ខេត្តកំពង់ចាម ៖ សំណង់អគាររដ្ឋបាលជាច្រើនរបស់រោងចក្រមេនហាតធេន ដែលមានទីតាំងស្ថិតនៅភូមិអំពិលលើ ឃុំអំពិល ស្រុកកំពង់សៀម វិះនឹងក្លាយទៅជាចំណីភ្លើងទៅហើយតែសំណាងល្អត្រូវបានរថយន្តពន្លត់អគ្គិភ័យ របស់ស្នងការដ្ឋាននគរបាលខេត្តចំនួន៣គ្រឿងចេញអន្តរាគមន៍បាញ់ទឹកពន្លត់ទាន់ពេលវេលា ។ ហេតុការណ៍នេះកើតឡើង នៅព្រឹកថ្ងៃទី២៣ កុម្ភៈ ដោយសារតែកម្មករផ្ទុះកំហឹងពីកូដកម្មក្លាយទៅជាបាតុកម្មបែបហិង្សាដោយយកដបសាំងគប់ចូលក្នុងបរិវេណរោងចក្រ និងយកដុំថ្មគប់បំបែកកញ្ចក់ទ្វារបង្អួចនៅច្រកយាមខាងមុខ វាយសម្ភារខូចខាតអស់មួយចំនួន ។ មិនតែប៉ុណ្ណោះក្រុមបាតុករបាននាំគ្នាបិទផ្លូវជាតិលេខ៧ មុខរោងចក្រ ធ្វើឲ្យកកស្ទះចរាចរណ៍ប្រហែលកន្លះម៉ោង ព្រោះតែខឹងថៅកែមិនព្រមដោះស្រាយនូវលក្ខខណ្ឌទាំង១២ចំណុចដែលពួកគេបានទាមទារកន្លងមក ។ នេះជាអំពើហិង្សាដែលផ្ទុះចេញពីបាតុកម្មនៅរោងចក្រកាត់ដេរ នៅខេត្តកំពង់ចាម ។
លោកវរសេនីយ៍ត្រី ប៉ាក ជាតិ អធិការនគរបាលស្រុកកំពង់សៀម មានប្រសាសន៍ថា រូបលោកបានដឹកនាំកំលាំងក្រោមឪវាទតាមបញ្ជារបស់លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តដោយបានចុះមកការពារនៅមុខរោងចក្រមេនហាតធេនកាត់ដេរសម្លៀកបំពាក់ តាំងតែពីព្រឹកថ្ងៃទី២០ កុម្ភៈ បន្តរហូតមកដល់ថ្ងៃទី២៣ កុម្ភៈ ចំពេលដែលកូដកម្មកម្មករបានផ្ទុះជាបាតុកម្មហិង្សា ។
លោកវរសេនីយ៍ត្រី ប៉ាក ជាតិ អធិការនគរបាលស្រុកកំពង់សៀម ប្រាប់បន្តថា កម្មករដែលបានចូលរួមធ្វើកូដកម្មនៅថ្ងៃទី៤នេះ មានគ្នាប្រមាណពី១.២០០ទៅ១.៣០០នាក់ ក្រោយពីមិនមានដំណោះស្រាយនោះ ក្រុមកម្មករបានយកកង់រថយន្តមកដុតនៅលើផ្លូវថ្នល់មុខរោងចក្រ ។ បន្ទាប់មកបាននាំគ្នាដើរទៅដាក់កម្លាំងពង្រាយបិទផ្លូវជាតិលេខ៧ ដោយបានយកដុំថ្មតូចធំប្រមៀលដាក់កណ្តាលថ្នល់ដើម្បីកុំឲ្យការធ្វើដំណើរតាមកង់-ម៉ូតូ និងរថយន្តតូច-ធំបើកឆ្លងកាត់ទៅវិញទៅមក ជាហេតុបណ្តាលឲ្យកកស្ទះចរាចរណ៍ប្រហែលកន្លះម៉ោង ហើយត្រូវបានកម្មករ កម្មការិនី នាំគ្នាមកខាងមុខរោងចក្រវិញ ។
