រាជធានីភ្នំពេញ ៖ នៅលើសង្វៀនស្ថានីយទូរទស្សន៍ CTN នាថ្ងៃសុក្រ ទី១០ កុម្ភៈ ខាងមុខនេះ ការប្រកួតប្រដាល់ដណ្តើមខ្សែក្រវាត់ភេសជ្ជៈខារ៉ាបាវ ប្រភេទទម្ងន់៦០គីឡូក្រាម មានចំនួន២គូ។ វ៉ាន់ ចាន់វេត មកពីក្លឹបសិង្ហកីឡា ជួបសុខ ចិន្តា មកពីក្លឹបឃ្លាំងមឿងកីឡា ឯទិត្យ សុវណ្ណ គិរី មកពីក្លឹបក្រសួងកសិកម្ម ជួបសូយ ភារម្យ មកពីក្លឹបអូដឹមកីឡា ។ រវាងគូប្រកួត២គូខាងលើ ការជួបគ្នាលើកនេះគឺស្ថិតនៅក្នុងវគ្គជម្រុះនៅឡើយ ។
ចាន់វេត បើទោះជាមិនទាន់បញ្ចប់ការប្រកួតក្តី តែគេនៅមានជំនឿចិត្តយ៉ាងច្រើនក្នុងការរកកន្លែងមួយនៅវគ្គពាក់កណ្តាលផ្តាច់ព្រ័ត្របន្តទៀត ។ ម្យ៉ាងទៀត ការមកប៉ះសុខ ចិន្តា លើកនេះ គេមិនមានការព្រួយបារម្ភឡើយ ហើយសំអាងលើផ្លែកែង និងជង្គង់របស់ចាន់វេត អាចមានជំនឿក្នុងការយកឈ្នះចិន្តា បានយ៉ាងងាយ។ ប៉ុន្តែចិន្តា គេគិតថា យ៉ាងហោចណាស់ក៏ធ្វើឱ្យចាន់វេត មិនសូវស្រួលខ្លួនប៉ុន្មានដែរ។ ចិន្តា មានស្នៀតជើង និងស្នៀតដៃល្អ ឯកម្លាំងក៏ខ្លាំងទៀតដូច្នេះចាន់វេត មិនអាចធ្វេសប្រហែសបាន
ឡើយ។
ចំណែកទិត្យ សុវណ្ណគិរី និងសូយ ភារម្យ វិញ មានសង្ឃឹមតិចបំផុត ព្រោះលទ្ធផលនៃការប្រកួតកន្លងមក គេទាំង២នាក់មិនសូវល្អប៉ុន្មានឡើយ ។ ឆ្លងកាត់ការប្រកួតលើកនេះទៀត គឺអាចសម្រេចជោគវាសនារបស់គេម្នាក់ៗបានហើយ។ ម្យ៉ាងវិញទៀត ការប្រកួតលើកនេះ ទាំងគិរី និងភារម្យ អាចដឹងពីលទ្ធផលច្បាស់លាស់ ហើយបានន័យថា អ្នកណាហាលខោ អ្នកណាមិនហាលខោគឺដឹងហើយ។
ការជួបគ្នារវាងគិរី និងភារម្យ លើកនេះអ្នកទស្សនាមានជំនឿចិត្តលើភារម្យច្រើនជាង ។ ចំពោះគូប្រកួតមិត្តភាពវិញ លាភ សំណាងមកពីក្លឹបកងពលតូចលេខ៧០ ជួបឆាំ រ៉ែម មកពីក្លឹបសិង្ហកីឡា ។ ឡុង សុវណ្ណពៅ មកពីក្លឹបសាលវ័ន្តកីឡា ជួបអុឹង បូរិន មកពីក្លឹបគជសារកីឡា ៕
ចែករំលែកព័តមាននេះ