រាជធានីភ្នំពេញ ៖ ថៅកែហាងកាហ្វេ និងជាមេផ្ទះបននៅគល់ស្ពានស្ទឹងមានជ័យម្នាក់ ត្រូវបានជនដៃដល់កាប់នឹងកាំបិតប៉័ងតោដេកស្លាប់ក្នុងបន្ទប់ដែលឃាតកដៃដល់ គឺជាស្ត្រីបនម្នាក់ដែលបានគេចខ្លួនបាត់ ក្រោយកើតហេតុ ។
ការកាប់សម្លាប់មិនញញើតដៃនេះបានធ្វើឱ្យមានការភ្ញាក់ផ្អើលកាលពីវេលាម៉ោង៣ទៀបភ្លឺ ថ្ងៃទី១៣ កុម្ភៈ នៅចំណុចផ្ទះលេខ២០២ ក្រុមទី៥៤ ភូមិទី១៧ ផ្លូវលេខ២៧១ ក្បែរស្ពានស្ទឹងមានជ័យ ក្នុងសង្កាត់បឹងសាឡាង ខណ្ឌទួលគោក ដែលជាផ្ទះបន ជ្រកក្រោមស្លាកលក់កាហ្វេបម្រើផ្លូវភេទ ។
ទោះបីជាយ៉ាងណា តាមព័ត៌មានបានឱ្យដឹងថា សមត្ថកិច្ចបានស្រាវជ្រាវចាប់ខ្លួនស្ត្រីជាឃាតកបានហើយនៅវេលាព្រឹកថ្ងៃទី១៣ កុម្ភៈ នៅច្រកភ្នំដិន ខេត្តតាកែវ ។ ស្ត្រីដែលត្រូវឃាតកសម្លាប់នោះឈ្មោះនាង យ៉ុន ហៅយាយផាន់ អាយុ៥៤ឆ្នាំ ជាខ្មែរកម្ពុជាក្រោម មានទីលំនៅផ្ទះលេខ១៥៨ សង្កាត់ស្ទឹងមានជ័យ និងជួលផ្ទះខាងលើ លក់កាហ្វេ និងបើកបន ។ ស្ត្រីរូបនេះ ត្រូវបានឃាតកកាប់ប្រហារដោយកាំបិតប៉័ងតោ ។ ចំណែកស្ត្រីដៃដល់ជាឃាតកត្រូវបានគេអះអាងថា ឈ្មោះច្រិប អាយុប្រមាណ៣៨ឆ្នាំ ជាខ្មែរកម្ពុជាក្រោម ដែលជាស្ត្រីប្រកបរបរផ្លូវភេទផងដែរ ។
តាមព័ត៌មានឱ្យដឹងថា មុនពេលកើតហេតុនៅក្នុងផ្ទះបនមានមនុស្សចំនួន៤នាក់ ស្នាក់នៅដែលក្នុងនោះស្ត្រីជាមេបនដេកក្នុងបន្ទប់ជាន់ក្រោម ហើយស្ត្រីបន២នាក់ទៀតដេកនៅបន្ទប់ឡៅតឿ និងម្នាក់ជាឃាតកឈ្មោះច្រិប ដេកនៅ ជាន់ក្រោមដែរ ។ បន្ទាប់ពីមានការភ្ញាក់ផ្អើល ស្ត្រីឈ្មោះច្រិប បានគេចខ្លួនបាត់ ។
តាមមន្ត្រីសមត្ថកិច្ចមូលដ្ឋានបានធ្វើការសន្និដ្ឋានជាជំហានដំបូងថា ករណីកាប់ប្រហារនេះជាអំពើប្លន់លាយឡំទៅនឹងបញ្ហាគំនុំ ។ តាមបុរសឈ្មោះកៅ បុក អាយុ៦០ឆ្នាំ ត្រូវជាប្តីស្ត្រីរងគ្រោះបានឱ្យដឹងថា នៅយប់ថ្ងៃកើតហេតុ គាត់បានដេកនៅផ្ទះលេខ១៥៨ ក្នុងសង្កាត់ស្ទឹងមានជ័យ ដែលនៅមិនឆ្ងាយប៉ុន្មានពីកន្លែងកើតហេតុ ។ នៅវេលាម៉ោង៣ទៀបភ្លឺ គាត់បានក្រោកធ្វើដំណើរទៅផ្ទះលក់កាហ្វេ ដើម្បីរៀបចំលក់ដូរដូចធម្មតា ក៏ឃើញទ្វារចំហក៏ស្រែកហៅ ប្រពន្ធ តែមិនឮឆ្លើយតប ក៏បានហៅអ្នកជិតខាងម្នាក់ឈ្មោះយាយស៊ីង យ៉ាង ឱ្យជួយហៅ និងដើរចូលទៅក្នុងផ្ទះ ស្រាប់តែឃើញប្រពន្ធរបស់គាត់ដេកស្លាប់ក្នុងថ្លុកឈាមទៅហើយ ទើបមានការភ្ញាក់ផ្អើលតែម្តង ។
បុរសជាប្តីបានចោទប្រកាន់ថា ស្ត្រីឈ្មោះច្រិបដែលជាឃាតកសម្លាប់ប្រពន្ធរបស់គាត់ក្នុងគោលបំណងប្លន់ ព្រោះស្ថានភាពនៅក្នុងបន្ទប់មានការរើកកាយរករបស់របរដែលមានតម្លៃ។ បុរសជាប្តីបានធ្វើការកត់សម្គាល់នៅមុនពេលកើតហេតុថា កាលពីកន្លះខែមុន ស្ត្រីឈ្មោះច្រិបបាននិយាយជាមួយប្រពន្ធរបស់គាត់សុំសេងហាងក្នុងតម្លៃ២៥០០ដុល្លារ ។ ដោយមានការឯកភាពគ្នាហើយ ឈ្មោះច្រិបបានឱ្យប្រាក់១៥០០ដុល្លារមុន ។ លុះក្រោយមក ម្ចាស់ផ្ទះមិនទុកចិត្ត មិនឱ្យឈ្មោះច្រិបសេងហាង ក៏បានអាក់ខានទៅវិញ ហើយប្រាក់នោះត្រូវប្រពន្ធរបស់គាត់ប្រគល់ឱ្យវិញ តែឈ្មោះច្រិបមិនយក ទំនងជាខឹង មិននឹកស្មានថា ឈ្មោះច្រិបសម្លាប់ប្រពន្ធរបស់គាត់ែបបនេះទេ ។
តាមស្ត្រីឈ្មោះជីម ឌៀប អាយុ២៨ឆ្នាំ ជាស្រីបន បានឱ្យដឹងថា នាងបានមកស្នាក់នៅរកស៊ីលក់ខ្លួនជាមួយប្អូនជាច្រើនខែមកហើយ ដោយបម្រើផ្លូវភេទចែកគ្នា និងជួយមើលការលក់ដូរកាហ្វេ ។ នៅវេលាម៉ោងប្រមាណ១២យប់ ថ្ងៃទី១២ កុម្ភៈ នាងរួមទាំងជនរងគ្រោះ និងស្ត្រីបន២នាក់ទៀតបាននាំគ្នាចាក់សោចូលដេក ។ ស្រាប់តែនៅវេលាទៀបភ្លឺ មានការភ្ញាក់ផ្អើលថា មេបនត្រូវគេសម្លាប់ ។ នៅព្រឹកនោះ សមត្ថកិច្ចចុះទៅ ពិនិត្យកន្លែងកើតហេតុរកឃើញកាំបិតប៉័ងតោ ចោល ដែលឃាតកប្រើកាប់មកលើស្ត្រីរងគ្រោះប្រឡាក់សុទ្ធតែឈាម។ នៅក្នុងបន្ទប់ ត្រូវបានឃាតករើកកាយរបស់របរដែលមានតម្លៃ និងកេសធំមួយដែលដាក់គ្រឿងអលង្ការត្រូវឃាតកចាក់សោលួចយកប្រាក់ និងគ្រឿងអលង្ការអស់ ។