ដោយមានមេក្រូស្រែកបំពងសំឡេងទាមទាររកយុត្តិធម៌នូវលក្ខខណ្ឌចំនួន១២ចំណុច ទោះបីជាកម្លាំងនគរបាល និងអាវុធហត្ថបានដាក់កម្លាំងការពារនៅច្រកចូលរោងចក្រយ៉ាងណាក្តី ក៏មិនអាចរារាំងដល់ក្រុមបាតុករបានដែរ ដោយបាននាំគ្នាយកដុំថ្មគប់បំបែកកញ្ចក់បង្អួច និងទ្វារនៅច្រកចូលខាងមុខ ព្រមទាំងបានសម្រុករុញច្រានទ្វារដែកសំណាញ់រហូតដល់របើករត់ប្រសេចប្រសាចចូលទៅគប់ និងវាយកម្ទេចកន្លែងបន្ទប់ដេករបស់បុគ្គលិករោងចក្រចិនដែលស្នាក់នៅ ។
ស្របពេលនោះ ស្រាប់តែមានកម្មករបានលួចគប់ដបសាំងចូលក្នុងបរិវេណរោងចក្រ នៅផ្នែកខាងក្រោយជាហេតុបណ្តាលឲ្យឆេះស្មៅ រាលដាលកាន់តែខ្លាំងឡើងៗ ស្ទើរតែដល់កន្លែងស្តុកប្រេង តែសំណាងល្អត្រូវបានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត ចំនួន៣គ្រឿង ចេញមកអន្តរាគមន៍បាញ់ទឹកពន្លត់ទប់ស្កាត់ទាន់ពេលវេលា បើពុំនោះទេសំណង់អគាររដ្ឋបាលជាច្រើននឹងក្លាយទៅជាចំណីភ្លើងជាក់ជាមិនខានឡើយ ។
លោកចន ធាង ប្រធានសហជីពសេរីកម្មករ ប្រចាំរោងចក្រមេនហាតធេនប្រាប់ថា ស្របពេលដែលរូបលោកបានដឹកនាំកម្មករ កម្មការិនី ធ្វើកូដកម្ម នៅព្រឹកថ្ងៃទី២៣ កុម្ភៈ ដែលជាថ្ងៃទី៤ រូបលោកបានចូលទៅដោះស្រាយនៅក្នុងរោងចក្រ ដោយមានតំណាងក្រសួងការងារ អគ្គនាយករងរោងចក្រឈ្មោះ ចន លីម និងមន្ត្រីរដ្ឋបាល២នាក់ ។ ការទាមទារនូវចំណុចទាំង១២នោះ ត្រូវបានភាគីខាងម្ចាស់រោងចក្រលើកហេតុផលថា បើក្រុមប្រឹក្សាអាជ្ញាកណ្តាលចេញសេចក្តីប្រកាសមួយថ្មីមកនោះនឹងអនុវត្ត តែរឿងចាស់ត្រូវទុកមួយឡែកសិន ។ ដោយសារតែមិនឃើញមានដំណោះស្រាយប្រកបដោយផ្លែផ្កានោះទើបកម្មករ កម្មការិនី បាននាំគ្នាបញ្ចេញកំហឹង ។ ក្រោយពីមានហេតុការណ៍នេះគេឃើញ លោកជា មុនី ប្រធានសហជីពមកដោះស្រាយជាមួយនឹងថៅកែរោងចក្រ នៅរសៀលថ្ងៃទី២៣កុម្ភៈ ។
