ទីភ្នាក់ងារព័ត៌មានផ្លូវការស៊ីរី SANA រាយការណ៍ថា ប្រធានាធិបតីស៊ីរីលោកបាចា អាល់អាសាដ គូសបញ្ជាក់កាលពីថ្ងៃទី៧ កុម្ភៈ ពីការប្តេជ្ញាចិត្តរបស់ប្រទេសលោករួមសហការជាមួយរាល់ការខិតខំប្រឹងប្រែងដែលសំដៅធ្វើឱ្យមានស្ថេរភាពនៅស៊ីរី។ ការអះអាងបែបនេះរបស់លោកអាសាដ ត្រូវបានធ្វើក្នុងពេលជួបពិភាក្សាជាមួយរដ្ឋមន្ត្រីការបរទេសរុស្ស៊ី លោកស័រហ្គេយ ឡាវរ៉ូវ ដែលមកដល់ស៊ីរីមុននេះ ដើម្បីប្រគល់ជូនលោកនូវសារលិខិតមួយច្បាប់របស់ប្រធានាធិបតីរុស្ស៊ី លោកឌីមីឌ្រី ម៉េដវេដេវ។
លោកអាសាដ គូសបញ្ជាក់ពីការប្តេជ្ញាចិត្តរបស់ប្រទេសលោកឈានទៅដល់ការចរចាជាតិមួយ ជាមួយនឹងការចូលរួមរបស់តំណាងរដ្ឋាភិបាល ពួកប្រឆាំង និងឥស្សរជនឯករាជ្យទាំងឡាយ។ ក្នុងពេលជួបពិភាក្សាគ្នានេះ លោកអាសាដ ជម្រាបជូនលោកឡាវរ៉ូវ ពីបណ្តាព្រឹត្តិការណ៍នៅស៊ីរី និងពីភេរវកម្មដែលប្រព្រឹត្តលើប្រជាជនស៊ីរី និងលើបណ្តាស្ថាប័នរដ្ឋាភិបាល ដោយពួកភេរវករដែលទទួលការគាំទ្រពីបណ្តាភាគីនៅក្រៅស្រុក។
លោកអាសាដ គូសបញ្ជាក់ថា ប្រទេសរបស់លោកស្វាគមន៍រាល់ការខិតខំប្រឹងប្រែងដែលសំដៅទ្រទ្រង់ដល់ដំណោះស្រាយវិបត្តិ ហើយរួមសហការដោយពេញទំហឹងជាមួយពួកអ្នកសង្កេតការណ៍សម្ព័ន្ធអារ៉ាប់ ទោះបីជាមានឧបសគ្គបង្កឡើងដោយប្រទេសអារ៉ាប់មួយចំនួនក៏ដោយ។ ចំពោះលោកឡាវរ៉ូវវិញថ្លែងថា កិច្ចប្រជុំនេះសំខាន់ណាស់ដែលនាឱកាសនោះ លោកបានសម្តែងពីឆន្ទៈរបស់ប្រទេសលោកជួយដល់ស៊ីរីឱ្យចេញផុតពីភាពចលាចលនាពេលបច្ចុប្បន្នយោងតាមការផ្តួចផ្តើមគំនិតរបស់សម្ព័ន្ធអារ៉ាប់។
លោកមានប្រសាសន៍ថា ស៊ីរីត្រូវការសន្តិភាព និងថាការបង្រួបបង្រួមជាតិនឹងសម្រេចបានបើគ្មានការជ្រៀតជ្រែកពីខាងក្រៅ។ ដោយឡែក បណ្តាប្រទេសជាសមាជិកក្រុមប្រឹក្សាកិច្ចសហប្រតិបត្តិការឈូងសមុទ្រ CCG បានសម្រេចដកឯកអគ្គរដ្ឋទូត ឬឯកអគ្គរាជទូត ចេញពីស៊ីរី ហើយជាមួយគ្នានេះ ស្នើឱ្យទូតស៊ីរីចាកចេញពីប្រទេសពួកគេ ។ នេះជាសេចក្តីរាយការណ៍កាលពីថ្ងៃទី៧ កុម្ភៈ របស់ទូរទស្សន៍រដ្ឋអារ៉ាប៊ី សាអូឌីត ៕
ចែករំលែកព័តមាននេះ