មោះនៅឡើយទេ ប៉ុន្តែប៉ូលិសកំពុងសាកសួរពួកគេអំពីមូលហេតុផ្សេងៗនៃការបាញ់ប្រហារនេះ ។ កាំភ្លើងដែលជនដៃ ដល់ប្រើប្រាស់ខុសច្បាប់ម៉ាកប្រាហា ត្រូវបានប៉ូលិសដកហូត…។
គួររំលឹកថា ក្មេងទំនើង២ក្រុមបានដេញកាប់ចាក់ និងបាញ់គ្នា បណ្តាលឱ្យរងរបួសដេកដួលម្នាក់តាមផ្លូវមហាសេនាប្រមុខគឹម អ៊ីលស៊ុង បង្កឱ្យមានការភ្ញាក់ផ្អើលយ៉ាងខ្លាំងកាលពីវេលាម៉ោង៣រសៀលថ្ងៃទី២៣ កុម្ភៈ ២០១២ នៅខាងត្បូងក្បែរផ្សារ៧មករា ស្ថិតក្នុងសង្កាត់បឹងកក់២ ខណ្ឌទួលគោក ។ តាមសាក្សីនៅកន្លែងកើតហេតុ បានឱ្យដឹងថា ក្រុមជនដៃដល់មានគ្នាប្រមាណ១០នាក់ ដេញកាប់ចាក់ទៅលើក្រុមបដិបក្សដែលមានគ្នា២នាក់ លុះមកដល់ខាងត្បូងក្បែរផ្សារ៧មករា លើកំណាត់ផ្ឡូវមហាសេនាប្រមុខគឹម អ៊ីលស៊ុង ស្រាប់តែជនដៃដល់ម្នាក់បានស្ទាក់ពីមុខរួចហើយដកកាំភ្លើងខ្លីបាញ់១គ្រាប់ត្រូវចំក្រោមដោះខាងឆ្វេងធ្លាយទៅក្លៀកខាងឆ្វេងរងរបួសធ្ងន់ធ្ងរ។ យុវជនរងគ្រោះឈ្មោះហេង សុជាតិ អាយុ២០ឆ្នាំ មុខរបរជាងម៉ាស៊ីនត្រជាក់ ត្រូវបានគេបញ្ជូនទៅសង្គ្រោះនៅគ្លីនិកឯកជន និងបន្ទាប់មកបញ្ជូនបន្តទៅមន្ទីរពេទ្យកាល់ម៉ែត… គេមិនទាន់ដឹងថា នេះជាជម្លោះរឿងអ្វីនោះទេ។ ព័ត៌មានលម្អិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព 87.75 ភ្នំពេញ, 87.5 បាត់ដំបង ៕
ចែករំលែកព័តមាននេះ