ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ
លិខិតកែតម្រូវ
សូមគោរពចូលមក
លោកនាយកចាងហ្វាងកាសែតកោះសន្តិភាព
សូមជូនជ្រាប ។
ខ្ញុំបាទឈ្មោះសុខ សាមឿន អាយុ៤៣ឆ្នាំ មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង ។ ខ្ញុំបាទបានអានអត្ថបទរបស់កាសែតកោះសន្តិភាពចេញផ្សាយកាលពីថ្ងៃសៅរ៍-អាទិត្យចុះថ្ងៃទី១៨-១៩ ខែកុម្ភៈ ឆ្នាំ២០១២ អត្ថបទចេញផ្សាយលេខ៧៤៩៧ ដែលមានចំណងជើងថា «ប៉ូលិសចាប់ខ្លួនមេតុងទីនផ្អើលពេញក្រុងស្វាយរៀង កូនតុងទីននាំគ្នាជ្រួលច្របល់» ។
អត្ថបទរបស់កោះសន្តិភាពបានចុះផ្សាយថា មេតុងទីនដុះស្លែម្នាក់ត្រូវបានជាប់ទ្រុងដោយសារមានកូនតុងទីនដាក់ពាក្យបណ្តឹងពីបទបោកយកលុយរបស់ពួកគេ ត្រូវបានសមត្ថកិច្ចកោះហៅទៅសាកសួរ(មិនមែនចាប់ខ្លួនទេ) ។ ចំពោះកូនតុងទីន១៥នាក់ ដែលបានដាក់ពាក្យបណ្តឹងមានទឹកប្រាក់ជំពាក់ចំនួន ៣៤៦.៤៣២.៧០០លានរៀល ក៏មិនត្រឹមត្រូវដែរ ទឹកប្រាក់ដែលជំពាក់មានត្រឹមតែ២៧០.៩០០.០០០លានរៀលប៉ុណ្ណោះ ។
ការលេងតុងទីននេះ គឺព្រមព្រៀងគ្នាទាំងមេតុងទីននិងកូនតុងទីន ស្ម័គ្រចិត្តលេងទាំងអស់គ្នា ដោយគ្មានអ្នកណាឆបោកអ្នកណានោះទេ ។ ហើយចំពោះការលេងតុងទីនមាន២ប្រភេទ គឺមួយប្រភេទ បង់១ថ្ងៃម្តង ហើយមួួយប្រភេទទៀត គឺបង់១ខែម្តង (គ្មាន១០ថ្ងៃបង់ម្តងនោះទេ) ។ មេតុងទីនគ្មានបានប្រើប្រាស់មធ្យោបាយទុច្ចរិតបោកប្រាស់កូនតុងទីន ដូចសម្តីនៅក្នុងអត្ថបទចុះផ្សាយនោះឡើយ ។
តុងទីនដែលកំពុងតែដំណើរការមានសមាជិកដល់ទៅ១៥០នាក់ មិនត្រឹមចំនួន១៥នាក់នោះទេ ។ មិនមែនមេតុងទីនមានបំណងប្រមូលលុយកូនតុងទីនរត់គេចនោះទេ សព្វថ្ងៃនេះចំពោះកូនតុងទីនដេញបានប្រាក់ហើយ(កូនងាប់) មានចំនួន៧៥នាក់ មានទឹកប្រាក់ដែលត្រូវបង់មកឱ្យមេតុងទីនវិញមានចំនួន៣០០.០០០.០០០លានរៀល ។
មេតុងទីនបានប្រាប់គាត់ពិតជាបានជំពាក់ប្រាក់កូនតុងទីនទាំង១៥នាក់នោះពិតមែន ហើយគាត់គ្មានគំនិតរត់គេចដូចជាការចោទប្រកាន់របស់សមត្ថកិច្ចនោះដែរ ។
ត្រង់ពាក្យថាត្រូវបានសមត្ថកិច្ចចាប់ឃាត់ខ្លួននៅថ្ងៃទី១៥ ខែកុម្ភៈ ២០១២ គឺមិនត្រឹមត្រូវទេតាមការពិតសមត្ថកិច្ចបានកោះហៅឱ្យចូលខ្លួនដើម្បីឆ្លើយបំភ្លឺ ហើយឃាត់ខ្លួនតាំងពីថ្ងៃទី១៣ ខែកុម្ភៈ ២០១២។
ចំពោះការនិយាយបំផ្លើសរបស់សមត្ថកិច្ចថា មេតុងទីនយកលុយកូនតុងទីនទៅទិញផ្ទះល្វែងនៅភ្នំពេញចំនួន២-៣ល្វែង ជារឿងមិនពិត និងមិនត្រឹមត្រូវទេ ។ ចំណែកឯផ្ទះល្វែងដែលនៅផ្សារប្រសូត្រ១ល្វែង គឺជាលុយរបស់ប្រពន្ធគាត់ដែលបានយកលុយផ្ទាល់ខ្លួនពីការរកស៊ីលក់ប្រហុក ផ្អក ត្រីងៀត ទិញទុកគ្រាន់រកស៊ី ។
ចំណែកថាបានឃុំខ្លួនជាបណ្តោះអាសន្ននៅពន្ធនាគារខេត្តស្វាយរៀងក៏ជារឿងមួយគួរហួសចិត្តពេកដែរ។ សព្វថ្ងៃនេះ មេតុងទីនកំពុងដំណើរការប្រមូលយកលុយពីកូនតុងទីនធម្មតា (មិនជាប់គុកទេ) ។ លោកមេធាវី បានតម្កល់ប្រាក់ធានាឱ្យនៅក្រៅឃុំនៅថ្ងៃទី១៧ កុម្ភៈ ២០១២ វេលាម៉ោង៦ល្ងាច ។
មូលហេតុដែលនាំឱ្យមានការប្តឹងមេតុងទីនបែបនេះ ដោយសារ
១-កូនតុងទីនដែលដេញបានប្រាក់ហើយបង់លុយមកវិញមិនបានគ្រប់ចំនួន ហើយការបង់មិនគ្រប់នេះ ធ្វើឱ្យមេតុងទីនមិនអាចយកប្រាក់ទៅទូទាត់ឱ្យកូនតុងទីនដែលនៅរស់បានគ្រប់ចំនួន ។
២-មានកូនតុងទីនមួយចំនួនតូចដេញបានរត់គេចខ្លួនមិនព្រមបង់ប្រាក់ ៕
ធ្វើនៅស្វាយរៀង ថ្ងៃទី១៩ កុម្ភៈ ២០១២
សុខ សាមឿន
ចែករំលែកព័តមាននេះ