កាសែត KOMMERSANT របស់រុស្ស៊ី រាយការណ៍កាលពីថ្ងៃទី៧ កុម្ភៈ ថា កងម៉ារីនរុស្ស៊ីត្រូវទទួលនាវាមុជទឹកយុទ្ធសាស្ត្រនុយក្លេអ៊ែរប្រភេទ BOREY យ៉ាងតិច១០គ្រឿងរហូតដល់ឆ្នាំ២០២០ ។ យោងតាមប្រភពដដែលនោះ ថា កងនាវាមុជទឹកថ្មីនេះ នឹងត្រូវបំពាក់ឱ្យដល់កងកម្លាំងនាវាចរណ៍រុស្ស៊ីនាពេលអនាគតស្របតាមកម្មវិធីនៃការទិញគ្រឿងសព្វាវុធ ដែលសើរើឡើងវិញរហូតដល់២០២០ ។ កម្មវិធីនេះក៏គ្រោងផងដែរទិញនាវាមុជទឹកវាយប្រហារនុយក្លេអ៊ែរប្រភេទ GRANEY ១០គ្រឿង និងនាវាមុជទឹកប្រើអគ្គិសនី និងប្រេងម៉ាស៊ូត២០គ្រឿង ក្នុងនោះមាននាវាមុជទឹកប្រភេទ VARCHAVYANKA ៦គ្រឿង។
លើសពីនាវាមុជទឹកទាំងនេះ កងម៉ារីនរុស្ស៊ីនឹងទទួលនាវាពិឃាត១៤គ្រឿង នាវា CORVETTE ៣៥គ្រឿង និងនាវាកាំភ្លើងធំប្រភេទ BUYAN ៦គ្រឿង ព្រមទាំងនាវាធំសម្រាប់ភស្តុភារ ប្រភេទ IVAN GREN ៦គ្រឿង ។ នាយករដ្ឋមន្ត្រីរុស្ស៊ី លោកវ៉្លាឌីមៀរ ពូទីន ថ្លែងកាលពីឆ្នាំទៅមិញថា ការធ្វើទំនើបភាវូបនីយកម្ម កងនាវាចម្បាំង និងនាវាមុជទឹករបស់កងម៉ារីននឹងជាអាទិភាពមួយនាទសវត្សខាងមុខនេះ ។ រដ្ឋាភិបាលរុស្ស៊ីគ្រោងចំណាយប្រាក់ដល់ទៅ៥.០០០ពាន់លានរូប្ល៍ ប្រមាណជា១៦៦ពាន់លានដុល្លារ សម្រាប់ទិសដៅនេះ៕
ចែករំលែកព័តមាននេះ