រាជធានីភ្នំពេញ ៖ កាលពីថ្ងៃទី៨ កុម្ភៈ ឆ្នាំ២០១២ សម្តេចហេង សំរិន ប្រធានរដ្ឋសភាបានអញ្ជើញចូលរួមក្នុងកិច្ចប្រជុំគណៈកម្មាធិការអចិន្ត្រៃយ៍នៃប្រទេសនិយាយភាសាបារាំង (APF) ដែលមានតំណាងប្រទេសនិយាយភាសាបារាំងចំនួន១៤ចូលរួម ។
កិច្ចប្រជុំនេះ មានរយៈពេល៣២ថ្ងៃ គឺពីថ្ងៃទី៨ ដល់ថ្ងៃទី១០ កុម្ភៈ ឆ្នាំ២០១២ ។ ថ្ងៃទី៨ កុម្ភៈ កិច្ចប្រជុំធ្វើឡើងនៅវិមានរដ្ឋសភា និងថ្ងៃបន្ទាប់នៅសណ្ឋាគារសូហ្វីតែលក្នុងរាជធានី
ភ្នំពេញ ។
ក្នុងរយៈពេលបីថ្ងៃនេះរាប់ទាំងការបំពេញ ទស្សនកិច្ចនៅខេត្តសៀបរាបអង្គរ ដែលជាអតីត រាជធានីចាស់ដ៏ល្បីល្បាញខាងវប្បធម៌រាប់សតវត្ស និងសម្បូរដោយប្រាង្គប្រាសាទរាប់ពាន់នោះសម្តេចប្រធានរដ្ឋសភាសង្ឃឹមយ៉ាងមុតមាំថា ដំណើរការប្រជុំរបស់គណៈកម្មាធិការអចិន្ត្រៃយ៍ នឹងសម្រេចបានលទ្ធផលល្អ។
សម្តេចហេង សំរិន ថ្លែងថា កិច្ចប្រជុំនេះមានសារសំខាន់ដែលទាក់ទងនឹងអង្គការហ្វ្រង់កូហ្វូនី និងមួយផ្នែកទៀតទាក់ទងទៅនឹងការស្តារឡើងវិញវិស័យសេដ្ឋកិច្ចក្រោយពីវិបត្តិសេដ្ឋកិច្ចសាកលលោក ។ ប្រទេសកម្ពុជាជាប់ជំពាក់ចិត្តជាមួយអង្គការហ្វ្រង់កូហ្វូនីដែលជាចលនាមួយបានកើតឡើងកាលពីឆ្នាំ១៩៦២ដោយឆន្ទៈរបស់បិតាស្ថាបនិក ក្នុងនោះមានអតីតព្រះមហាក្សត្រនរោត្តម សីហនុ ជាអ្នកចុងក្រោយដែលមានព្រះជន្មគង់នៅនៅឡើយ។ ចាប់ពីពេលនោះមក ប្រទេសកម្ពុជាតែងតែលើកតម្លៃអង្គការហ្វ្រង់កូហ្វូនី និងភាសាបារាំង។
ក្រោយពេលឆ្លងកាត់របបខ្មែរក្រហមដែលធ្វើឱ្យប្រទេសកម្ពុជាក្លាយជាប្រទេសក្រីក្របំផុតក្នុងតំបន់នោះ យើងបានខិតខំយ៉ាងច្រើន ដើម្បីស្តារប្រទេសជាតិ និងភាសាបារាំង ព្រមទាំងចូលរួមឡើងវិញជាសមាជិកក្នុងមហាគ្រួសារហ្វ្រង់កូហ្វូនី ។ បន្ទាប់ពីដំណាក់កាលស្តារប្រទេសជាតិឡើងវិញ ក្រោយពីសង្រ្គាមនោះកម្ពុជាបានឆ្លងកាត់យ៉ាងតឹងតែងដូចប្រទេសដទៃលើពិភពលោកនាឆ្នាំ២០០៨ ដោយពុំទាន់គិតដល់មហន្តរាយបណ្តាលមកពីគ្រោះទឹកជំនន់ឆ្នាំ២០០០ និងឆ្នាំ២០១១នោះទេ។
សម្តេចហេង សំរិន ជម្រាបប្រាប់ប្រតិភូសភាអន្តរជាតិទៀតថា «ប្រឈមនឹងស្ថានភាពដ៏ស្មុគស្មាញទាំងនេះ រដ្ឋាភិបាលកម្ពុជាបានដាក់ចេញយុទ្ធសាស្រ្តជាច្រើន ដើម្បីលើកស្ទួយប្រទេសឡើងវិញដោយទទួលនូវភាពរីកចម្រើនគួរឱ្យកត់សម្គាល់ ។ ក្នុងពេលដែលសេដ្ឋកិច្ចពិភពលោកងើបឡើងវិញយ៉ាងលំបាកនោះ ប្រទេសកំពុងអភិវឌ្ឍន៍ទាំងឡាយសុទ្ធតែខ្វះ
ធនធាន ហើយត្រូវប្រឈមនឹងបញ្ហាជាច្រើនទៀតរួមមានផ្នែកនយោបាយ ថាមពលសង្គម និងបរិស្ថានដែលនៅតែគម្រាមកំហែងពិភពលោកយើងសព្វថ្ងៃ ។
