ខេត្តព្រះសីហនុ ៖ ផ្លូវ និងមនុស្ស គឺជាកត្តាសំខាន់ដែលមិនអាចខ្វះបានបើទោះនៅទីណាក៏ដោយវាស្របទៅនឹងប្រសាសន៍ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលធ្លាប់មានប្រសាសន៍កន្លងមកថា មានផ្លូវ មានក្តីសង្ឃឹម ដូចនេះហើយ ទើបនៅព្រឹកថ្ងៃទី២២ កុម្ភៈ ស្ពានឈើមួយកន្លែងប្រវែង១៨ម៉ែត្រ ទទឹង២ម៉ែត្រកន្លះ ស្ថិតក្នុងក្រុមទី៤ ភូមិ៦ សង្កាត់លេខ៤ ក្រុងព្រះសីហនុ ដែលតភ្ជាប់ផ្លូវពីឆ្នេរអូរត្រេះ ទៅកាន់ផ្លូវជាតិលេខ៤ ឆ្លងកាត់ភូមិចំនួន២ដែលចាស់ទ្រុឌទ្រោមពិបាកក្នុងការធ្វើដំណើរ សូម្បីតែដើរ សឹងតែមិនរួចផងត្រូវបានសប្បុរសជនបរទេសម្នាក់ រួមជាមួយលោកនាយកសាលាបឋមសិក្សាអូរត្រេះ ព្រះចៅអធិការវត្តអូរត្រេះ និងពុទ្ធបរិស័ទនៅក្នុងភូមិធ្វើការជួសជុលឡើងវិញដោយចំណាយទឹកប្រាក់អស់ប្រមាណ១.៦០០.០០០រៀល។
លោកសៅ ចាន់ធឿន នាយកសាលាបឋមសិក្សាអូរត្រេះបានរៀបរាប់ឱ្យដឹងថា ដោយមើលឃើញពីទុកលំបាករបស់ប្រជាពលរដ្ឋ និងការលំបាករបស់ប្អូនៗកុមារសិស្សសាលា រូបលោកផ្ទាល់បានពិភាក្សាជាមួយព្រះចៅអធិការវត្តអូរត្រេះ មាស សុផល លោកអ៊ឹង សារី អនុប្រធានការិយាល័យអប់រំក្រុងព្រះសីហនុ លោកមេភូមិ ជា វឹង និងសប្បុរសម្នាក់ទៀតដែលជាជនបរទេសឈ្មោះអ៊ឹង ហ្គ្រិត អាយុ៦៥ឆ្នាំ ជនជាតិអង់គ្លេស ជាគ្រូអង់គ្លេសស្ម័គ្រចិត្ត ព្រមទាំងមាតាបិតា សិស្សជាច្រើននាក់។
លោកបានបន្តថា ស្ពាននេះពីមុនត្រូវបានលោកហ៊ុន ភី អនុប្រធានមន្ទីរសុរិយោដីជាអ្នកកសាងអស់ទឹកប្រាក់៨០០ដុល្លារ តែក្រោយមកនៅដើមឆ្នាំ២០១២ ស្ពានមួយនេះបានបាក់ស្រុតជាច្រើនកន្លែងបង្កការលំបាកយ៉ាងខ្លាំងដល់ក្មួយៗសិស្សានុសិស្ស។ ប៉ុន្តែការជួសជុលនេះវាមិនបានត្រឹមត្រូវតាមតម្រូវការនោះទេ ព្រោះមានលក្ខណៈតូច និងជាស្ពានឈើ ។ ដូចនេះក្នុងនាមលោកជានាយកសាលាលោកសូមធ្វើការអំពាវនាវដល់សប្បុរសជនទាំងក្នុង និងក្រៅប្រទេសដែលមានទឹកចិត្ត សូមមេត្តាជួយកសាងស្ពាននេះឱ្យទៅជាស្ពានថ្មផង ដើម្បីងាយស្រួលក្នុងការធ្វើដំណើររបស់ប្រជាពលរដ្ឋក៏ដូចភ្ញៀវទេសចរដែលមានបំណងចូលមកកំសាន្តនៅឆ្នេរអូរត្រេះ តាមរយៈផ្លូវកាត់ ផ្លូវបំបែកផ្លូវជាតិលេខ៤ ត្រង់ចំណុចចម្ការកៅស៊ូ ក្បែរបន្ទាយប៉េអឹម ក្រុងព្រះសីហនុ៕
ចែករំលែកព័តមាននេះ