ខេត្តស្ទឹងត្រែង ៖ ក្រុមហ៊ុនដីសម្បទានសេដ្ឋកិច្ចដំឡូងមីចំកាត់របស់លោកកែវ វុទ្ធី នៅឃុំអូរស្វាយ ស្រុកថាឡាបរិវ៉ាត់ ត្រូវប្រជាពលរដ្ឋនៅតំបន់នោះនិយាយថា កំពុងតែដុតភ្លើងឱ្យឆេះឈើហុបមូលរាប់ពាន់កំណាត់ចោលទៀតហើយ បន្ទាប់ពីក្រុមហ៊ុននេះបានដុតឈូសឆាយដីព្រៃរាប់ពាន់ហិកតា គ្មានការដាំដុះ កាលពីឆ្នាំ២០១១ កន្លងទៅ ។
ប្រជាពលរដ្ឋនៅតំបន់នោះសម្តែងការសោកស្តាយ ចំពោះព្រៃឈើនៅតំបន់នោះថា ជាចម្ការឈើនាងនួន ដុះតម្រៀបគ្នាដូចដើមទៀន មិនគួរក្រុមហ៊ុននេះ ឈូសឆាយគ្មានស្តាយស្រណោះទុកឱ្យឆេះបែបនេះឡើយ ។
ប្រជាពលរដ្ឋបន្តថា សមត្ថកិច្ចមានការរើសអើងគួរឱ្យស្អប់ណាស់ត្រង់ប្រជាជនអារឈើធ្វើផ្ទះរស់នៅមិនបានទេ រករឿងរហូតរុះផ្ទះចោលវិញ ។ ដល់ពេលក្រុមហ៊ុននេះឈូសដើមឈើដុតសន្ធោសន្ធៅឆេះចោលរាប់ពាន់ហិកតា គ្មានសមត្ថកិច្ចណាអើពើទប់ស្កាត់ បណ្តោយឱ្យក្រុមហ៊ុននេះបន្តការកាត់ឈើធំៗមកអារច្រៀក ចំណែកដើមតូចៗទុកឱ្យភ្លើងឆេះចោលដដែល ។
គេដឹងថា ក្រុមហ៊ុននេះបានទទួលអាជ្ញាប័ណ្ណជាង១០ឆ្នាំហើយ លើផ្ទៃដី៧.០០០ហិកតា មិនឃើញអភិវឌ្ឍអ្វីជាដុំកំភួនទេ ឃើញដាំដើមមៃសាក់នៅមាត់ផ្លូវលម្អឱ្យគេមើលបានប្រហែលជាង១ហិកតាប៉ុណ្ណោះ ។
ពាក់ព័ន្ធដល់ករណីមិនប្រក្រតីនេះ ចំពោះក្រុមហ៊ុនគេឃើញមានមន្រ្តីពាក់ព័ន្ធច្រើនស្ថាប័ន មកសួរសុខទុក្ខជាហូរហែ ប៉ុន្តែគ្រាន់តែមកជួបក្រុមហ៊ុន ហើយត្រឡប់ទៅវិញរៀងៗខ្លួនអត់ឈើក្បាលទេប្រកបដោយទឹកមុខសប្បាយរីករាយ ។ គេមិនដឹងជាធ្វើរបាយការណ៍ជូនថ្នាក់លើយ៉ាងដូចម្តេចទេ បានជាគ្មានវិធានការអ្វីសោះ ។
មន្រ្តីជំនាញរដ្ឋបាលព្រៃឈើម្នាក់បានឱ្យដឹងថា ឈើហុបមូលដែលកំពុងតែឆេះចោលនោះ ក៏ព្រោះតែភ្លើងឆេះព្រៃក្នុងរដូវនេះរាលដាល ដល់ឈើទាំងនោះ ធ្វើឱ្យក្រុមហ៊ុនទប់ស្កាត់មិនបាន ប្រមូលមិនទាន់ ក៏មានករណីឆេះយ៉ាងដូច្នោះ ។