សម្តេចប្រធានរដ្ឋសភាបន្តថា សភានិយាយភាសាបារាំងនឹងបង្ហាញជានិច្ចនូវតឹកតាងសក្ខីកម្មនៃកម្លាំងសាមគ្គីភាព និងកិច្ចសហការក្នុងរង្វង់គ្រួសារនៃបណ្តាប្រទេសដែលប្រើប្រាស់ភាសាបារាំង ដើម្បីរួមគ្នាដាក់ចេញនូវសំណូមពរសមស្រប និងជាក់ស្តែងនានាសម្រាប់ជួយដល់សភានៃប្រទេសនីមួយៗក្នុងការគាំទ្ររដ្ឋាភិបាលរបស់ខ្លួនឱ្យជម្នះរាល់ឧបសគ្គ និងការលំបាកនានា ។
ព្រះមហាក្សត្រព្រះបាទសម្តេចព្រះបរមនាថនរោត្តម សីហមុនីបានផ្ញើព្រះរាជសារចូលរួមកិច្ចប្រជុំសភានិយាយភាសាបារាំងដែលមានខ្លឹមសារថា ប្រជាពលរដ្ឋកម្ពុជាពិតជាមានមោទនភាពក្រៃលែងក្នុងការទទួលរៀបចំកិច្ចប្រជុំគណៈកម្មាធិការអចិន្ត្រៃយ៍នៃសភានិយាយភាសាបារាំងដែលជានិច្ចកាលស្មោះត្រង់នឹងកិច្ចសន្យារបស់ខ្លួនតែងបំពេញតួនាទី ដើម្បីជួយគាំទ្រដល់រដ្ឋ និងរដ្ឋាភិបាលនៃប្រទេសដែលប្រើប្រាស់ភាសាបារាំងឱ្យអភិវឌ្ឍក្នុងមាគ៌ាត្រឹមត្រូវប្រកបដោយវិបុលភាព និងចីរភាព។
ខ្លឹមសារព្រះរាជសារបន្តថា គោលដៅរបស់សភានិយាយភាសាបារាំងមានទំនាក់ទំនងយ៉ាងជិតស្និទ្ធជាមួយនឹងគោលដៅរបស់អង្គការហ្វ្រង់កូហ្វូនីជាចលនាមួយបង្កើតឡើងនាឆ្នាំ១៩៦២
របស់បិតាស្ថាបនិករបស់ខ្លួនដែលក្នុងនោះមានព្រះបាទសម្តេចព្រះនរោត្តម សីហនុ អតីតព្រះមហាក្សត្រជាទីសក្ការដែលនៅគង់ព្រះជន្មនៅឡើយ។
ព្រះមហាក្សត្របានមានព្រះចំណារទៀតថាសម្រាប់ឆ្នាំតទៅខាងមុខព្រះអង្គមានជំនឿយ៉ាងមុតមាំថា សភានិយាយភាសាបារាំងនៅតែបន្តជានិច្ចនូវសកម្មភាពរបស់ខ្លួន ដើម្បីសម្រេចនូវឧត្តមគតិរបស់អង្គការហ្វ្រង់កូហ្វូនី ជាពិសេសការគោរពសិទ្ធិមនុស្ស សិទិ្ធស្រ្តី និងសិទិ្ធកុមារ ការប្រឆាំងគ្រឿងញៀន និងជំងឺអេដស៍ ការអភិវឌ្ឍប្រកបដោយចីរភាព និងការពង្រឹងលទ្ធិប្រជាធិបតេយ្យ និងនីតិរដ្ឋ ។ សភានិយាយភាសាបារាំង គប្បីយកចិត្តទុកដាក់ថែមទៀតដល់បញ្ហានានានៃការអប់រំ និងការបណ្តុះបណ្តាលធនធានមនុស្សព្រោះថា យើងបានជិតមកដល់ទីបញ្ចប់នៃកិច្ចសន្យាដែលបានកំណត់នៅទីក្រុងដាកា ដើម្បីសម្រេចឱ្យបានគោលដៅសហស្សវត្ស២០០០ដល់២០១៥ ។
ព្រះមហាក្សត្រជូនពរឱ្យកិច្ចប្រជុំគណៈកម្មាធិការអចិន្ត្រៃយ៍នៃសភានិយាយភាសាបារាំងនៅរាជធានីភ្នំពេញជម្នះនូវឧបសគ្គ និងការលំបាកនានា និងកាន់តែពង្រឹងថែមទៀតនូវភក្តីភាពចំពោះតម្លៃរបស់មនុស្សជាតិ ដើម្បីរួមចំណែកដល់ការពង្រឹងសន្តិភាពក្នុងតំបន់ និងនៅលើពិភពលោក ៕
ចែករំលែកព័តមាននេះ