រាជធានីភ្នំពេញ ៖ នៅរសៀលថ្ងៃសៅរ៍ ទី១១ កុម្ភៈ យុវតីឆ្នើម បុស្បា ប៉ាន់ នឹងបង្ហាញវត្តមាននៅក្នុងកម្មវិធីប្រគំតន្ត្រី និងបង្ហាញខ្សែវីដេអូ ដែលផលិតជាឌីវីឌីអំពីកម្មវិធីប្រគំតន្ត្រីព្រះគុណគ្រូ នៅប្រាសាទបាយ័ន ខេត្តសៀមរាប កាលពីឆ្នាំមុន ក្រោមស្នាដៃផលិតរបស់មជ្ឈមណ្ឌលបុប្ផាណា ។ ការបង្ហាញ និងចាក់បញ្ចាំងខ្សែវីដេអូនេះ នៅសាកលវិទ្យាល័យបញ្ញាសាស្ត្រក្នុងរាជធានីភ្នំពេញ ស្ថិតនៅតាមដងមហាវិថីព្រះនរោត្តមចាប់ពីម៉ោង២ដល់៤រសៀល ។ កម្មវិធីនេះដើម្បីស្វែងរកប្រាក់យកទៅជួយដល់កុមារក្រីក្រកូនអ្នកនេសាទឱ្យបានចូលរៀន ។
លោកប៉ាន់ ម៉េងហ៊ាង ឪពុករបស់បុស្បា ប៉ាន់ ឱ្យដឹងថា ការបង្ហាញខ្សែរឿងអំពីកម្មវិធីប្រគំតន្ត្រីនៅប្រាសាទបាយ័ន និងការច្រៀងចំនួនបីបទនៅក្នុងឱកាសនោះរបស់បុស្បា ប៉ាន់ ជាការអបអរថ្ងៃបុណ្យខួបកំណើតរបស់នាង។ ការបង្ហាញទេពកោសល្យរបស់បុស្បា ប៉ាន់ ជាថ្មីនេះដើម្បីបង្ហាញពីក្តីស្រលាញ់របស់នាងដល់អ្នករស់ក្នុងជំនាន់របស់នាងដែលបានកើត និងរស់នៅប្រកបដោយមោទនភាពលើទឹកដីអច្ឆរិយជាមាតុភូមិរបស់យើងនេះផងដែរ។
ពិធីនាថ្ងៃសៅរ៍ ខាងមុខនឹងមានការចូលរួមអបអរសាទរពីមន្ត្រីអង្គការយូណេស្កូប្រចាំកម្ពុជា ដែលបានទទួលស្គាល់សមត្ថភាពរបស់បុស្បា ប៉ាន់ ព្រមទាំងលោកទេសរដ្ឋមន្ត្រីកុល ផេង និងថ្នាក់ដឹកនាំសាកលវិទ្យាល័យបញ្ញាសាស្រ្តជាច្រើនរូបទៀត។
ក្នុងកម្មវិធីប្រគំតន្ត្រីនេះនឹងមានដាក់លក់ឌីវីឌីរបស់បុស្បា ប៉ាន់ ហើយប្រាក់ចំណេញទាំងអស់សម្រាប់ជួយដល់កុមារកូនអ្នកនេសាទក្រីក្ររស់នៅតាមដងទន្លេធំ ឱ្យមានឱកាសចូលរៀន ។ ក្រៅពីនេះនៅ Monument Book ក៏មានដាក់លក់ឌីវីឌីនេះ ហើយប្រាក់ចំណេញទាំងអស់នឹងបម្រើឱ្យផលប្រយោជន៍សង្គមដូចគ្នានោះដែរ ។
«ខ្ញុំនឹងមិនយកប្រាក់ចំណេញ ដើម្បីទូទាត់ថ្លៃចំណាយដែលបានធ្វើនៅប្រាសាទបាយ័យទេ គឺប្រាក់ចំណេញទាំងនេះខ្ញុំនឹងយកទៅបម្រើបុព្វហេតុសង្គម» ។ បុស្បា ប៉ាន់ និយាយបែបនេះប្រកបដោយមនសិការគួរឱ្យពេញចិត្ត ។
លោកលី សួន អតីតមន្ត្រីអង្គការហាហ្កា និងបច្ចុប្បន្នបម្រើការងារស្ម័គ្រចិត្តដើម្បីជួយជំរុញកុមារក្រីក្រនៅដងទន្លេធំឱ្យបានចូលរៀន បានកោតសរសើរ និងថ្លែងអំណរគុណចំពោះទឹកចិត្តរបស់បុស្បា ប៉ាន់ និងគ្រួសាររបស់នាង ដែលផ្តល់មូលនិធិជួយទ្រទ្រង់ដល់កូនអ្នកនេសាទក្រីក្រឱ្យបានចូលសាលា ។
នៅទីនោះលោកជួយដល់កុមារក្រីក្រ តាមរយៈការផ្តល់សម្ភារសិក្សា និងលើកទឹកចិត្តឱ្យពលរដ្ឋក្រីក្រយល់ពី សារសំខាន់នៃការបញ្ជូនកូនចូលសាលារៀន ។ ក្រុមការងាររបស់លោកក៏ជួយដើម្បីឱ្យទទួលបានទឹកស្អាតប្រើប្រាស់នៅតាមសហគមន៍ទាំងនោះផងដែរ ។
នៅក្នុងកម្មវិធីប្រគំតន្ត្រីថ្ងៃសៅរ៍ ខាងមុខនេះ បុស្បា ប៉ាន់ នឹងច្រៀងបទនឹកឃើញទាំងអស់ និងបទកូនអ្នកនេសាទ ដើម្បីរំលឹកដល់កុមារភាពរបស់លោកឪពុកនាង ដែលមានអនុស្សាវរីយ៍ជាច្រើននៅលើបឹងទន្លេសាបដ៏សម្បូរត្រី ។ បទចុងក្រោយរបស់នាង គឺ My Ship របស់ I GERSHWIN K WELL ដែលជាប្រភេទចម្រៀងអូប៉េរ៉ា និងប្រគំព្យ៉ាណូដោយលោកស្រីម៉ារី ជីនណៃ ជាគ្រូរបស់នាង និងជាភរិយារបស់លោកតឺរ៉ូ ជីនណៃ ប្រធានតំណាងអង្គការយូណេស្កូប្រចាំកម្ពុជា ។
ក្រៅពីផ្តល់ការកម្សាន្តអារម្មណ៍តាមរយៈទឹកដមសំនៀងរបស់ខ្លួននាឱកាសនោះ បុស្បា ប៉ាន់ ក៏ផ្តល់ក្តីសង្ឃឹមសម្រាប់កុមារក្រីក្រក្នុងការបានចូលសិក្សា ដើម្បីអនាគតភ្លឺស្វាងរបស់ពួកគេផងដែរ ៕
ចែករំលែកព័តមាននេះ