យោងតាមប្រភពព័ត៌មានពីគេហទំព័រសិល្បៈកូរ៉េចេញផ្សាយកាលពីថ្ងៃពុធ ទី៨ កុម្ភៈឆ្នាំ២០១២ បានឱ្យដឹងថា តារាសម្តែងភាពយន្តកូរ៉េនាងស៊ូអេ បានបង្ហើបប្រាប់ពីជម្រើសដៃគូស្នេហាថា ខ្ញុំចង់បានមិត្តប្រុសដែលមានវ័យចំណាស់ជាងខ្ញុំ ។ នាងបានបន្តទៀតថា ខ្ញុំតែងតែសង្កេតឃើញថា គូស្វាមីដែលប្តីមានអាយុចាស់ជាងចន្លោះពី១០ ទៅ១៥ឆ្នាំ តែងតែរស់នៅប្រកបទៅដោយសុភមង្គលជាងគូស្វាមីដែលមានអាយុប្រហាក់ប្រហែលគ្នា ។ ការលើកឡើងរបស់តារាសម្តែងវ័យ៣១ឆ្នាំ រូបនេះ បានកើតឡើងបន្ទាប់ពីមានពាក្យចចាមអារ៉ាមថា នាងមានទំនាក់ទំនងស្នេហាជាមួយលោកយុង តៃវុន ដែលជាម្ចាស់ផលិតកម្ម Taewoon Entertainment ។
ពាក្យចចាមអារ៉ាមនោះបានបន្តឱ្យដឹងទៀតថា ទំនាក់ទំនងរបស់តារាសម្តែងសិចស៊ីស៊ូអេជាមួយលោកយុង តៃវុន វ័យ៤៨ឆ្នាំ កំពុងតែដុះពន្លកបន្ទាប់ពីម្ចាស់ផលិតកម្មរូបនេះបានជួលនាងមកសម្តែងជាតួឯកក្នុងរឿងអាទិទេពសង្គ្រាម កាលពីឆ្នាំទៅមិញ ។ ក្រៅពីការងារសម្តែងតួឯកក្នុងរឿងនាងស៊ូអេ ក៏ជាតួឯករបស់ម្ចាស់ផលិតកម្ម ហើយត្រូវបានគេកត់សម្គាល់ឃើញថា ពួកគេបានចំណាយពេលវេលាបណ្តើរគ្នាដើរកម្សាន្ត និងញ៉ាំអាហារពេលល្ងាចជាមួយគ្នាជាញឹកញាប់ ។ ទាក់ទិនទៅនឹងពាក្យចចាមអារ៉ាមនេះ ភ្នាក់ងាររបស់នាងស៊ូអេបានធ្វើការបដិសេធហើយបាននិយាយថា ពួកគេគ្រាន់តែជាមិត្តភក្តិជិតស្និទ្ធក្នុងអាជីពការងារតែប៉ុណ្ណោះ ៕
ចែករំលែកព័តមាននេះ