ខេត្តកំពង់ឆ្នាំង ៖ ស្រូវប្រាំងចំនួន១១៧ហិកតាក្នុងចំណោម៣៣១ហិកតា របស់ប្រជាពលរដ្ឋកំពុងប្រឈមនឹងការខូចខាតទាំងស្រុង ព្រោះតែខ្វះទឹក ហើយកាលពីព្រឹកថ្ងៃទី៨ កុម្ភៈ ពលរដ្ឋប្រមាណជាង១០០នាក់ តំណាងឱ្យ២៣១គ្រួសារបាននាំគ្នាទៅកាន់ការិយាល័យតំណាងរាស្ត្រមណ្ឌលកំពង់ឆ្នាំង ដើម្បីសុំឱ្យជួយអន្តរាគមន៍ជាបន្ទាន់ ដើម្បីបានទឹកបញ្ចូលស្រែ។
ប្រជាពលរដ្ឋទាំងនេះមកពីភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច ។ លោកមេភូមិអ្នកតាហាង ឈ្មោះម៉ី ពិន បានឱ្យដឹងថា ប្រជាពលរដ្ឋក្នុងភូមិអ្នកតាហាង ចំនួន២៣១គ្រួសារ កន្លងមក បានពឹងអាស្រ័យលើស្រូវប្រាំង ចំណុចទំនប់កុមារដែលមានផ្ទៃដីសរុប៣៣១ហិកតា ប៉ុន្តែដោយសារឆ្នាំនេះជួបគ្រោះទឹកជំនន់ធ្វើឱ្យទំនប់កុមារបាក់ខូចមិនអាចស្តុកទឹកបាន ទើបធ្វើឱ្យស្រូវប្រាំងឆ្នាំនេះ ត្រូវខ្វះខាតទឹក ។ ក្នុងចំណោមស្រូវប្រាំង៣៣១ហិកតា គឺមាន១១៧ហិកតា កំពុងប្រឈមនឹងការខូចខាតទាំងស្រុង ។
សូមរំលឹកថា កាលពីថ្ងៃទី២៦ មករា២០១២ កន្លងទៅ មានម៉ាសីុនបូមទឹករបស់ខេត្តមួយគ្រឿងបានបូមទឹកដាក់ទំនប់អ្នកគ្រូដែរ តែមិនអាចផ្គត់ផ្គង់ដល់់ស្រែរបស់ពួកគាត់ឡើយ ។ ពលរដ្ឋត្អួញត្អែរថា បើពុំមានអន្តរាគមន៍ទេ ស្រូវប្រាំងរបស់ពួកគាត់នឹងខូចខាត ទើបគ្មានជម្រើសក្រៅតែពីមកពឹងតំណាងរាស្ត្រ ដើម្បីជួយពួកគាត់ផង។
លោកម៉ី ពិន បានបញ្ជាក់ពីសំណូមថា បច្ចុប្បន្នមានម៉ាសីុនបូមទឹកមួយគ្រឿងរបស់ខេត្តដែលបូមពីទន្លេចូលក្នុងអាងទំនប់អ្នកគ្រូ តែមិនអាចមកដល់ស្រែរបស់ពួកគាត់ឡើយ។ ហេតុនេះពួកគាត់សំណូមពរសុំជីកប្រឡាយមួយខ្សែមាន បណ្តោយ១.៤០០ម៉ែត្រ ដែលម្ចាស់គ្រឿងចក្របានសន្យាថា ជីកតែ២ថ្ងៃ គឺរួចហើយ ក្នុងតម្លៃ ១.២០០ដុល្លារ ។ ក្រោយពីបានប្រឡាយហើយ គាត់សំណូមពរសុំម៉ាស៊ីនមួយគ្រឿងទៀត សម្រាប់បូមបន្តពីម៉ាស៊ីនចាស់ដែលមានស្រាប់ពីទន្លេចូលអាងទំនប់អ្នកគ្រូ ហើយម៉ាស៊ីនថ្មី នឹងបូមបន្ត ពីអាងទំនប់អ្នកគ្រូចូលប្រឡាយថ្មីប្រវែង១.៤០០ម៉ែត្រ និងបានទឹកដល់ស្រូវពួកគាត់ហើយ ។ លើសពីនេះ គឺស្នើសុំប្រេង៣.៥០០លីត្រសម្រាប់ដាក់ម៉ាស៊ីនបូមទឹកនោះផងដែរ។
សំណូមពររបស់ប្រជាពលរដ្ឋ ត្រូវបានមន្ត្រីការិយាល័យតំណាងរាស្ត្រទទួលយកហើយ តែលទ្ធផលយ៉ាងណានៅមិនទាន់ដឹងនៅឡើយទេ៕
ចែករំលែកព័តមាននេះ