រែនឌី អ័រថិនបានសហការគ្នាជាមួយយក្សឥណ្ឌា ហ្គ្រេត ខាលីប្រកួត២ទល់២ជាមួយម្ចាស់ជើងឯក International Championខូតឌី រ៉ូដដែលចាប់ដៃគូគ្នានឹងវេត បារេត។ ការប្រកួតរវាងគូនេះបានបញ្ចប់ទៅយ៉ាងឆាប់រហ័សបន្ទាប់ពីខាលីបានប្រើស្នៀតកាំបិតពុះដូងរបស់គេយកឈ្នះខូតឌី រ៉ូដភ្លាមៗក្រោយពីខូតឌី រ៉ូដធាក់១ជើងចំកន្លែងពិសេសរបស់ខាលី ។ ការប្រកួតនេះត្រូវបានរៀបចំធ្វើនៅសង្វៀនកីឡាកាស RAWស្ថិតក្នុងទីក្រុង អូក្លាហូម៉ាស៊ីធីរដ្ឋអូក្លាហូម៉ាសហរដ្ឋអាមេរិកកាលពីថ្ងៃអង្គារ ទី៧ កុម្ភៈ។
សម្រាប់អ័រថិននិងខាលីមើលទៅហាក់ដូចជាការចាប់គូដ៏ចម្លែកមួយដ្បិតអំឡុងពេលប្រកួតគេឃើញពួកគេទាំងពីរនាក់ចង់តែឈ្លោះគ្នា។ សភាពបែបនេះធ្វើឱ្យខូតឌី រ៉ូដនិងវេត បារេតឆ្លៀតកេងចំណេញលើពួកគេទាំងពីរនាក់។ តែបើទោះជាយ៉ាងណា អ្នកទាំងពីរ(ខូតឌី រ៉ូដនិងវេត បារេត )នៅតែមិនអាចជៀសផុតពីការបរាជ័យក្រោមថ្វីដៃអ័រថិននិងខាលី។ ក្នុងពេលប្រកួត ខាលីនិងអ័រថិនដណ្តើមគ្នាចូលវ៉ៃជាពិសេសខាលី។ ក្នុងពេលដែលអ័រថិនកំពុងមានប្រៀបលើគូប្រកួត ខាលីបានទះខ្នងអ័រថិនសុំចូលវ៉ៃម្តង គឺក្នុងខណៈដែលអ័រថិនមិនទាន់យល់ព្រមឈប់។ ក្រោយពីខ្លួនចង់ឈប់វ៉ៃគេក៏បានទះទ្រូងអ័រថិនដោយប្រើដៃធ្ងន់។ សកម្មភាពបែបនេះធ្វើឱ្យអ័រថិនម្តងម្កាលច្រឡំថា ខាលីវ៉ៃខ្លួន។
អ្វីដែលរឹតតែធ្វើឱ្យអ័រថិនខឹងខ្លាំងគឺខាលីបានដណ្តើមយកជ័យជម្នះតែម្នាក់ឯង។ អំឡុងអ័រថិនកំពុងតែមានប្រៀបឈ្នះលើខូតឌី រ៉ូដ រំពេចនោះខាលីក៏ចូលវាយ និងសង្កត់ឱ្យអាជ្ញាកណ្តាលរាប់ដល់៣យកឈ្នះការប្រកួតទាំងស្រុង។ បើទោះជាឈ្នះក្តី តែសម្រាប់អ័រថិនពិតជាមិនសប្បាយចិត្តដែលខាលីលួចជ័យជម្នះរបស់ខ្លួនឡើយ។ ថ្វីដ្បិតតែខាលីឈ្នះ អ័រថិនក៏ឈ្នះដែរ តែការមិនសុខចិត្តនៅតែមាន។ ដូច្នេះការប្រឈមមុខគ្នាក៏កើតមានរវាងមិត្តរួមក្រុមទាំង២។ ខាលីបានចាប់ច្របាច់កអ័រថិនបោះទៅជ្រុងសង្វៀនតែភ្លាត់ស្នៀតត្រូវអ័រថិនលោតចាប់ក្បាលបោកផ្កាប់មុខទៅនឹងក្តាររេញដោយស្នៀត RKO ។
ចំណែកការប្រកួតជាក្រុមមួយផ្សេងទៀត ក្រុមនាង គែលលី គែលលី នាងអ៊ីវ នាងអាលីស្យ៉ា ហ្វក់និងនាងតាមីណាបានយកឈ្នះក្រុមនាងប៊ែត ហ្វូនិច នាងណាត់តាលីយ៉ានិងបងប្អូនកូនភ្លោះត្រកូលបេលឡា ។ ជ័យជម្នះរបស់ក្រុមនាងគែលលីបានកើតឡើងបន្ទាប់ពីក្រុមនាងប៊ែត ហ្វូនិចឈ្លោះប្រកែកគ្នាជាឱកាសល្អឱ្យនាងតាមីណាប្រើស្នៀតពិសេស Superfly Splashឈ្នះការប្រកួតជាស្ថាពរ ៕
ចែករំលែកព័តមាននេះ