រាជធានីភ្នំពេញ ៖ ចោរលួចប្រដាប់ដោយអាវុធមួយក្រុមមានគ្នា៣នាក់ត្រូវបានប៉ូលិសព្រហ្មទណ្ឌខណ្ឌ៧មករា ស្រាវជ្រាវចាប់ខ្លួនបាននៅវេលាម៉ោង៣និង១៥នាទីរសៀលថ្ងៃទី៤ កុម្ភៈ នៅចំណុចផ្លូវលេខ៩៣កែងផ្លូវលេខ២៥២ សង្កាត់ចតុមុខ ខណ្ឌដូនពេញ ។ ចំពោះចោរលួចទាំង៣នាក់នេះ ផ្អែកតាមសាវតារដែលប៉ូលិសធ្វើការស្រាវជ្រាវ គឺពួកគេទើបតែចេញពីពន្ធនាគារនៅក្នុងឆ្នាំ២០១០ និង២០១១ ហើយដើរលួចទ្រព្យសម្បតិ្តប្រជាពលរដ្ឋយ៉ាងសកម្មនៅក្នុងរាជធានីភ្នំពេញ នៅពេលម្ចាស់ទ្រព្យសម្បតិ្តទាន់ គឺពួកវាដកកាំភ្លើងគំរាម ឬបាញ់តែម្តង ដើម្បីយកទ្រព្យសម្បត្តិ ។
នៅព្រឹកថ្ងៃទី៧ កុម្ភៈ ប៉ូលិសខណ្ឌ៧មករា បានធ្វើសន្និសីទកាសែតបង្ហាញជនសង្ស័យទាំង៣នាក់ខាងលើនេះដោយប្រាប់ពីសកម្មភាពរបស់ពួកវាដើរលួចទ្រព្យសម្បតិ្តប្រជាពលរដ្ឋនៅក្នុង
រាជធានីភ្នំពេញ ជាពិសេសគឺលួចម៉ូតូតែម្តង ។ ជនសង្ស័យទាំង៣នាក់នេះ ១-ឈ្មោះលឹម ទីសំណាង ភេទប្រុស អាយុ២៣ឆ្នាំ ស្នាក់នៅផ្ទះជួលក្នុងសង្កាត់ចោមចៅ ខណ្ឌពោធិ៍សែនជ័យ ២-ឈ្មោះថៃ សារ៉ា ហៅ ទូច ភេទប្រុស អាយុ៣៤ឆ្នាំ ជាអ្នករត់តាក់ស៊ីស្នាក់នៅផ្ទះជួល ផ្លូវរថភ្លើង សង្កាត់បឹងកក់២ ខណ្ឌទួលគោក និង៣-ឈ្មោះស៊ូ សេត ភេទប្រុស អាយុ៣៣ឆ្នាំ ជាអ្នករត់ម៉ូតូឌុប ស្នាក់នៅផ្ទះជួល សង្កាត់បឹងត្របែក ខណ្ឌចំការមន ។
មន្ត្រីប៉ូលិសខណ្ឌ៧មករា បានឱ្យដឹងថា កាលពីថ្ងៃទី៤ កុម្ភៈ វេលាម៉ោង១១និង៥០នាទីថ្ងៃត្រង់ ចោរមួយក្រុមមានគ្នា៥នាក់ជិះម៉ូតូ២គ្រឿងម៉ាកហុងដា C125 ពណ៌ខ្មៅ ប្រដាប់ដោយកាំភ្លើងខ្លី២ដើម បានធ្វើសកម្មភាពលួចម៉ូតូ SL របស់ជនរងគ្រោះដែលទុកនៅមុខផ្ទះលេខ៣៧១E0 ផ្លូវលេខ២៤៥ ភូមិ២ សង្កាត់ផ្សារដេប៉ូ២ ខណ្ឌទួលគោក ។ ប៉ុន្តែពេលបក្សពួកម្នាក់ចូលទៅលួចម៉ូតូនោះរួចប្រុងឡើងជិះក៏ត្រូវកម្មកររបស់ម្ចាស់ម៉ូតូមើលឃើញតាមកាមេរ៉ាសុវត្ថិភាពក៏បានចេញពីក្នុងផ្ទះស្រែកថាចោរៗ!ហើយចាប់ចោរនោះបាន តែពេលនោះគ្នាវាដែលនៅក្បែរនោះបានដកកាំភ្លើងខ្លីភ្ជង់គំរាមកម្មករនោះ រួចរំដោះគ្នាវាឡើងជិះម៉ូតូគេចខ្លួនបាត់ទៅ ។
ប៉ូលិសបានបន្តថា ក្រោយពីម្ចាស់ម៉ូតូរងគ្រោះប្រាប់ភិនភាគម៉ូតូរបស់ជនល្មើស ប៉ូលិសខណ្ឌនោះបានចេញពួនស្ទាក់តាមដងផ្លូវភ្លាមៗ ដើម្បីតាមប្រមាញ់ចាប់ជនសង្ស័យដែលធ្វើសកម្មភាពខាងលើ ។ ប៉ុន្ដែចៃដន្យនៅវេលាម៉ោង៣និង១៥នាទីរសៀលថ្ងៃដដែលកម្លាំងព្រហ្មទណ្ឌខណ្ឌ៧មករា បានប្រទះឃើញមុខសញ្ញាចំនួន២នាក់គឺឈ្មោះថៃ សារ៉ា និងឈ្មោះលឹម ទីសំណាង កំពុងជិះម៉ូតូហុងដា C125 ដូចភិនភាគដែលម្ចាស់ម៉ូតូផ្ដល់ឱ្យនោះក៏ធ្វើការឃាត់ខ្លួនឆែកឆេររកឃើញកូនសោសម្រាប់កាច់កម៉ូតូ និងកាំភ្លើងខ្លីម៉ាកGLOCK ចំនួន១ដើមទើបនាំខ្លួនមកសាកសួរនៅអធិការដ្ឋានខណ្ឌ៧មករា ។ ក្រោយមកប៉ូលិសបានឈានទៅចាប់ខ្លួនបក្សពួកម្នាក់ទៀត ឈ្មោះស៊ូ សេត ឯបក្សពួក២នាក់ទៀតឈ្មោះកយ ឌុល និងឈ្មោះវុធ បានរត់គេចខ្លួនបាត់ ។
ក្នុងប្រតិបត្តិការខាងលើនេះ ប៉ូលិសបានដកហូតម៉ូតូហុងដា C125 ពណ៌ខ្មៅ ស៊េរី ២០០៩មួយគ្រឿង កាំភ្លើងខ្លីម៉ាក GLOCK១ ដើម និងសម្ភារមួយចំនួនដូចជា ប្រដាប់កាច់
កម៉ូតូជាដើម ៕
ចែករំលែកព័តមាននេះ