ខេត្តស្ទឹងត្រែង ៖ ពិតជាឈាមស្រែកស្បែកហៅមែន ជនជាឃាតកដែលគេសង្ស័យថា រំលោភរួចសម្លាប់អូសទៅដាក់ក្នុងភ្នក់ចំបើងហើយដុតកម្ទេចចោលបំបិទភស្តុតាង ស្ថិតក្នុងភូមិស្រែក្រសាំង ឃុំស្រែក្រសាំង ស្រុកសៀមបូក កាលពីថ្ងៃទី៤ កុម្ភៈ ឆ្នាំ២០១២ កន្លងទៅពេលនេះបានវែកមុខឃាតកឃើញហើយគឺជាប្តីទី២របស់ស្ត្រីរងគ្រោះ ។
លោកមឿង ជុំ អធិការរងនគរបាលស្រុកសៀមបូក បានឱ្យដឹងថា ស្ត្រីរងគ្រោះធ្លាប់មានប្តីចំនួន៣នាក់ តែមិនមានប្តីណាម្នាក់បានរួមរស់នៅជាមួយគ្នាជាប់ឡើយ គឺលែងគ្នាទាំងអស់ ហើយក្នុងចំណោមប្តីទាំងបីនាក់ មានតែប្តីទី២ប៉ុណ្ណោះដែលនៅតែមានចំណងស្នេហ៍នឹងគ្នាតាមរយៈទូរស័ព្ទ តែមិនដឹងកម្រិតណានោះឡើយ ។ លោកបន្តថា ក្នុងទំនាក់ទំនងស្នេហារបស់ស្ត្រីរងគ្រោះជាមួយនឹងប្តីទី២ជាឃាតកនេះ បានបន្សល់ទុកនូវចំណងដៃកូនស្រីម្នាក់ដែលមកដល់បច្ចុប្បន្នមានអាយុ៥ឆ្នាំហើយ។
លោកឌួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្ត បានឱ្យដឹងថា រយៈពេលប្រមាណ២០ម៉ោងក្រោយពីការកើតមានអំពើឃាតកម្មនេះឡើង កម្លាំងការិយាល័យព្រហ្មទណ្ឌកម្រិតធ្ងន់បានបើកការស៊ើបអង្កេត និងកំណត់មុខសញ្ញា ហើយធ្វើការឃាត់ខ្លួនជនសង្ស័យឈ្មោះស៊ុយ កុសល អាយុ២៩ឆ្នាំ រស់នៅក្នុងភូមិ-ឃុំខាងលើ នៅថ្ងៃទី៦ កុម្ភៈ ឆ្នាំ២០១២ ។ ជនដៃដល់ត្រូវជាប្តីទី២របស់ស្ត្រីរងគ្រោះឈ្មោះវ៉ាង កង អាយុ៣១ឆ្នាំ រស់នៅក្នុងភូមិ-ឃុំជាមួយគ្នា ត្រូវបានចោទពីបទឃាតកម្មដោយចេតនា។
គួររំឭកថា នៅយប់ដែលស្ត្រីរងគ្រោះបាត់ខ្លួនគឺមានពិធីរាំរែកអង្គាសបច្ច័យក្នុងវត្តភូមិស្រែក្រសាំង ហើយកម្មវិធីរាំរែកនេះតែងប្រព្រឹត្តទៅនៅរៀងរាល់យប់ថ្ងៃសៅរ៍។
នៅចំពោះមុខមន្ត្រីនគរបាលយុត្តិធម៌ ជនសង្ស័យបានសារភាពថា ខ្លួនពិតជាបានសម្លាប់ស្ត្រីរងគ្រោះប្រាកដមែន ដោយសារតែខឹងនឹងស្ត្រីជាអតីតប្រពន្ធនេះបានជេរប្រមាថសាច់ញាតិរបស់ខ្លួន និងឈានដល់ការណាត់ជួបគ្នានៅក្បែរខ្ទមចាំចម្ការកណ្តាលវាលស្រែ ហើយស្ត្រីជាអតីតប្រពន្ធបានជេរប្រមាថខ្លាំងៗថា «ឪពុកមារបស់ខ្លួនឯង គឺខ្ញុំជាអ្នកធ្វើឱ្យស្លាប់ បើខ្លួនឯងនៅតែខ្លាំងប្រយ័ត្នស្លាប់ទាំងអស់គ្នា» ។ ជនដៃដល់បានឆ្លើយទៀតថា ខណៈស្តាប់ឮ និងទ្រាំចំពោះសម្តីទាំងនេះមិនបាន ខ្លួនក៏បានដាល់មួយដៃចំកណ្តាលមុខ និងវាយមួយដំបងចំកញ្ចឹងក បណ្តាលឱ្យស្លាប់ ហើយក្រោយពីដឹងថា ស្ត្រីរងគ្រោះស្លាប់ ខ្លួនបានអូសសពទៅដាក់លើគំនរចំបើងរួចដុតកម្ទេចក្នុងភ្នក់ចំបើងតែម្តង តែខ្លួនមិនបានរំលោភស្ត្រីរងគ្រោះនោះឡើយ ។
ជនសង្ស័យបានត្រូវនគរបាលយុត្តិធម៌នៃស្នងការដ្ឋានខេត្តកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់នាព្រឹកថ្ងៃទី៧ កុម្ភៈ ឆ្នាំ២០១២៕
ចែករំលែកព័តមាននេះ