តាមស្ត្រីឈ្មោះចៅ ម៉ាលី អាយុ១៩ឆ្នាំ ត្រូវជាកូនស្ត្រីរងគ្រោះបានឱ្យដឹងថា គ្រឿងអលង្ការ និងប្រាក់ដែលបាត់បង់រួមមានប្រាក់ចំនួន២២០០ដុល្លារ លុយខ្មែរ១លានរៀល គ្រឿងអលង្ការមានខ្សែ.កប្លាទីន១ជីជាង, ខ្សែ.កប្លាទីនរបស់ម្តាយ ទម្ងន់៤ជីកន្លះ, ចិញ្ចៀនមាស២វង់ ទម្ងន់៦ជី, ខ្សែដៃមាសទម្ងន់៤ជី, កងដៃប្លាទីនតម្ងន់១,៨ជី ដែលសរុបប្រមាណជិត២តម្លឹង ។
សពត្រូវសមត្ថកិច្ចបញ្ជូនទៅកាន់ឈាបនដ្ឋានវត្តស្ទឹងមានជ័យ ដើម្បីធ្វើការត្រួតពិនិត្យ។ តាមការពិនិត្យសព ត្រូវឃាតកកាប់ចិញ្ច្រាំជាច្រើនកាំបិតចំក ថ្ពាល់ និងគុម្ពត្រចៀកស្តាំ កំភួនដៃស្តាំ ស្មាស្តាំ និងដៃខាងឆ្វេង ។ តាមស្លាកស្នាម សមត្ថកិច្ចឱ្យដឹងថា ជនរងគ្រោះបានដឹងខ្លួន និងយកដៃរងនៅពេលដែលឃាតកកាប់មកលើ ។
តាមព័ត៌មានឱ្យដឹងថា បន្ទាប់ពីមានរឿងឃាតកម្ម សមត្ថកិច្ចខណ្ឌទួលគោក និងប៉ូលិសប៉ុស្តិ៍បានធ្វើការស្រាវជ្រាវយ៉ាងសកម្មឈានទៅឃាត់ខ្លួនបុរស២នាក់ដែលជាអ្នកផ្សំគំនិតដែលបានជូនឃាតកទៅខេត្តតាកែវ និងទទួលបានប្រាក់មួយចំនួន ។ ចំណែកជនដៃដល់ត្រូវបានប៉ូលិសខេត្តតាកែវចាប់ខ្លួននៅភ្នំដិន ស្រុកគិរីវង្ស ខេត្តតាកែវ ។
អ្នកយកព័ត៌មានកោះសន្តិភាពរាយការណ៍ពីខេត្តតាកែវឱ្យដឹងថា ស្ត្រីដៃដល់ម្នាក់ត្រូវបានប៉ូលិសនៃស្នងការដ្ឋាននគរបាលខេត្តតាកែវឃាត់ខ្លួន បន្ទាប់ពីទទួលព័ត៌មានពីរាជធានីភ្នំពេញថា ស្ត្រីដៃដល់ដែលសម្លាប់មនុស្សបានរត់គេចចូលមកលាក់ខ្លួននៅលើដីខេត្តតាកែវ ។ ដោយមានកិច្ចសហការគ្នាល្អរវាងប៉ូលិសខេត្ត និងប៉ូលិសរាជធានីនោះ ទើបជនដៃដល់ត្រូវបានឃាត់ខ្លួន។
ការឃាត់ខ្លួនស្ត្រីជាឃាតកដៃដល់នេះ បាននៅវេលាម៉ោង១២ និង៣០នាទីថ្ងៃត្រង់ ថ្ងៃទី១៣ កុម្ភៈ នៅផ្ទះសំណាក់ជំនោរមាត់បឹង ដែលស្ថិតនៅភូមិ២ សង្កាត់រកាក្នុង ក្រុងដូនកែវ ។
លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា បន្ទាប់ពីបានទទួលព័ត៌មានពីប៉ូលិសរាជធានីភ្នំពេញ នៅវេលាម៉ោង៨ព្រឹក លោកឧត្តមសេនីយ៍ត្រីអ៊ុក សំណាង ស្នងការនគរបាលខេត្តបានបញ្ជាកម្លាំងគ្រប់ការិយាល័យទាំងអស់ចុះទៅស្រាវជ្រាវគ្រប់ផ្ទះសំណាក់ក្នុងខេត្ត ព្រោះប៉ូលិសរាជធានីរាយការណ៍អំពីករណីឃាតកម្ម គិតទុកជាមុននៅទីនោះ ហើយឃាតកអាចរត់មកលាក់ខ្លួននៅខេត្តតាកែវ ទើបលោកឧត្តមសេនីយ៍ស្នងការបានបញ្ជាយ៉ាងម៉ឺងម៉ាត់ដល់កម្លាំងប៉ូលិសត្រូវប្រើគ្រប់មធ្យោបាយ ដើម្បីឃាត់ខ្លួនជនដៃដល់ឱ្យខាងតែបាន ហើយពេលនោះបានដឹងពីផ្ទះសំណាក់ដែលស្ត្រីដៃដល់នោះស្នាក់នៅ ។
ម្ចាស់ផ្ទះសំណាក់ជំនោរមាត់បឹងបាននិយាយថា ស្ត្រីសង្ស័យបានចូលទៅដេកនៅផ្ទះ សំណាក់នៅវេលាម៉ោង៤ទៀបភ្លឺ នៅបន្ទប់ជាន់លើ ប៉ុន្តែនៅពេលប៉ូលិសទៅដល់ស្ត្រីដៃដល់បានចេញមកក្រៅ ។ លុះត្រឡប់ចូលវិញវេលាម៉ោងខាងលើ ទើបត្រូវប៉ូលិសឃាត់ខ្លួនបាន ។
លោកនាយការិយាល័យព្រហ្មទណ្ឌកម្រិតធ្ងន់បានបន្តទៀតថា វត្ថុតាងនៅជាប់ខ្លួនស្ត្រីឃាតកនោះរួមមានប្រាក់២លានរៀល, លុយ៥០ដុល្លារអាេមរិក, ខ្សែ.ក៣ខ្សែ, ទូរស័ព្ទ២គ្រឿង និងខោអាវមួយកាបូប ។ លោកបន្តថា ករណីនេះ កម្លាំងប៉ូលិសខេត្តគ្រាន់តែជាកម្លាំងសហការ ហើយជនដៃដល់ និងវត្ថុតាងនឹងត្រូវប្រគល់ទៅឱ្យប៉ូលិសខណ្ឌទួលគោក រាជធានី ភ្នំពេញ ដើម្បីចាត់ការតាមនីតិវិធីច្បាប់ ។
មន្ត្រីប៉ូលិសខណ្ឌទួលគោកដែលមកទទួលជនដៃដល់បាននិយាយថា ស្ត្រីជនដៃដល់នេះ អាយុ៣៥ឆ្នាំ មានស្រុកកំណើតនៅភូមិត្រពាំងត្រាវ ឃុំជាងទង ស្រុកជីទង ខេត្តអាងយ៉ាង ប្រទេសវៀតណាម បានមករកស៊ីលក់កាហ្វេជាមួយស្ត្រីរងគ្រោះ ។
ស្ត្រីដៃដល់បានសារភាពពីមូលហេតុនៃការសម្លាប់ស្ត្រីមេបនប្រាប់ប៉ូលិសថា មកពីស្រ្តីរងគ្រោះជំពាក់លុយ១៥០០ដុល្្លារទារមិនព្រមសង ទើបខ្លួនកាប់សម្លាប់តែម្តង ។ យប់នោះ ស្ត្រីរងគ្រោះដេកក្នុងបន្ទប់ ឯខ្លួនដេកពីមុខបន្ទប់ ។ លុះដល់ពេលកើតហេតុ ខ្លួនកាន់កាំបិតប៉័ងតោចូលទៅកាប់ តែគាត់ភ្ញាក់ទាន់ ក៏បានប្រតាយប្រតប់គ្នា តែគាត់ដួល ខ្លួនក៏កាប់បំពង់ក២ ទៅ៣កាំបិតរហូតដល់ស្លាប់ ទើបប្រមូលខោអាវ និងរបស់របររត់មកតែម្តង ។
