ម៉ានី ប៉ាក់គីអាវនឹងឡើងប្រកួតការពារខ្សែក្រវាត់ស្ថាប័នWBOក្នុងប្រភេទទម្ងន់ Welterweightរបស់ខ្លួនប្រឆាំងនឹងកីឡាករអាមេរិកធីម៉ូធី ប្រ៊ែតលីថ្ងៃទី៩ខែមិថុនាខាងមុខនៅសង្វៀន MGM Grand ក្រុងឡាសវេហ្គាសសហរដ្ឋអាមេរិក ។ ការអះអាងពីការជួបគ្នានេះកើតឡើងបន្ទាប់ពីកីឡាករ Floyd Mayweather Jr.ជួបប្រកួតជាមួយកីឡាករព័រតូរីកូមីហ្គែល កូតតូនៅថ្ងៃទី៥ខែឧសភា ។ សម្រាប់កីឡាករប្រ៊ែតលីដែលជាម្ចាស់ខ្សែក្រវាត់ពិភពលោកស្ថាប័ន WBOក្នុងប្រភេទទម្ងន់ Light-Welterweightនឹងត្រូវដំឡើងទម្ងន់ខ្លួនមួយកម្រិតទៀតទើបអាចប្រកួតជាមួយប៉ាក់គីអាវបាន ។
ទីប្រឹក្សារបស់ប៉ាក់គីអាវលោក Michael Koncz ប្រាប់ទូរទស្សន៍ ESPNថា៖«ចុងបញ្ចប់ការប្រកួតអាចធ្វើទៅបាន។ ខ្ញុំបានទាក់ទងតាមទូរស័ព្ទទៅលោកបប់ អារ៉ាំនិងប៉ាក់គីអាវ ហើយដូច្នេះពួកយើងក៏បានព្រមព្រៀងគ្នា។ ខ្ញុំហ៊ានសន្មតថា នឹងមិនមានបញ្ហាណាមួយពីខាងភាគីកីឡាករប្រ៊ែតលីទេ ។ យើងបានឈានដល់កិច្ចសន្យាមួយចំពោះការប្រកួតនេះ ហើយប៉ាក់គីអាវក៏បានយល់ព្រមគ្រប់យ៉ាង ។ កាលពីព្រឹកមិញ ខ្ញុំបានសន្ទនាគ្នាជាមួយលោកអារ៉ាំហើយព្រមព្រៀងយកថ្ងៃទី៩ខែមិថុនាខាងមុខ។ បើនិយាយទៅគ្រប់យ៉ាងខ្ញុំបណ្តោយតាមប៉ាក់គីអាវ»។
លោកKonczបានបន្ថែមថា៖«យើងបានជជែកគ្នាពីបញ្ហានេះអស់ជាងមួយខែមកហើយ។ ពួកយើងបានត្រៀមផែនការ Bក្នុងករណីការប្រកួតជាមួយ Mayweather Jr.មិនអាចកើតឡើង។ កាលពីពេលមុន ខ្ញុំបានទៅកាន់ប្រទេសហ្វ៊ីលីពីន។ ខ្ញុំបានយកការប្រកួតរបស់កីឡាករមួយចំនួនចាក់ឱ្យរូបគេនិងប្រពន្ធរបស់គេមើលដើម្បីជ្រើសរើស ហើយកីឡាករប្រ៊ែតលីគឺជាជនម្នាក់ក្នុងចំណោមពួកគេ»។
ប៉ាក់គីអាវនៅក្នុងការប្រកួត៥៩លើក ឈ្នះ៥៤លើក ចាញ់៣ស្មើ២ និងធ្លាប់ផ្តួលដៃគូឱ្យសន្លប់ចំនួន៣៨លើក។ ចំណែកប្រែ៊តលីវិញ នៅក្នុងការប្រកួត២៩លើកគឺគេមិនដែលចាញ់ម្តងណាឡើយ ។ នៅក្នុងចំនួននេះគេបានផ្តួលដៃគូឱ្យសន្លប់បាន១២នាក់ ៕
ចែករំលែកព័តមាននេះ