សារព័ត៌មាន«តាហ័រ»របស់ចិនផ្សាយឱ្យដឹងថា ស្ត្រីជនជាតិចិនឈ្មោះវាំង អាយុ២៩ឆ្នាំ សម្រាលបានកូនប្រុសដោយការវះកាត់នៅមន្ទីរពេទ្យមួយកន្លែងក្នុងទីក្រុងស៊ីនសៀង កាលពីថ្ងៃទី៤ កុម្ភៈ កន្លងមក ដោយម្តាយនិងទារកមានសុវត្ថិភាពល្អ និងសុខភាពមាំមួន ។ របាយការណ៍បានឱ្យដឹងថា លោកស្រីវាំង និងស្វាមីទម្ងន់ធម្មតា ប៉ុន្តែកូនស្រីម្នាក់បច្ចុប្បន្នមានអាយុ៦ឆ្នាំ ក៏ធ្លាប់មានទម្ងន់ច្រើនក្នុងពេលកើតដំបូងគឺដល់ទៅ៤គីឡូក្រាម ។ គ្រូពេទ្យដែលថែទាំលោកស្រីវាំង បានឱ្យដឹងថា ទារកឈុនឈុន មានកម្ពស់៦០សង្ទីម៉ែត្រ និងមានទម្ងន់លើសពីទម្ងន់មធ្យមរបស់ទារកទើបកើតដល់ទៅ២ដង ។
ចំណែកលោកស្រីវាំង បានបញ្ជាក់ថា គាត់មិនបានទទួលទានអ្វីខុសប្រក្រតីទេ ក្នុងអំឡុងពេលមានគភ៌ ប៉ុន្តែក៏មានអារម្មណ៍ថា ពោះគាត់ធំជាងស្រី្តមានគភ៌ទូទៅរហូតគិតថា កូនដែលនឹងសម្រាលអាចមានទម្ងន់ប្រហែល៤,៥ទៅ៥គីឡូក្រាមដូចបងស្រី ។ ដោយឡែកទីភ្នាក់ងារព័ត៌មានសីុនហួបញ្ជាក់ថា ក្នុងរវាងពីឆ្នាំ២០០៨ ដល់២០១០ មានទារកទើបកើតក្នុងប្រទេសចិនដែលមានទម្ងន់ដល់ទៅ៧គីឡូក្រាមចំនួន៣នាក់ ប៉ុន្តែសម្រាប់ឯតទគ្គកម្ម៧,៤គីឡូក្រាមរបស់ទារកឈុនឈុន អាចធ្វើឱ្យគេក្លាយជាក្មេងមានទម្ងន់ធ្ងន់ជាងគេលើកដំបូងនៅប្រទេសចិន ។
គួរបញ្ជាក់ថា ក្មេងដែលមានទម្ងន់ធ្ងន់ជាលើកដំបូងតាមកំណត់ត្រាប្រវត្តិសាស្ត្រសៀវភៅ«គីនណេសប៊ុក»គឺទារកអេនណាបេត ក្នុងប្រទេសកាណាដា ដែលបានកើតក្នុងឆ្នាំ១៨៧៩ មានទម្ងន់ដល់ទៅ១០,០៨គីឡូក្រាម ប៉ុន្តែបានស្លាប់ក្នុងអំឡុងពេល១១ម៉ោងក្រោយពីកើត ។ ចំណែកស្ថិតិទារកមានទម្ងន់ធ្ងន់ក្នុងពេលកើតដំបូងនៅលើពិភពលោក និងមានជីវិតរស់នៅ គឺក្មេងប្រុសជនជាតិអីុតាលី ដែលកើតក្នុងឆ្នាំ១៩៥៥ មានទម្ងន់១០,១គីឡូក្រាម ៕
ចែករំលែកព័តមាននេះ