រាជធានីភ្នំពេញ ៖ ស្ត្រីកំសត់ម្នាក់ត្រូវប្តីមហាកំណាចសាហាវយង់ឃ្នងវាយធ្វើបាប និងធ្វើទារុណកម្មលើសពីសត្វដូចជាច្របាច់ក, ទាត់ធាក់, យករណារអារសាច់ និងបើកឡានកិនសម្លាប់ទារកក្នុងផ្ទៃ ហើយអំពើឃោរឃៅចុងក្រោយគឺច្របាច់.កស្ត្រីជាប្រពន្ធឱ្យសន្លប់ ហើយយករណារអារជើងថែមទៀត បណ្តាលឱ្យមានការរន្ធត់សោកសៅអាណោចអាធ័ម និងភ្ញាក់ផ្អើលកាលពីវេលាម៉ោង៩យប់ ថ្ងៃទី៥ កុម្ភៈ ឆ្នាំ២០១២ ។ គ្រួសារកំសត់នេះរស់នៅក្នុងភូមិឡកំបោរ ក្រុមទី៥ សង្កាត់ស្វាយប៉ាក ខណ្ឌឫស្សីកែវ ។
ស្ត្រីកំសត់ឈ្មោះវង ធារី អាយុ៤៦ឆ្នាំ បានរៀបរាប់ឱ្យដឹងថា គាត់មានប្តីដំបូងឈ្មោះយស់ រិទ្ធី អាយុ៤៨ឆ្នាំ ធ្វើទាហានអាសេអូ រថពាសដែក បានកូនស្រី៥នាក់ ហើយនៅឆ្នាំ២០០០ ប្តីបានស្លាប់បាត់បង់ជីវិត បន្សល់ទុកកូនស្រីទាំង៥នាក់ ដែលគាត់ជាអ្នកមើលថែ។
រស់នៅក្នុងភាពជាស្ត្រីមេម៉ាយបានប្រមាណមួយឆ្នាំ មានបុរសម្នាក់ឈ្មោះលឹម ថន អាយុ៤០ឆ្នាំ មុខរបររត់ម៉ូតូឌុប មានទីលំនៅភូមិឈ្វាំង ឃុំឈ្វាំង ស្រុកពញាឮ ខេត្តកណ្តាល បានឱ្យចាស់ទុំចូលស្តីដណ្តឹងរៀបចំសែនព្រេនតាមប្រពៃណី សេពគប់គ្នាជាប្តីប្រពន្ធ រហូតមកដល់បច្ចុប្បន្ន ។
ស្ត្រីកំសត់ វង ធារី បានបន្តថា កាលពីឆ្នាំ២០០៨ គាត់ទិញរថយន្តទួរីស១៥កៅអីមួយគ្រឿង ហើយតែងតែនាំប្តីប្រពន្ធទៅទិញធ្យូងនៅគីរីរម្យ ស្រុកភ្នំស្រួច ខេត្តកំពង់ស្ពឺ យកមកលក់នៅផ្សារព្រែកព្នៅ បានកាក់កបគ្រាន់បើដែរ ប៉ុន្តែមិនសល់លុយកាក់ជាដុំកំភួននោះទេ ព្រោះតែប្តីក្រោយនេះ ដើរផឹកស្រាសប្បាយចាយវាយខ្ជីខ្ជាបំផ្លាញគ្មានសល់ទេ ។ និយាយពីប្តីក្រោយនេះវិញ ជាមនុស្សចូលចិត្តផឹកស្រាស្ទើររៀងរាល់ថ្ងៃ… ពីមួយឆ្នាំទៅមួយឆ្នាំរូបគាត់មានកូនជាមួយប្តីក្រោយនេះ៣នាក់ទៀត គឺប្រុសទាំង៣នាក់ កូនបងអាយុជាង១០ឆ្នាំ កំពុងរៀនសូត្រនៅតាមសាលាទាំងលំបាក ។ គាត់រៀបរាប់ថា ក្រោយៗមកទៀតរូបគាត់មានផ្ទៃពោះជាថ្មីទៀត លុះពេលជិតគ្រប់ខែនៅសល់តែ១៩ថ្ងៃទៀតប៉ុណ្ណោះដល់ថ្ងៃសម្រាលកូនទៅហើយ គាត់បានទៅឆ្លុះអេកូ គ្រូពេទ្យប្រាប់ថា មានកូនភ្លោះ ប្រុសម្នាក់ និងស្រីម្នាក់ ។ ហើយទន្ទឹមនឹងស្ថានភាពបែបនេះ គាត់ខំប្រឹងរកប្រាក់សន្សំទុក ដើម្បីសម្រាលកូន ប៉ុន្តែមិនចោលការងាររកសីុទេ គឺនៅតែទៅទិញធ្យូងជាមួយប្តីយកមកលក់ដដែល ។ រឿងជូរចត់បំផុតមួយដែលមិនអាចបំភ្លេចបានក្នុងឆាកជីវិត គឺនៅថ្ងៃទី១០ មេសា ឆ្នាំ២០០៨ រូបគាត់បានទៅទិញធ្យូងជាមួយប្តីនៅគិរីរម្យ ។ ពេលដែលទិញធ្យូងបានហើយ ប្តីក៏ទៅអង្គុយផឹកសីុជាមួយទាហាននៅគិរីរម្យនោះរហូតស្រវឹងជោកជាំ ឃើញបែបនេះគាត់បានយកសោរថយន្តលាក់មិនព្រមត្រឡប់ទៅផ្ទះវិញទេ ដោយគិតថា សម្រាកនៅទីនោះមួយយប់សិន ព្រោះពេលដែលប្តីស្រវឹងម្តងៗបើករថយន្តលឿនខ្លាំងណាស់ ខ្លាចជួបគ្រោះថ្នាក់តាមផ្លូវ ។ បន្ទាប់ពីផឹកសីុស្រវឹងទ្រេតទ្រោតហើយនោះ ប្តីបានឡើងបើករថយន្តស្រែកទារសោពីគាត់ជាប្រពន្ធ តែគាត់មិនព្រមឱ្យសោទេ ធ្វើឱ្យបុរសជាប្តីខឹងមួម៉ៅក្តៅក្រហាយកំរោលបួនជ្រុង បានយកកន្ត្រៃកាត់ក្រចកឆ្កឹះចាក់សោរថយន្តបញ្ឆេះឆេះរួចប្រុងបើកចេញទៅ ។ ឃើញដូច្នេះរូបគាត់ស្ទុះទៅ លូកដៃទាញយកកាបូបប្រាក់ដែលដាក់នៅក្នុងរថយន្ត ក៏ត្រូវប្តីទាញទ្វាររថយន្តបិទកៀបជាប់ដៃជាមួយរថយន្ត ហើយរថយន្តចេះតែទៅមុខអូសប្រមាណ៣០ម៉ែត្រ ទើបជ្រុះធ្លាក់ ពោលគឺបើថា ឱ្យប្តីមានចិត្តធម៌ឈប់រថយន្តដាក់ប្រពន្ធឱ្យជិះបានស្រួលនោះ ពិតជាមិនអាចទេ ប្តីនេះ ឃោរឃៅណាស់ គឺបើកអូសទាល់តែរបូតធ្លាក់រូបគាត់។ ពេលនោះរូបគាត់ត្រូវកង់ក្រោយរថយន្តកិនពីលើភ្លៅ និងដៃ បណ្តាលឱ្យបាក់ឆ្អឹង និងរយះសាច់ទាំងដុំៗ ។ ចំណែកលោកប្តីឃោរឃៅគិតតែពីបើករថយន្តទៅមុខ ហើយមើលតាមកញ្ចក់ឃើញរូបគាត់រងរបួសបែបនេះ ស្រាប់តែថយក្រោយមកវិញកិនពីលើរូបគាត់ចំពោះដែលកំពុងតែមានផ្ទៃពោះ បណ្តាលឱ្យបែកពោះបាក់ភ្លៅ រួចទើបបើករថយន្តចេញទៅបាត់ស្រមោលតែម្តង ។
ស្ត្រីកំសត់បានរៀបរាប់ទាំងទឹកភ្នែកទៀតថា បន្ទាប់ពីប្តីចិត្តកំណាចបើកកិនពីលើរួចមក រូបគាត់ត្រូវអ្នកនៅជិតកន្លែងកើតហេតុជួយយកអាសាបញ្ជូនទៅសង្គ្រោះនៅមន្ទីរពេទ្យខេត្តកំពង់ស្ពឺ មិនយូរប៉ុន្មានក៏ត្រូវបញ្ជូនបន្តមកព្យាបាលនៅមន្ទីរពេទ្យព្រះកុសុមៈ ហើយពេលនោះគ្រូពេទ្យប្រាប់ថា កូនទាំងពីរនៅក្នុងពោះបានស្លាប់បាត់បង់ជីវិតទៅហើយ គ្រូពេទ្យបានត្រឹមតែធ្វើការជួយសង្គ្រោះអាយុជីវិតគាត់ ។ ចាប់តាំងពីពេលនោះមករូបគាត់ធ្លាក់ខ្លួនជាស្រីពិការជើងឆ្វេង និងស្ពឹកដៃឆ្វេង ដើរ និងកាន់អ្វីមិនកើត ។ ក្រោយមកម្តាយរបស់ប្តីក្រោយ និងបងប្អូនបានទៅអង្វរគាត់កុំឱ្យប្តឹងប្តល់ប្តីធ្វើអ្វី ដោយលើកហេតុផលថា យើង (រូបគាត់) ធ្លាក់ខ្លួនពិការទៅហើយ ទុកប្តីគ្រាន់ជួយរកស៊ីចិញ្ចឹមកូន។ កាលណោះរូបគាត់ក៏ជឿតាមសម្តីម្តាយក្មេកមិនបានប្តឹងប្តល់អ្វីទេ ដោយសុខចិត្តនៅផ្ទះមើលថែទាំកូនទាំងអស់៨នាក់ ក្នុងនោះកូនប្តីមុន៥នាក់ និងកូនប្តីក្រោយប្រុស៣នាក់ ។
ថ្លែងពីប្តីចិត្តកំណាចរូបនោះវិញ ចាប់តាំងពីបើករថយន្តកិនរូបគាត់ជាប្រពន្ធម្តងរួចមក គឺតែងតែផឹកស្រារករឿងវាយធ្វើបាបរូបគាត់នៅក្នុងផ្ទះជាប្រចាំអត់ប្រែជំនិតសោះ ។ ស្ត្រីកំសត់រៀបរាប់ពីការឈឺចាប់ទៀតថា នៅថ្ងៃកើតហេតុចុងក្រោយនេះ បន្ទាប់ពីប្តីត្រឡប់មកពីមើលកីឡាប្រដាល់វិញ ក៏ផឹកស្រាស្រវឹងជោកជាំ ហើយបានសំឡុតទារលុយពីគាត់យកទៅផឹកស្រាថែមទៀត ។
ពេលនោះរូបគាត់ប្រាប់ថា «អត់មានលុយទេ ក្នុងមួយថ្ងៃប្តីរត់ម៉ូតូឌុបបានលុយឱ្យតែមួយមឺុនរៀលទេ សម្រាប់ទិញអង្ករ ម្ហូបអាហារប្រចាំថ្ងៃ ហើយមានសល់មកពីណា?» ស្រាប់តែប្តីឃោរឃៅរូបនោះធាក់គាត់មួយជើងត្រូវពោះ និងស្ទុះមកច្របាច់.ក បណ្តាលឱ្យសន្លប់ រួចយករណារអារជើងម្ខាងដែលស្វិតរបស់គាត់ទៀត ។ ស្ត្រីអភ័ព្វរូបនេះរៀបរាប់ទាំងទឹកភ្នែកហូររហាមថា លោកប្តីប្រើហិង្សាលើសរបបប៉ុលពតទៅទៀត ។ ពេលប្រព្រឹត្តឃោរឃៅនោះត្រូវអ្នកជិតខាងឃើញ និងមកជួយឃាត់ ប៉ុន្តែត្រូវប្តីឃោរឃៅគំរាមគេថា កុំមកចេះដឹងរឿងគ្រួសាររបស់គាត់ ហើយពេលនោះគ្មានអ្នកហ៊ានសម្របសម្រួល ឬរកខុសរកត្រូវទេ ។ ពេលវាយតប់រូបគាត់ជាប្រពន្ធសន្លប់ស្តូកស្តឹងហើយ ក៏ស្ទុះទៅវាយកូនស្រីប្តីមុនរបស់គាត់ថែមទៀត ឈ្មោះយស ស្រីម៉ុច អាយុ១៤ឆ្នាំ វាយដួលចូលចង្ក្រានធ្វើឱ្យកូនប្រុសទាំង៣នាក់ដែលនៅតូចៗភ័យតក់ស្លុតញ័រចំប្រប់ស្រែកយំពេញផ្ទះ ។
ក្រោយពេលបង្កហិង្សាក្នុងគ្រួសារលើកនេះហើយ ក៏ត្រូវសមត្ថកិច្ចឃាត់ខ្លួនបុរសជាប្តីនោះយកទៅបានមួយយប់ ស្រាប់តែដោះលែងមកវិញ ។ ចំណែកស្ត្រីជាប្រពន្ធសន្លប់ស្តូកស្តឹងត្រូវបងថ្លៃប្រុសឈ្មោះយូ ប៊ុនថៃ អាយុ៤៨ឆ្នាំ ជូនទៅសង្គ្រោះនៅមន្ទីរពេទ្យព្រះកុសុមៈ និងឱ្យប្រាក់ខ្ចីចំនួន៤មឺុនរៀលទៀត ដើម្បីទិញអីញ៉ាំ និងគ្រាន់សម្រាលទុក្ខលំបាកពេលដេកព្យាបាលនៅមន្ទីរពេទ្យ ព្រោះរូបគាត់គ្មានប្រាក់មួយសេននៅនឹងខ្លួនទេ ។
