រាជធានីភ្នំពេញ ៖ ផ្ទាំងកញ្ចក់ទូរទស្សន៍ដ៏ធំ និងមានតែមួយគត់នៅកម្ពុជា ត្រូវគេរៀបចំដាក់នៅទីលានបាល់ទាត់នៃពហុកីឡដ្ឋានជាតិ ដើម្បីបញ្ចាំងការផ្សាយបន្តផ្ទាល់រាល់ព្រឹត្តិការណ៍នៃការប្រកួតបាល់ទាត់ថ្នាក់ជាតិ និងថ្នាក់អន្តរជាតិ។ ទូរទស្សន៍នេះមានទំហំ៥ម៉ែត្រគុណ១០ម៉ែត្រ ចំណាយថវិកាអស់២០ម៉ឺនដុល្លារសហរដ្ឋអាមេរិក ។ លោកប្ញទ្ធី សំណាង ប្រធានក្លឹបកីឡាបាល់ទាត់ភ្នំពេញក្រោនដែលជាអ្នកចំណាយប្រាក់អស់យ៉ាងច្រើនសន្ធឹកសន្ធាប់លើការដាក់ផ្ទាំងកញ្ចក់ទូរទស្សន៍នេះឱ្យដឹងថា មូលហេតុដែលលោកធ្វើបែបនេះ គឺដើម្បីលើកកម្ពស់វិស័យកីឡាបាល់ទាត់នៅព្រះរាជាណាចក្រកម្ពុជា ។
ទូរទស្សន៍ដ៏ធំនេះរៀបចំដំឡើងកាលពីថ្ងៃទី២ មករា ហើយរហូតមកដល់ពេលនេះបានប្រមាណ៨៥% ហើយ។ ក្រុមហ៊ុនចិនដែលជាអ្នកម៉ៅការដំឡើងបានធានារយៈពេល២៥ឆ្នាំសម្រាប់ទូរទស្សន៍នេះ ។ លោកប្ញទ្ធី សំណាង ឱ្យដឹងថា បើនៅស្រុកគេកន្លែងខ្លះមានរហូតដល់ទៅ៣ ឬ៤ផ្ទាំងឯណោះ គឺបំពាក់នៅជុំវិញទីលានបាល់ទាត់តែសម្រាប់កម្ពុជាយើង គឺទើបតែមាន១នេះគត់ ។
បើតាមលោកគង់ ដាវីដ ជំនួយការរបស់លោកប្ញទ្ធី សំណាង មានប្រសាសន៍ថា ទូរទស្សន៍ដែលប្រើប្រាស់កម្លាំងភ្លើងរហូតដល់៣០០អំពែរនេះ អាចដាក់បញ្ចាំងជាផ្លូវការនៅថ្ងៃប្រកួតវគ្គផ្តាច់ព្រ័ត្រពានរង្វាន់បាល់ទាត់សម្តេចតេជោ ហ៊ុន សែន នាពេលខាងមុខនេះ៕
ចែករំលែកព័តមាននេះ