អ.ស.ប រាយការណ៍ថា មនុស្សជាច្រើនសិបពាន់នាក់បានរត់ភៀសខ្លួននៅភាគខាងជើងកេនយ៉ា មកកាន់ប្រទេសអេត្យូពីជិតខាង រយៈពេលប៉ុន្មានសប្តាហ៍ចុងក្រោយនេះ ដើម្បីគេចពីការប៉ះទង្គិចគ្នារវាងពួកជនជាតិភាគតិច។ ការិយាល័យសម្របសម្រួលកិច្ចការមនុស្សធម៌របស់ អ.ស.ប OCHA ក្នុងសេចក្តីប្រកាសមួយចេញផ្សាយកាលពីថ្ងៃទី៧ កុម្ភៈ គូសបញ្ជាក់ថា មនុស្សជាច្រើនសិបពាន់នាក់បានរត់គេចចេញពីជម្លោះរវាងក្រុមជនជាតិភាគតិច BORENA និងក្រុមជនជាតិភាគតិច GABRA នៅភាគខាងជើងកេនយ៉ា។
បណ្តាពលករមនុស្សធម៌វាយតម្លៃថា មានមនុស្សដល់ទៅប្រមាណជា២០.០០០នាក់ ដែលឆ្លងកាត់ព្រំដែនចូលប្រទេសអេត្យូពីដើម្បីស្វែងរកជំនួយ។ អំពើហិង្សារវាងក្រុមជនជាតិភាគតិច ឬក្រុមកុលសម្ព័ន្ធទាំងឡាយដែលពុំត្រូវគ្នា ពិសេសដោយសារបញ្ហាដណ្តើមសត្វពាហនៈគ្នា និងផ្ទៃដីវាលស្មៅសម្រាប់សត្វពាហនៈ តែងកើតមានជារឿយៗនៅតំបន់នេះ នៃប្រទេសកេនយ៉ា ហើយពេលខ្លះប្រកបដោយការបង្ហូរឈាមយ៉ាងសាហាវ៕
ចែករំលែកព័តមាននេះ