រាជធានីភ្នំពេញ ៖ រថយន្ដគណៈបញ្ជាការឯកភាពខណ្ឌទួលគោកបានបុកគ្នាជាមួយម៉ូតូវ៉េវចំពីមុខពេញទំហឹង បណ្ដាលឱ្យអ្នកបើកម៉ូតូដួលបោកក្បាលទៅនឹងថ្នល់ហូរឈាមរងរបួសធ្ងន់ កាលពីវេលាម៉ោង៦និង២០នាទីល្ងាចថ្ងៃទី១៩ កុម្ភៈ នៅចំណុចគល់ស្ពានអាកាស៧មករាខាងកើត តាមបណ្ដោយវិថីកម្ពុជាក្រោមកែងផ្លូវលេខ១២៨ ស្ថិតក្នុងសង្កាត់ទឹកល្អក់ទី១ ខណ្ឌទួលគោក ។
ជនរងគ្រោះឈ្មោះលាភ វិសាល ភេទប្រុស អាយុ១៨ឆ្នាំ ជាសិស្ស ស្នាក់នៅផ្ទះលេខ 91E1 ផ្លូវលេខ១៦០ សង្កាត់ទឹកល្អក់ទី២ ខណ្ឌទួលគោក រងរបួសធ្ងន់ត្រូវបានរថយន្ដសាមុយដឹកបញ្ជូនទៅព្យាបាលនៅគ្លីនិកឯកជន ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្ដគណៈបញ្ជាការឯកភាពខណ្ឌទួលគោក មានសមត្ថកិច្ចនៅលើរថយន្ដ៣នាក់ បើកតាមវិថីកម្ពុជាក្រោមពីកើតទៅលិចក្នុងល្បឿនលឿន ។ ចំណែកម៉ូតូវ៉េវ ពណ៌ខ្មៅ ជិះម្នាក់ឯងតាមផ្លូវលេខ១២៨ ពីត្បូងទៅជើងក្នុងល្បឿនលឿនដូចគ្នា ខណៈមកដល់ចំណុចកើតហេតុ ស្រាប់តែរថយន្ដនិងម៉ូតូបុកគ្នាចំពីមុខពេញទំហឹងតែម្ដង៕
ចែករំលែកព័តមាននេះ