ស្ត្រីរងគ្រោះបានថ្លែងថា បច្ចុប្បន្នគាត់សម្រេចចិត្តថា នឹងលែងលះប្តីចិត្តកំណាចនេះហើយ ដើម្បីរំដោះខ្លួនឱ្យចេញផុតពីនរកលោកិយដែលកំណាចគ្រប់គ្រងលើរូបគាត់អស់រយៈពេលជាច្រើនឆ្នាំមកហើយនេះ ។ គាត់និយាយថា ប៉ុន្តែអ្វីដែលសំខាន់នោះ គឺខ្ញុំមិនអស់ចិត្តនឹងសមត្ថកិច្ចដែលចាប់ខ្លួនប្តីកំណាចនោះហើយ ម្តេចមិនចាត់ការតាមច្បាប់? ការធ្វើទារុណកម្មមកលើខ្ញុំតាំងពីជើងនៅល្អរហូតដល់ពិការដើរលែងរួច ទោះជាយកអ្វីៗមកសង ឬប៉ះប៉ូវក៏មិនស្មើដែរ…. ហេតុអ្វីក៏ដោះលែងវិញបែបនេះ?
ព័ត៌មានចុងក្រោយទៀតឱ្យដឹងថា នៅយប់ថ្ងៃទី៧ កុម្ភៈ នេះ ក្រោយពីផឹកស្រវឹងដាបហើយ លោកប្តីកំណាចរូបនេះ បានមកដល់ផ្ទះ ។ កូនៗដែលនៅចាំផ្ទះគ្រាន់តែឮសំឡេងឪពុកមកដល់ក៏ស្ទុះទៅបិទទ្វារផ្ទះ ហើយសម្ងំឈឹងទាំងញ័រដូចកូនសត្វ ។ អ្នកជិតខាងនិយាយថា ខឹងហៅកូនមិនបើកទ្វារផ្ទះឱ្យ ឪពុកកំណាចក៏ធាក់ទម្លាយទ្វារបាន ព្រមទាំងស្រែកគំរាមកូន និងសួររកប្រពន្ធ តើបាត់ទៅណា? កូនៗភ័យពេកបានប្រាប់ថា ម្តាយទៅដេកពេទ្យហើយ ។ សួរថា ដេកពេទ្យណា? កូនៗមិនហ៊ានប្រាប់ថា ដេកពេទ្យលោកសង្ឃទេ ព្រោះខ្លាចទៅធ្វើបាបម្តាយនៅពេទ្យ ក៏ប្រាប់ថា ទៅដេកពេទ្យកាល់ម៉ែត ជាន់ទី៥ ។
ចំណែកម្តាយដែលនៅព្យាបាលក្នុងមន្ទីរពេទ្យព្រះកុសុមៈ បានដឹងរឿងនេះក៏ភ័យញ័រខ្លួនឯង ព្រោះខ្លាចលោកប្តីតាមមកប្រើហិង្សានៅក្នុងមន្ទីរពេទ្យ ។
នៅក្នុងមន្ទីរពេទ្យព្រះកុសុមៈ ស្ត្រីរងគ្រោះផ្តាំតាមកោះសន្តិភាពថា សូមឱ្យសមត្ថកិច្ចជួយរកយុត្តិធម៌ឱ្យគាត់ផង សូមចាប់ប្តីកំណាចនោះបញ្ជូនឱ្យច្បាប់ផ្តន្ទាទោសផង បើទុកតទៅទៀត រូបគាត់ និងកូនទាំង៥នាក់ច្បាស់ជាគ្មានជីវិតរស់នៅទេ ។ គាត់សម្រេចលែងយកធ្វើជាប្តីទៀតហើយ ។ ស្ត្រីរូបនេះក៏បានសំណូមពរផងដែរ សូមអង្គការស្ត្រីមានវិបត្តិដែលតែងតែជួយស្ត្រីគ្រប់រូបនោះមេត្តាជួយគាត់ និងកូនៗទាំង៥នាក់ផង ពេលនេះគ្មានអ្វីទីពឹងទៀតទេ ៕
ចែករំលែកព័តមាននេះ