រាជធានីភ្នំពេញ ៖ ដោយសារជម្លោះដណ្តើមម៉ូយគ្នារឿងលក់ត្រីប្រហិត បណ្តាលឱ្យស្ត្រីម្នាក់រងរបួសចូលដេកពេទ្យ ឯយុវជនដែលបង្កឱ្យស្ត្រីនេះរងរបួសត្រូវបានប៉ូលិសបំពាក់ខ្នោះដៃរួចដាក់ឃុំភ្លាមនៅអធិការដ្ឋានខណ្ឌសែនសុខ។ ករណីនេះបានកើតឡើងកាលពីវេលាម៉ោង៥និង១០នាទីព្រឹកថ្ងៃទី៨ កុម្ភៈ ឆ្នាំ២០១២ នៅចំណុចយឿត្រីភូមិពោធិមង្គល សង្កាត់ព្រែកព្នៅ ខណ្ឌសែនសុខ ។
យុវជនដែលត្រូវប៉ូលិសឃាត់ខ្លួននេះឈ្មោះជឿន សំណាង អាយុ១៨ឆ្នាំ ជាជនជាតិវៀតណាម មុខរបរលក់ត្រី មានទីលំនៅភូមិឌួង សង្កាត់ព្រែកព្នៅ ខណ្ឌសែនសុខ ។ រីឯស្ត្រីរងគ្រោះឈ្មោះង្វៀន ធីហឹង អាយុ៣៥ឆ្នាំ មុខរបរលក់ត្រី ដែរ មានទីលំនៅក្នុងភូមិ-សង្កាត់ជាមួយគ្នាបានរងរបួសហើមក្បាលពីខាងក្រោយ និងបែកមាត់ បច្ចុប្បន្នកំពុងសម្រាកព្យាបាលនៅគ្លីនិកឯកជន។
មូលហេតុដែលនាំឱ្យម្នាក់ជាប់ឃុំ ឯម្នាក់ទៀតដេកពេទ្យនេះ គឺមកពីមុនដំបូងពួកគេទាំង២នាក់នៅលក់ត្រីប្រហិតទល់មុខគ្នា ហើយមានអ្នកមកទិញក៏ដណ្តើមម៉ូយគ្នា ទើបកើតទៅជាជម្លោះជេរបញ្ចោរគ្នាទៅវិញទៅមក។ ពេលនោះស្ត្រីឈ្មោះង្វៀន ធីហឹង បានជេរឈ្មោះជឿន ធីថា ត្រូវជាប្អូនស្រីរបស់យុវជនជឿន សំណាង ទើបយុវជនរូបនេះក្តៅក្រហាយក៏ស្ទុះទៅវាយស្ត្រីរងគ្រោះ មួយកែងដៃ បណ្តាលឱ្យដួលសន្លប់នៅនឹងកន្លែងតែម្តង ។ បន្ទាប់ពីមានអំពើហិង្សានេះ ក្រុមគ្រួសាររបស់ស្ត្រីរងគ្រោះក៏បានចាប់យុវជនខាងលើប្រគល់ទៅប៉ូលិសប៉ុស្តិ៍ព្រែកព្នៅ ដើម្បីចាត់ការទៅតាមច្បាប់។
បច្ចុប្បន្នយុវជនឈ្មោះជឿន សំណាង កំពុងជាប់ឃុំនៅអធិការដ្ឋានខណ្ឌសែនសុខ ហើយប៉ូលិសបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