លោកសិទ្ធ សំណាង នាយផ្នែករដ្ឋបាលព្រៃឈើស្ទឹងត្រែងបានឱ្យដឹងនៅព្រឹកថ្ងៃទី៧ កុម្ភៈនេះថា ទោះបីជាឈើហុបរបស់ក្រុមហ៊ុនមានការឆេះយ៉ាងណានោះ វាជារឿងរបស់ក្រុមហ៊ុន ព្រោះឈើហុបដែលកាប់រំលំរួចហើយ បានបង់ពន្ធចូលរដ្ឋរួចទៅហើយ ។ តែចំពោះក្រុមហ៊ុនធ្វើការអភិវឌ្ឍ ឬមិនអភិវឌ្ឍ គឺស្ថិតនៅលើអង្គភាពជំនាញផ្សេងជាអ្នកត្រួតពិនិត្យ ព្រោះជំនាញរបស់លោកមានសមត្ថកិច្ចត្រឹមតែត្រួតពិនិត្យលើព្រៃឈើតែប៉ុណ្ណោះ ។
លោកទូច ធា ប្រធានមន្ទីរកសិកម្មរក្ខាប្រមាញ់ និងនេសាទខេត្ត បានឱ្យដឹងផងដែរថា ក្រុមហ៊ុនដីសម្បទានសេដ្ឋកិច្ចដំឡូងមីចំកាត់របស់លោកកែវ វុទ្ធី មានផ្ទៃដីត្រឹមតែ៦.៤០០ហិកតាប៉ុណ្ណោះ បានទទួលអាជ្ញាប័ណ្ណតាំងពីឆ្នាំ២០០១ ហើយបានឱ្យក្រុមហ៊ុនដាំដំណាំកសិឧស្សាហកម្មដូចជា ដើមម៉ៃសាក់ កៅស៊ូជាដើម ។
លោកបានបន្តថាចំពោះការឈូសឆាយរបស់ក្រុមហ៊ុនគេធ្វើឡើងនារដវប្រាំង លុះពេលរដូវវស្សាទើបក្រុមហ៊ុនធ្វើការដាំដុះហើយពេលបច្ចុប្បន្នក្រុមហ៊ុនកំពុងតែបណ្តុះកូនកៅស៊ូ សម្រាប់ដាំនៅរដូវវស្សា ។ ម្យ៉ាងទៀត ក្នុងពេលដ៏ខ្លីខាងមុខ មន្ទីរសាមីរួមទាំងស្ថាប័ន និងបង្កើតគណៈកម្មការចុះធ្វើការត្រួតពិនិត្យលើក្រុមហ៊ុនដីសម្បទានសេដ្ឋកិច្ចក្នុងខេត្តស្ទឹងត្រែង ទើបហ៊ានវាយតម្លៃថា ក្រុមហ៊ុនណាខ្លះធ្វើការអភិវឌ្ឍ ឬមិនអភិវឌ្ឍ ។
ចំពោះករណីឈូសឆាយរបស់ក្រុមហ៊ុន និងការឆេះឈើក្នុងដីក្រុមហ៊ុនតើមានផលប៉ះពាល់អ្វីខ្លះនោះទៅលើរដ្ឋលោកធានិយាយថា គឺមានតែជំនាញរដ្ឋបាលព្រៃឈើទេ ដែលធ្វើការវាយតម្លៃបានទៅលើក្រុមហ៊ុន ។
មតិនានាក្នុងខេត្តគេលើកឡើងថា ប្រសិនបើក្រុមហ៊ុនមួយនេះទទួលអាជ្ញាប័ណ្ណតាំងពីឆ្នាំ២០០១ មក រហូតដល់ពេលនេះមិនមានការដាំដុះអ្វីជាដុំកំភួននោះ ហើយមានតែការកាប់ឈើយកកែឆ្នៃនាំចេញ មិនមានការអភិវឌ្ឍទៅលើការដាំបន្តឱ្យតុល្យភាពជាមួយការឈូសឆាយនោះទេ គេសន្និដ្ខានថា ក្រុមហ៊ុននេះគ្រាន់តែឈូសយកឈើអស់ពីដីហើយនោះ ប្រហែលជាស្វែងរកម៉ូយថ្មីមកជំនួសវិញ ។
ចំណែកតំណាងក្រុមហ៊ុនកែវវុទ្ធី ម្សិលមិញនេះកោះសន្និភាព មិនអាចសុំការបំភ្លឺបានទេ ៕
ចែករំលែកព័តមាននេះ