លោកនាង សាវ៉ាត ប្រធានសមាគមសិទ្ធិមនុស្សអាដហុកប្រចាំខេត្តកំពង់ចាម ដែលបានចុះមកដល់រោងចក្រមេនហាតធេន មានប្រសាសន៍ឲ្យដឹងថា មូលហេតុដែលឈាន រហូតដល់កម្មករកម្មការិនី ប្រើនូវអំពើហិង្សា យកដុំថ្មគប់បំបែកកញ្ចក់នោះដោយសារតែមិនមានដំណោះស្រាយពីសំណាក់ថៅកែរោងចក្រ ។
សូមបញ្ជាក់ថា ក្រោយពីមានហេតុការណ៍វាយកម្ទេច គប់បំបែកកញ្ចក់ និងវាយកម្ទេចនូវសម្ភារមួយចំនួននោះកម្មករបានសម្រុកចូលទៅក្នុងបរិវេណរោងចក្រ វាយកម្ទេចជាលើកទី២ តែបន្តិចមកត្រូវបានកម្លាំងនគរបាលចេញមកអន្តរាគមន៍ទប់ស្កាត់ ដោយនៅក្នុងដៃមានប្រដាប់ឆក់ចុចលាន់ឮប្រុបៗមិនឲ្យកម្មករវាយបំផ្លាញរបស់របរក្នុងរោងចក្របន្តកាន់តែមានទំហំធំទៅៗនោះទេ ។ ដោយគ្រាន់តែឃើញសមត្ថកិច្ច ភ្លាមៗនោះ បាតុករបាននាំគ្នារត់ប្រសាចចេញទៅខាងក្រៅរោងចក្រវិញមិនមានកម្មករកម្មការិនីណាម្នាក់ត្រូវបានចាប់ខ្លួននោះ
ទេ ។ នៅក្នុងហេតុការណ៍នេះលោកវរសេនីយ៍ឯក ជឹម សេងហុង ស្នងការនគរបាលខេត្ត ទទួលផែនយុត្តិធម៌ លោកវរសេនីយ៍ឯក ប៊ុម ប៊ន ស្នងការរងនគរបាលខេត្ត ទទួលផែនសន្តិសុខ លោកឧត្តមសេនីយ៍ត្រី វ៉ា សារិទ្ធ មេបញ្ជាការអាវុធហត្ថខេត្ត បានដឹកនាំកម្លាំងក្រោមឱវាទចុះមកដាក់កម្លាំងការពារដោយមិនឱ្យមានកាន់អាវុធនោះទេ តាមបញ្ជារបស់ថ្នាក់លើ ដើម្បីចៀសវាងគ្រោះថ្នាក់ដល់កម្មករ កម្មការិនី កាត់ដេរ ។
ប្រភពព័ត៌មានចុងក្រោយឱ្យដឹងថា ក្រោយពីបានជួបប្រជុំជាមួយថៅកែរោងចក្រទាំង១២ចំណុចនេះរួចមក លោកជា មុនី ប្រធានសហជីពសេរីកម្មករកម្ពុជា បានចេញមកប្រកាសនៅចំពោះមុខកម្មករទាំងអស់ថា ថៅកែរោងចក្របានឯកភាពទាំងស្រុងលើចំណុចទី៧-៨-៩-១១និង១២ ។ ចំណែកចំណុចទី ៥-៦-១០ ទុកលទ្ធភាពពិភាក្សាបន្ត ហើយនឹងប្រកាសឱ្យដឹងនៅសប្តាហ៍ក្រោយ ។ ចំណែកចំណុចទី ១-២-៣-៤បានឯកភាពជួយ៥០% ។
ក្រោយពេលបានទទួលដំណោះស្រាយនេះ រួចមកបាតុករក៏បានរំសាយទៅវិញ នៅរសៀលថ្ងៃទី២៣ កុម្ភៈ ព្រមទាំងសន្យាថា នឹងចូលធ្វើការជាធម្មតាវិញនៅព្រឹកថ្ងៃចន្ទទី២៧ កុម្ភៈ ៕
ចែករំលែកព័តមាននេះ