រាជធានីភ្នំពេញ ៖ ស្ថានទូតសហរដ្ឋអាមេរិក និងមជ្ឈមណ្ឌលធនធានសោតទស្សន៍បុប្ផាណា នឹងរួមគ្នារៀបចំការតាំងពិព័រណ៍រូបថតពិសេសរបស់អ្នកសារព័ត៌មាន Elizabeth Becker ដែលមានចំណងជើងថា «ដំណើរដ៏គ្រោះថ្នាក់របស់អ្នកយកការណ៍ឆ្ពោះទៅកាន់របបកម្ពុជាប្រជាធិបតេយ្យ» ។ ពិធីបើកជាផ្លូវ ការនូវការតាំងពិព័រណ៍នេះ នឹងចាប់ផ្តើមនៅថ្ងៃទី៩ កុម្ភៈ ឆ្នាំ២០១២ វេលាម៉ោង៦ល្ងាច នៅមជ្ឈ មណ្ឌលបុប្ផាណាក្នុងក្រុងភ្នំពេញ ដែលមានអាសយដ្ឋានផ្ទះលេខ៦៤ ផ្លូវលេខ២០០ (ផ្លូវឧកញ៉ាម៉ែន) ។ លោក Jeff Daigle ភារធារី ស្ថានទូតអាមេរិកធ្វើជាអធិបតីក្នុងពិធីនោះ។
ក្នុងថ្ងៃដដែល (៩ ខែកុម្ភៈ) វេលាម៉ោង៣រសៀល លោកស្រី Becker នឹងឆ្លើយសំណួរអ្នកសារព័ត៌មានស្តីពីពិព័រណ៍នោះ (សូមអ្នកសារព័ត៌មានចូលរួមក្នុងម៉ោងនេះ) ។ កម្មវិធីតាំងពិព័រណ៍នេះ ដែលឧបត្ថម្ភដោយស្ថានទូតសហរដ្ឋអាមេរិកនៅទីក្រុងភ្នំពេញ នឹងបង្ហាញរូបថត និងបទសំភាសន៍នានា របស់លោកស្រី Elizabeth Becker ក្នុងដំណើរមកកាន់ប្រទេសកម្ពុជា នៅខែធ្នូ ឆ្នាំ១៩៧៨ ។
លោកស្រី Elizabeth Becker ដែលជាអតីតអ្នកយកព័ត៌មានឱ្យសារព័ត៌មាន New York Times និងជាអ្នកនិពន្ធសៀវភៅមានចំណងជើងថា «នៅពេលដែលសង្គ្រាមរលត់ទៅ (When the War was Over)» ដែលជាប្រភេទសៀវភៅស្តីពីប្រវត្តិប្រទេសកម្ពុជានិងរបបខ្មែរក្រហមនោះ គឺជាអ្នកយកព័ត៌មានម្នាក់ក្នុងចំណោមអ្នកយកព័ត៌មានតែពីរនាក់ប៉ុណ្ណោះរបស់លោកខាងលិច ដែលបានចូលមកប្រទេសកម្ពុជាក្នុងពេលដែលប្រទេសនេះកំពុងស្ថិតក្រោមការគ្រប់គ្រងរបស់របបកម្ពុជាប្រជាធិប តេយ្យ។ លោកស្រីបានចាប់ផ្តើមអាជីពជាអ្នកសារព័ត៌មាននៅប្រទេសកម្ពុជាក្នុងឆ្នាំ១៩៧២ ហើយលោកស្រីគឺជាអ្នកជំនាញស្តីពីរបបខ្មែរ ក្រហម និងប្រទេសកម្ពុជាសម័យទំនើប។ លោកស្រី Becker ក៏បាននិពន្ធសៀវភៅមានចំណង ជើងថា «បុប្ផាណា» ដែលរៀបរាប់ពីដំណើររឿងរបស់យុវនារីខ្មែរម្នាក់ដែលត្រូវបានសម្លាប់ដោយពួកខ្មែរក្រហម៕
ចែករំលែកព័តមាននេះ