ជុំវិញព័ត៌មានក្រោយពីឃាត់ខ្លួនស្ត្រីដៃដល់ជាឃាតកបានហើយ សមត្ថកិច្ចខណ្ឌទួលគោក បានឈានមួយជំហានទៀតទៅឃាត់ខ្លួននិស្សិត២នាក់ ដែលក្នុងនោះមានសង្សាររបស់ស្ត្រីជាឃាតកម្នាក់ដែលគេសង្ស័យថា បានជាប់ពាក់ព័ន្ធផ្សំគំនិតនិងបានទទួលផលប្រយោជន៍ក្នុងរឿងប្លន់សម្លាប់នេះដែរ ។
ជនសង្ស័យដែលឃាត់ខ្លួនម្នាក់ឈ្មោះកែវ ឈុនឡេង ភេទប្រុស អាយុ២៣ឆ្នាំ ជានិស្សិតឆ្នាំទី២ មានទីលំនៅ ក្នុងសង្កាត់បឹងសាឡាង មានស្រុកកំណើតស្រុកទ្រាំង ខេត្តតាកែវ ដែលត្រូវជាសង្សាររបស់ស្ត្រីជាឃាតក និងម្នាក់ទៀតឈ្មោះស៊ីន សុខណា ហៅទីណា ជានិស្សិតមានលំនៅផ្ទះលេខ២០BEo ផ្លូវលេខ១៤១ សង្កាត់បឹងព្រលិត ខណ្ឌ៧មករា ។
ឈ្មោះកែវ ឈុនឡេង ត្រូវជាសង្សារជនដៃដល់បានឱ្យដឹងថា ខ្លួនបានស្គាល់ និងស្រឡាញ់គ្នាជាមួយឈ្មោះច្រឹប រយៈពេល៥ខែមកហើយតាំងពីអំឡុងខែវិច្ឆិកា ឆ្នាំ២០១១ ។ ឈ្មោះច្រឹប បានខ្ចីប្រាក់ខ្លួនចំនួន៧០០ដុល្លារ ដើម្បីយកទៅសេងហាង ដែលខ្លួនបានលក់ម៉ូតូវីវ៉ាមួយគ្រឿងយកប្រាក់ឱ្យនាងខ្ចី ។ បុរសរូបនោះបន្តទៀតថា លុះក្រោយមកខ្លួនបានទាក់ទងស្ត្រីរូបនេះ ដើម្បីទារប្រាក់យកមកទិញម៉ូតូវិញ ។ នៅវេលាម៉ោង៨យប់ថ្ងៃទី១២ កុម្ភៈ នៅពេលដែលខ្លួនកំពុងដេកជាមួយសង្សារម្នាក់ទៀត ស្រាប់តែឈ្មោះច្រឹប ទូរស័ព្ទប្រាប់ថា នៅវេលាម៉ោង៣ភ្លឺបង មកយកប្រាក់ចុះ និងសន្យាឱ្យ១.៥០០ដុល្លារ ។ លុះដល់វេលាម៉ោង២ទៀបភ្លឺឈានចូលថ្ងៃទី១៣ កុម្ភៈ ឈ្មោះច្រឹប បានទូរស័ព្ទឱ្យទៅយកប្រាក់និងណាត់ជួបនៅស្តុបផ្សារដើមគ ។ ដោយខ្លាចពេលយប់ស្ងាត់ខ្លួនបានឱ្យឈ្មោះស៊ិន សុខណា ហៅទីណា ជូនទៅហើយត្រូវឈ្មោះច្រឹបឱ្យជូនទៅតាខ្មៅ ។ ពេលដល់តាខ្មៅឱ្យជូនទៅខេត្តតាកែវទៀត ហើយចូលដេកផ្ទះសំណាក់ជំនោមាត់បឹង និងឱ្យប្រាក់ចំនួនជាង៣.០០០ដុល្លារ ដើម្បីឱ្យទិញម៉ូតូ ហើយខ្លួន និងមិត្តភក្តិក៏ជិះម៉ូតូត្រឡប់មកផ្ទះជួលនៅសង្កាត់បឹងសាឡាង វិញស្រាប់តែនៅវេលាម៉ោងប្រមាណ៨ព្រឹកប៉ូលិសចុះទៅឃាត់ខ្លួនតែម្តង ៕
ចែករំលែកព័តមាននេះ